រដ្ឋាភិបាលប្រេស៊ីលមិនទទួលស្វាគមន៍សម្តេចសង្ឃដាឡៃឡាម៉ា
សម្តេចសង្ឃ ដាឡៃឡាម៉ា បាននិមន្តទៅដល់ក្រុង Sao Paulo ប្រទេសប្រេស៊ីល ហើយសម្រាប់ទស្សនកិច្ចបីថ្ងៃ ដោយពាំនាំទៅជាមួយ នូវសារសន្តោសប្រណី ប៉ុន្តែអ្វីជាការកត់សម្គាល់ គឺគ្មានឥស្សរជននយោបាយជាន់ខ្ពស់ណាម្នាក់ក្នុងជួររដ្ឋាភិបាល ទទួលជួប និងធ្វើគារវកិច្ច សម្តេចសង្ឃទីបេឡើយ។ ចិនដែលជាដៃគូពាណិជ្ជកម្មដ៏ចាំបាច់របស់ប្រេស៊ីល បានតាមដានដំណើរទស្សនកិច្ចរបស់សម្តេចសង្ឃ ដាឡៃឡាម៉ា យ៉ាងប្រកៀកប្រកិតបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ផលប្រយោជន៍សេដ្ឋកិច្ច និងការផ្តោះប្តូរពាណិជ្ជកម្មរវាងចិន និងប្រេស៊ីល មានទំហំធំធេងណាស់ ក្នុងរយៈពេល១០ឆ្នាំចុងក្រោយនេះ ដូច្នេះប្រេស៊ីលមិនអាចបណ្តែតបណ្តោយឲ្យដៃគូពាណិជ្ជកម្មដ៏ចម្បងរបស់ខ្លួនឡើយមិនសប្បាយចិត្ត ព្រោះទស្សនកិច្ចរបស់សម្តេចសង្ឃដាឡៃឡាម៉ាទេ។
ក្នុងពេលធ្វើដំណើរឆ្លងកាត់ប្រទេសម៉ិចស៊ិក លោកប្រធានាធិបតីម៉ិចស៊ិកបានទទួលជួបសម្តេចសង្ឃ ជាលក្ខណៈឯកជន ជាហេតុធ្វើឲ្យចិនក្រេវក្រោធយ៉ាងខ្លាំង ព្រោះមិនចង់ឃើញមានការពិភាក្សាអំពីបញ្ហាទីបេ និងចាត់ទុកថាម៉ិចស៊ិកចង់លូកលាន់ ជ្រៀតជ្រែកកិច្ចការផ្ទៃក្នុងចិន។ ដោយហេតុតែប្រតិកម្មរបស់ចិនដូច្នេះ ទើបគេពុំឃើញមានអ្នកទទួលខុសត្រូវណាម្នាក់នៅក្នុងរដ្ឋាភិបាលប្រេស៊ីល ទទួលជួប សម្តេចសង្ឃ ក្នុងឱកាសទស្សនកិច្ចនេះ។
ប៉ុន្តែទោះជាយ៉ាងដូច្នេះក្តី ក៏ការនេះមិនបានធ្វើឲ្យរំខានដំណើរទស្សនកិច្ចរបស់សម្តេចសង្ឃដាឡៃឡាម៉ាឡើយ។ សម្តេចបានចាត់ទុកខ្លួនព្រះអង្គ ដូចជាមនុស្សទូទៅលើលោកទាំងជាង៧ពាន់លាននាក់ដែរ។ ទស្សនកិច្ចរបស់សម្តេចសង្ឃ គឺដើម្បីផ្សព្វផ្សាយធម៌ ឲ្យពិភពលោកទាំងមូល ជួបតែនឹងសេចក្តីស្រឡាញ់- ការអភ័យទោស និងការសន្តោសប្រណី ឲ្យគ្នាទៅវិញទៅមក។ សម្តេចក៏បានទទួលឆ្លើយចំពោះសំណួរទាំងឡាយ ដែលគ្មានលក្ខណៈនយោបាយ។
នៅថ្ងៃសៅរ៍នេះ ព្រះអង្គនឹងថ្លែងសុន្ទរកថា នៅពហុកីឡាឋាន កណ្តាលក្រុង សៅប៉ូឡូ (Sao Paulo) ប៉ុន្តែនឹងគ្មានវត្តមានឥស្សរជនជាន់ខ្ពស់ប្រេស៊ីល ណាម្នាក់ ហ៊ានចូលរួមស្តាប់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ