កូរ៉េខាងជើងអះអាងថាគ្មានរៀបចំសាកល្បងនុយក្លេអ៊ែរ
កូរ៉េខាងជើងបានចេញសេចក្តីថ្លែងការណ៍មួយ នៅល្ងាចថ្ងៃសៅរ៍ទី ៩មិថុនា ម្សិលមិញ មានលក្ខណៈទន់ភ្លន់ជាងសព្វមួយដង បញ្ជាក់អំពីជំហររបស់ខ្លួនក្នុងសំណុំរឿងនុយក្លេអ៊ែរ ដោយអះអាងថា មិនបានត្រៀមរៀបចំបាញ់សាកល្បងនុយក្លេអ៊ែរទេ “នាពេលនេះ”។ ដំណឹងលេចឮទាំងអម្បាលម៉ាន ជាការញុះញង់របស់កូរ៉េខាងត្បូង ដែលរីករាយនឹងឃើញសហគមន៍អន្តរជាតិដាក់ទណ្ឌកម្មកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
រដ្ឋាភិបាលកូរ៉េខាងត្បូងបានធ្វើគ្រប់យ៉ាង ដើម្បីរុញច្រានស្ថានការណ៍ក្នុងឧបទ្វីបកូរ៉េឱ្យធ្លាក់ដុនដាប ! តាមរយៈការប្រឌិតព័ត៌មាន បង្កហេតុឥតដាច់ប្រឆាំងនឹងកូរ៉េខាងជើង ! នេះបើយោងតាមសារព័ត៌មានផ្លូវការកូរ៉េខាងជើង KCNA ដែលបានស្រង់សេចក្តីថ្លែងការណ៍របស់អ្នកនាំពាក្យក្រសួងការបរទេសកូរ៉េខាងជើង យកមកចុះផ្សាយ។
ជាមួយនឹងទង្វើបង្កហេតុដូច្នេះ ក្រុមមេដឹកនាំកូរ៉េខាងត្បូងសង្ឃឹមថានឹងឃើញកូរ៉េខាងជើងខឹងច្រឡោតទៅធ្វើការបាញ់សាកល្បងនុយក្លេអ៊ែរ ដែលព្យុងយ៉ាងគ្មានគម្រោងសោះនៅ “ពេលបច្ចុប្បន្ននេះ”។ នេះជាការអះអាងបន្ថែមរបស់អ្នកនាំពាក្យដដែល។
កាលពីថ្ងៃទី ១៣មេសា ២០១២ កូរ៉េខាងជើងបានបាញ់បង្ហោះកាំជ្រួចទៅកាន់អវកាស ប៉ុន្តែត្រូវបរាជ័យផ្ទុះឆេះពេលហោះចេញបានប្រមាណតែមួយឬពីរនាទី ជាហេតុធ្វើក្រុមប្រឹក្សាសន្តិសុខអង្គការសហប្រជាជាតិពង្រឹងទណ្ឌកម្មដែលធ្លាប់ដាក់ប្រឆាំងព្យុងយ៉ាង កាលពីឆ្នាំ២០០៦ និង២០០៩។ សហរដ្ឋអាមេរិក និងសម្ព័ន្ធមិត្តរឹតតែសង្ស័យខ្លាំងទៀតថា កូរ៉េខាងជើងអាចនឹងធ្វើការបាញ់សាកល្បងនុយក្លេអ៊ែរជាលើកទីបី។
សេចក្តីថ្លែងការណ៍លើកនេះ បានឆ្លៀតវិលទៅចោទប្រកាន់ដោយត្រង់ៗ រដ្ឋាភិបាលកូរ៉េខាងត្បូងរបស់លោក លី ម្យ៉ុងបាក់ ថាជាអ្នកបង្ករឿង ជាអ្នកជំរុញឱ្យ កូរ៉េខាងជើង បាញ់ផ្លោងទៅកោះកូរ៉េខាងត្បូង កាលពីឆ្នាំ២០១០។ មើលទៅហាក់ដូចជាកូរ៉េខាងជើងកាចសាហាវចូលចិត្តសង្គ្រាម សម្ពាធក៏ឡើងតានតឹង ហើយនាំគ្នាអនុម័តទណ្ឌកម្មប្រឆាំងនឹងព្យុងយ៉ាងភ្លាម។ នេះហើយជាការរង់ចាំរបស់កូរ៉េខាងត្បូង ប៉ុន្តែ ពេលនេះ សហគមន៍អន្តរជាតិទាំងមូលប្រាថ្នាចង់ឃើញរដ្ឋាភិបាលលោក លីម្ញ៉ុងបាក់ ចាកចេញពីតំណែង ក្នុងពេលឆាប់ៗខាងមុខនេះ តាមដែលអាចធ្វើទៅបាន។ នេះជាការគូសបញ្ជាក់របស់ក្រសួងការបរទេសកូរ៉េខាងជើងក្នុងសេចក្តីថ្លែងការណ៍ម្សិលមិញដដែល។
ប៉ុន្តែសូមបញ្ជាក់ថា នេះមិនមែនជាលើកទីមួយទេ ដែលកូរ៉េខាងជើងរិះគន់ និងចោទប្រកាន់កូរ៉េខាងត្បូង។ កាលពីដើមសប្តាហ៍ព្យុងយ៉ាងបានថែមទាំងគំរាមវាយប្រហារបំផ្ទុះការិយាល័យព័ត៌មាននៅទីក្រុងសេអ៊ូល ក្រោមហេតុផលនិយាយប៉ះពាល់រិះគន់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ