ការនាំចេញបន្ថយល្បឿន តែសល់ផលពាណិជ្ជកម្មចិនកើនឡើងខ្លាំង
សល់ផលពាណិជ្ជកម្ម របស់ចិន ក្នុងខែមេសា ឆ្នាំ២០១២នេះ បានកើនឡើងខ្លាំងហួសពីការគ្រោងទុក ពោលគឺប្រមាណ ១៨៤២០លានដុល្លារអាមេរិក ! សល់ផលពាណិជ្ជកម្ម ស្ទុះឡើងខ្លាំងមែន ប៉ុន្តែសកម្មភាពផ្តោះប្តូរពាណិជ្ជកម្មបានបន្ថយល្បឿនបន្តិច ៖ ការនាំចូលតិចតួច ឯការនាំចេញមានកំណើនត្រឹមតែ៤,៩%ប៉ុណ្ណោះ។ នេះបើតាមតួលេខផ្តល់ដោយសាខាពន្ធដារចិន ក្នុងថ្ងៃព្រហស្បតិ៍ទី ១០ ឧសភា២០១២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កាលពីខែកុម្ភៈឆ្នាំ២០១២ ចិនបានស្គាល់ឱនភាពពាណិជ្ជកម្មយ៉ាងធ្ងន់ធ្ងរ ជាលើកមួយ ក្នុងពេលជាងមួយទសវត្សចុងក្រោយនេះ ប៉ុន្តែនៅខែមេសានេះ សល់ផលពាណិជ្ជកម្មចិនបានកើនឡើងយ៉ាងខ្លាំង ដល់ទៅ ជាង១៨ពាន់លានដុល្លារអាមេរិក ខ្លាំងជាការគ្រោងទុក និងច្រើនជាងខែមីនា ដែលមានត្រឹម៥៣៥០លានដុល្លារ។ ចិន ដែលជាប់ចំណាត់ថ្នាក់លេខមួយ នៅលើពិភពលោក ខាងនាំចេញ បានកត់ត្រាសល់ផលពាណិជ្ជកម្មដល់ទៅ ១៩៣០០លានដុល្លារអាមេរិក ក្នុងរយៈពេលបួនខែដំបូងឆ្នាំនេះ។
ប៉ុន្តែបើវិភាគលម្អិតទៅ គេសង្កេតឃើញថា ទោះបីជាចិនមានសល់ផលពាណិជ្ជកម្មខ្លាំងយ៉ាងដូច្នេះក៏ដោយ ក៏ការនាំចេញពេលនេះ មានកំណើនតិចជាងកាលពីខែមុន (៤,៩% ក្នុងមួយឆ្នាំ)។ ម្យ៉ាងវិញទៀត ការនាំចូលមានសកម្មភាពខ្យោយបំផុត គឺប្រមាណតែ០,៣%ប៉ុណ្ណោះ។ កំណើននៃការ “នាំចូល” ទាប ដែលសបញ្ជាក់ឱ្យឃើញថាតម្រូវការក្នុងស្រុកក៏ទាប និងនៅទន់ខ្សោយនេះ វាផ្ទុយស្រឡះពីនយោបាយរបស់រដ្ឋាភិបាលក្រុងប៉េកាំង ដែលប្រាថ្នាចង់ផ្តល់សន្ទុះដល់តម្រូវការ និងការចាយវាយក្នុងស្រុក ដើម្បីដើរតួជាអ្នកអូសទាញកំណើនសេដ្ឋកិច្ចជាតិ។
សូមបញ្ជាក់ថា រហូតមកទល់ពេលនេះកំណើនសេដ្ឋកិច្ចចិនពឹងផ្អែកជាសំខាន់ទៅលើវិនិយោគ និងការនាំចេញ។ ដូច្នេះបើការនាំចេញទន់ខ្សោយ កំណើនសេដ្ឋកិច្ចជាតិក៏ទន់ខ្សោយទៅតាមនោះដែរ។ ពេលនេះ ការនាំចេញរបស់ចិនកំពុងបន្តស្គាល់កំណើនតិចតួច ព្រោះអឺរ៉ុបអ្នកនាំចូលផលិតផលចិនដំបូងគេ កំពុងត្រាំត្រែងនឹងវិបត្តិប្រាក់បំណុល ចំណែកសហរដ្ឋអាមេរិកទើបតែផ្តើមមានកំណើនសេដ្ឋកិច្ចឡើងវិញ យ៉ាងត្រដាបត្រដួសនៅឡើយ។ ជាសរុបកំណើនសេដ្ឋកិច្ចចិនត្រីមាសដំបូងឆ្នាំនេះ មានត្រឹមតែ៨,១%ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ