អង់គ្លេស-អូឡាំពិក

អង់គ្លេសអំពាវនាវឱ្យពិភពលោករួមគ្នាប្រយុទ្ធនឹងភាពអត់ឃ្លាន ក្នុងថ្ងៃបិទអូឡាំពិក

បន្ទាប់ពីមានការប្រកួតប្រជែងគ្នា អស់ពេលជាងពីរសប្តាហ៍ កីឡាអូឡាំពិកក្រុងឡុងដ៍ នឹងត្រូវបិទបញ្ចប់ នៅល្ងាចថ្ងៃអាទិត្យនេះ ជាមួយនឹងការប្រកួតរត់ប្រណាំង Marathon បុរស និងការប្រកួតកីឡាជាក្រុម មានជាអាទិ៍ ការប្រកួតកីឡាបាល់បោះ បាល់អោប បាល់ទះ។ ពិធីបិទកម្មវិធី នឹងប្រព្រឹត្តទៅនៅវេលាម៉ោង ៨ យប់ ម៉ោងនៅប្រទេសអង់គ្លេស ថ្ងៃទី១២ សីហា ២០១២ ដោយមានការបង្ហាញម្ចាស់ផ្ទះថ្មី ដែលជាអ្នករៀបចំកីឡាអូឡាំពិកឆ្នាំ២០១៦ផង។

ចុះផ្សាយនៅថ្ងៃ៖ 12/08/2012 - 12:37កែប្រែថ្ងៃទី៖ 12/08/2012 - 14:06

ដោយ៖ អៀង សុខម៉ិញ

ផ្សាយពាណិជ្ជកម្ម

តាមទម្លាប់និងជាប្រពៃណី ថ្ងៃបិទការប្រកួតកីឡាអូឡាំពិក ត្រូវចាប់ផ្តើមដោយការរត់ម៉ារ៉ាតុង កណ្តាលក្រុង។ ពិធីបិទកម្មវិធីប្រកួតកីឡាអូឡាំពិកក្រុងឡុងដ៍ឆ្នាំ២០១២ គ្រោងនឹងប្រព្រឹត្តទៅរយៈពេលបីម៉ោង ដោយមានការសម្តែងសិល្បៈ តន្ត្រី និងបាញ់កាំជ្រួច ជាមួយនឹងវត្តមានតារាល្បីៗ ប៉ុន្តែគ្មានវត្តមានព្រះមហាក្សត្រ អេលីហ្សាបែតទីពីរទេ។ បន្ទាប់មកទើបមានការដង្ហែក្បួនក្រុមកីឡាករ កីឡាការិនី អត្តពលកម្ម និងការបង្ហាញរូបភាពកីឡាអូឡាំពិកឆ្នាំ២០១៦ ដែលនឹងប្រព្រឹត្តទៅនៅក្រុង រីយ៉ូ ឌឺ ហ្សានេរ៉ូ ប្រទេសប្រេស៊ីល។ រូបភាព៨នាទីគត់ ដែលនាយកអង្គការអូឡាំពិកប្រេស៊ីល សន្យាថានឹងមានការបង្ហាញដ៏ភ្ញាក់ផ្អើល និងទាក់ទាញបំផុត។

មុនកម្មវិធីបិទកីឡាអូឡាំពិកជាផ្លូវការ លោកនាយករដ្ឋមន្ត្រី អង់គ្លេស David Cameron ត្រូវធ្វើសន្និសីទកាសែត បង្ហាញអំពីតុល្យាការនៃការប្រកួតកីឡាអូឡាំពិកឆ្នាំ២០១២នេះ។ ការប្រកួតកីឡាអូឡាំពិក ដែលបានតាមការស្ទង់មតិ ត្រូវបានប្រជាជនអង់គ្លេសជាងពាក់កណ្តាលស្វាគមន៍ និងចាត់ទុកថាបាននាំផលចំណេញដល់ហិរញ្ញវត្ថុជាតិ។

ឆ្លៀតក្នុងឱកាសនេះ ដែលមានតំណាងថ្នាក់ដឹកនាំបរទេសជាច្រើនកំពុងស្ថិតក្នុងឡុងដ៍ លោកនាយករដ្ឋមន្ត្រីនឹងប្រកាសអំពាវនាវដល់មហាអំណាចធំៗនៅលើផែនដី ឱ្យបង្កើនការខិតខំប្រឹងប្រែងប្រយុទ្ធប្រឆាំងនឹងការអត់ឃ្លាននៅលើពិភពលោក។ “ជំនួបនៃការអត់ឃ្លាន” ត្រូវបានសហការរៀបចំឡើងជាមួយនឹងអនុប្រធានាធិបតីប្រេស៊ីល ប្រទេសអ្នកបន្តទទួលរៀបចំកីឡាអូឡាំពិកឆ្នាំ២០១៦ នៅថ្ងៃនេះ។ កីឡាករពិភពលោកល្បីៗ ឥស្សរជននយោបាយ និងអង្គការអន្តរជាតិទាំងឡាយ ត្រូវបានអញ្ជើញឱ្យចូលរួមក្នុងកម្មវិធីនេះ។ លោកនាយករដ្ឋមន្ត្រីអង់គ្លេសចង់រំលឹកពិភពលោកទាំងមូលថា ក្នុងពេលគ្រប់គ្នាកំពុងរីករាយនឹងការប្រកួតកីឡាដណ្តើមមេដាយ មានកុមារជាង១៧១លាននាក់កំពុងខ្វះចំណីអាហារបរិភោគ ដើម្បីបានលូតលាស់ត្រឹមត្រូវ។ លោកសង្ឃឹមថា បញ្ចេញសកម្មភាពថ្ងៃនេះ នឹងអាចជួយសង្គ្រោះកុមារបាន២៥លាននាក់ឱ្យរួចផុតពីគ្រោះខ្វះអាហារ ក្នុងរយៈបួនឆ្នាំខាងមុខ ពោលគឺមុនការប្រកួតកីឡាអូឡាពិកលើកទី៣១ នៅប្រទេសប្រេស៊ីល៕