FBI ផ្តល់យោបល់មិនអោយប្តឹងផ្តល់លោកស្រីគ្លីនតុនក្នុងរឿងអាស្រូវអ៊ីមែល
ទីភ្នាក់ងារ FBI បានបិទបញ្ចប់ការស៊ើបអង្កេតលើករណីលោកស្រីគ្លីនតុនប្រើអ៊ីមែលផ្ទាល់ខ្លួន ក្នុងកិច្ចការជាតិកាលពីពេលលោកស្រីកាន់តំណែងជារដ្ឋមន្រ្តីការបរទេស។ ថ្ងៃអង្គារម្សិលមិញFBI បានផ្តល់យោបល់ថា លោកស្រីមានការធ្វេសប្រហែសប៉ុន្តែ មិនចាំបាច់មានការប្តឹងផ្តល់លោកស្រីទៅតុលាការទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ពេលនេះ លោកស្រីហ៊ីលឡារី គ្លីនតុន អាចធូរស្រាលចិត្តវិញហើយ សម្រាប់យុទ្ធនការឃោសនាបោះឆ្នោតប្រធានាធិបតីអាមេរិក ដោយគ្មានការប្រលាក់ប្រលូសនឹងការចោទប្រកាន់ផ្លូវច្បាប់។ លោកស្រីគ្លីនតុនជាបេក្ខនារីបក្សប្រជាធិបតេយ្យ សម្រាប់ការបោះឆ្នោតប្រធានាធិបតី ខែវិច្ឆិកាឆ្នាំ២០១៦នេះ។
ថ្ងៃអង្គារម្សិលមិញ ទីភ្នាក់ងារស៊ើបអង្កេត FBI បានផ្តល់អនុសាសន៍កុំអោយមានការប្តឹងផ្តល់លោកស្រី ទៅតុលាការទាក់ទងរឿងអាស្រូវប្រើប្រាស់អ៊ីមេលផ្ទាល់ខ្លួន ក្នុងពេលលោកស្រីនៅជារដ្ឋមន្ត្រីការបរទេសអាមេរិក ពីឆ្នាំ២០០៩ដល់ឆ្នាំ២០១៣។
FBI បានសួរចម្លើយលោកស្រីគ្លីនតុន ៣ម៉ោងកន្លះ កាលពីចុងសប្តាហ៍កន្លងទៅ ជុំវិញរឿងអាស្រូវអ៊ីមែលនេះ។ ប្រធានFBIលោក ចេម ខូមៃ បានបន្ទោសថា លោកស្រីគ្លីនតុនខ្ជីខ្ជាហួសហេតុណាស់។ ការដែលលោកស្រីប្រើអ៊ីមែលផ្ទាល់ខ្លួន ក្នុងកិច្ចការជាតិដូច្នេះ វាជាការធ្វេសប្រហែស អាចអោយគេលួចចូលមើលព័ត៌មានសំងាត់របស់រដ្ឋាភិបាលអាមេរិកបាន។ ម្សិលមិញនេះ ប្រធានFBIប្រាប់ថា អ៊ីមែលចំនួន១១០របស់លោកស្រីគ្លីនតុន មានផ្ទុកនូវព័ត៌មានសំងាត់របស់រដ្ឋាភិបាល។
ក្រោយការប្រកាសរបស់FBI លោកដូណាល់ ត្រុំបានប្រតិកម្មថា លោកស្រីគ្លីនតុនជាមនុស្សភូតកុហក។ លោកត្រុំគិតថា គេបានជួយសម្រួលអោយលោកស្រីរួចការចោទប្រកាន់។
បក្សសាធារណរដ្ឋនិងអ្នកបោះឆ្នោតអាមេរិកខ្លះយល់ថា លោកស្រីគ្លីនតុនគ្មានភាពស្មោះត្រង់ទេ។ បក្សប្រឆាំងសាធារណរដ្ឋបន្ទោសដូច្នេះទៀត ដោយសារតែ កាលពីសប្តាហ៍មុន អតីតប្រធានាធិបតីប៊ីល គ្លីនតុន ជាស្វាមីរបស់លោកស្រីគ្លីនតុន បានជួបជាមួយលោកស្រី ឡូរែតតា លីនឆឺ ជារដ្ឋមន្ត្រីយុត្តិធម៌។ គេអាចគិតថា លោកគ្លីនតុនបានសុំអោយរដ្ឋមន្ត្រីយុត្តិធម៌ជួយអោយលោកស្រីគ្លីនតុន អោយរួចផុតពីផ្លវច្បាប់។ ប៉ុន្តែ រដ្ឋមន្ត្រីយុត្តិធម៌ប្រាប់ថា ជាជំនួបផ្ទាល់ខ្លួន មិនទាក៉ទងនឹងសំណុំរឿងលោកស្រីគ្លីនតុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ