អ្នកនាំពាក្យក្រសួងការបរទេស៖ ពាក្យបណ្តឹងរឿងព្រំដែនប្រាសាទព្រះវិហារ នៅក្នុងដៃតុលាការឡាអេ
លោក កុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ជំហរយ៉ាងច្បាស់ជាថ្មីទៀត របស់រដ្ឋាភិបាលថា កម្ពុជាមិនអាចដកពាក្យបណ្តឹង ក្នុងសំណុំរឿងក្តីព្រំដែនប្រាសាទព្រះវិហារ នៅតុលាការយុត្តិធម៌អន្តរជាតិ ទីក្រុងឡាអេ ICJ បានឡើយ។ សំណុំរឿងក្តីនោះ ស្ថិតក្នុងដៃតុលាការឡាអេ ដែលគ្រោងនឹងបើកសវនាកា លើពាក្យបណ្តឹងរបស់កម្ពុជា ដើម្បីបកស្រាយសាលក្រម ឆ្នាំ១៩៦២ ស្តីពីបញ្ហាព្រំដែនប្រាសាទព្រះវិហារ នៅពាក់កណ្តាលខែមេសាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៥
សេចក្តីប្រកាសរបស់អ្នកនាំពាក្យក្រសួងការបរទេស នៅថ្ងៃនេះ បានធ្វើឡើង ជាការឆ្លើយតបនឹងសំណួរអ្នកកាសែត ដែលបានលើកឡើងថា អ្នកនយោបាយនៅប្រទេសថៃ បានជំរុញឲ្យរដ្ឋាភិបាលរបស់លោកស្រី យ៉ីងឡាក់ មកចរចាជាមួយនឹងរដ្ឋាភិបាលលោក ហ៊ុន សែន ដើម្បីឲ្យកម្ពុជាដកពាក្យបណ្តឹងនៅតុលាការយុត្តិធម៌អន្តរជាតិទីក្រុងឡាអេ ហើយរួមគ្នាអភិវឌ្ឍលើដីទំហំ ៤,៦ គីឡូម៉ែត្រក្រឡា នៅជាប់ព្រំដែនប្រាសាទព្រះវិហារ។
ក៏ប៉ុន្តែចំពោះការលើកឡើងដូច្នេះ ត្រូវបានអ្នកនាំពាក្យក្រសួងការបរទេស លោក កុយ គួង បានបញ្ជាក់ទៅកាន់អ្នកកាសែត នៅព្រឹកថ្ងៃទី៦ ខែកុម្ភៈ ឆ្នាំ២០១៣ ថា "កន្លងមក យើងឃើញមន្ត្រីរដ្ឋាភិបាលយើងបានឆ្លើយតបរួចហើយ។ ដូច្នេះហើយ ចម្លើយយើងគឺមិនខុសគ្នាទេ។ ឥឡូវនេះ ដំណាក់កាលនេះ បណ្តឹងនេះ មិនមែនទើបនឹងដាក់ថ្មីៗទេ គឺបានដាក់យូរហើយ ហើយតុលាការបានចាត់ចែងសំណើទី១របស់កម្ពុជាមួយផ្នែក នៃសំណើសុំចាត់វិធានការបន្ទាន់នោះ។ តុលាការបានចេញដីកាបង្គាប់រួចហើយ ក្នុងឆ្នាំ២០១១កន្លងមក ហើយឥឡូវណឹង រឿងអស់ណឹង កំពុងស្ថិតជាប់ក្នុងដៃ នីតិវិធីរបស់តុលាការក្រុងឡាអេនឹងទៀត"។
លោក កុយ គួង បានបញ្ជាក់ថា "គ្រប់ភាគីទាំងអស់គួរតែរក្សាភាពស្ងប់ស្ងាត់ ហើយនិងរង់ចាំមើលដំណើរការនោះទៅ ព្រោះសម្តេចតេជោ លោកបានបញ្ជាក់ហើយថា មានតែដំណោះស្រាយផ្លូវនុងទេ (តុលាការឡាអេ) ដែលជាដំណោះស្រាយបញ្ចប់ មិនឲ្យមានការប៉ះទង្គិចអាវុធ ជម្លោះអីតទៅទៀត នៅក្នុងតំបន់នោះ"។
លោក កុយ គួង ក៏បានបញ្ជាក់ថា មកពេលនេះ ស្ថានភាពព្រំដែនកម្ពុជានិងថៃ ពិសេសតំបន់ព្រំដែនប្រាសាទព្រះវិហារ គឺមានសភាពស្ងប់ស្ងាត់ល្អទេ។ ក្នុងនោះ កងទ័ពកម្ពុជានិងកងទ័ពថៃ ក៏បានប្រាស្រ័យទាក់ទងគ្នាល្អដែរ នៅពេលនេះ។
កាលពីខែមេសា ឆ្នាំ២០១១ កម្ពុជា បានដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ ទីក្រុងឡាអេ ដើម្បីការពារប្រាសាទព្រះវិហារ ក្រោយពីកងទ័ពថៃបើកការវាយប្រហារជាច្រើនលើក ចាប់តាំងពីថ្ងៃទី១៥ កក្កដា ឆ្នាំ២០០៨។
នៅថ្ងៃទី១៨ ខែកក្កដា ឆ្នាំ២០១១ តុលាការឡាអេ បានចេញដីកាបន្ទាន់មួយ តម្រូវឲ្យកម្ពុជា និងថៃ ដកកងទ័ពចេញពីតំបន់គ្មានកងទ័ពបណ្តោះអាសន្ន ទំហំជាង ១៧ គីឡូម៉ែត្រក្រឡា នៅព្រំដែនប្រាសាទព្រះវិហារ។ មួយឆ្នាំក្រោយមក គឺនៅថ្ងៃទី១៨ ខែកក្កដា ឆ្នាំ២០១២ ទើបកម្ពុជា និងថៃ ដកកងទ័ពរៀងៗខ្លួនចេញពីតំបន់ A, B, C និង D ដែលជាតំបន់គ្មានកងទ័ពបណ្តោះអាសន្ន។ រីឯសំណុំរឿងបកស្រាយសាលក្រមឆ្នាំ ១៩៦២ ស្តីពីព្រំដែនប្រាសាទព្រះវិហារ នឹងត្រូវតុលាការឡាអេលើកយកមកជំនុំជម្រះ ចាប់ពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ