អាមេរិក៖FIB បានសួរនាំលោកស្រីគ្លីនតុនទាក់ទងនឹងរឿងអាស្រូវជុំវិញអ៊ីមែលរបស់លោកស្រី
នៅថ្ងៃសៅរ៍ ទី២ កក្កដា លោកស្រីហ៊ីឡារី គ្លីនតុន អតីតរដ្ឋមន្រ្តីក្រសួងការបរទេសអាមេរិក និងជាបេក្ខនារីប្រធានាធិបតីតំណាងឲ្យគណបក្សប្រជាធិបតេយ្យបានចូលខ្លួនដោយស្ម័គ្រចិត្តទៅឆ្លើយនឹងសំណួររបស់ក្រុមអ្នកស៊ើបអង្កេត FBI ទាក់ទងនឹងរឿងអាស្រូវនៃការប្រើប្រាស់អ៊ីមែលផ្ទាល់ខ្លួនដើម្បីឆ្លើយឆ្លង និងដោះដូរព័ត៌មានផ្លូវការក្នុងពេលដែលលោកស្រីមានតួនាទីជាប្រមុខការទូត។
ចុះផ្សាយនៅថ្ងៃ៖
ស្តាប់ - ០១:៥២
ការដែលលោកស្រីគ្លីនតុនបានស្ម័គ្រចិត្តទៅឆ្លើយបំភ្លឺនៅចំពោះមុខក្រុមអ្នកស៊ើបអង្កេតរបស់ FBI ពេលនេះ ក៏ដោយសារតែលោកស្រីចង់បិទបញ្ចប់សំណុំរឿងអ៊ីមែលដ៏ចម្រូងចម្រាសមួយនេះឲ្យបានឆាប់រហ័ស។ ក្រុមអ្នកស៊ើបអង្កេតរបស់ FBI បានចោទសួរលោកស្រីគី្លនទុនរយៈពេល ៣ម៉ោងកន្លះដើម្បីចង់ដឹងថា ហេតុអ្វីបានជាលោកស្រីបានប្រើអ៊ីមែលផ្ទាល់ខ្លួនដើម្បីឆ្លើយឆ្លង និងដោះដូរព័ត៌មានផ្លូវការក្នុងពេលដែលលោកស្រីកំពុងមានតួនាទីជាប្រមុខការទូត ពោលម៉េចមិនប្រើអ៊ីមែលផ្លូវការទៅ។
គេត្រូវរង់ចាំនៅប៉ុន្មានសប្តាហ៍ខាងមុខទើបក្រសួងយុត្តិធម៌ផ្សព្វផ្សាយជាសាធារណៈនូវលទ្ធផលនៃការសួរចម្លើយរបស់ FIB និងសេចក្តីសន្និដ្ឋានចុងក្រោយទាក់ទងនឹងការចោទប្រកាន់ ឬមិនចោទប្រកាន់ចំពោះលោកស្រីគ្លីនតុន។ តែបើតាមមើលទៅ អតីតរដ្ឋមន្រ្តីការបរទេស និងបេក្ខជនប្រធានាធិបតីតំណាងឲ្យគណបក្សប្រជាធិបតេយ្យរូបនេះនឹងរួចផុតពីការចោទប្រកាន់ដូចដែលលោកស្រីធ្លាប់បានបញ្ជាក់នាពេលកន្លងមកថា ទង្វើដែលលោកស្រីបានធ្វើមិនមែនជារឿងខុសច្បាប់ទេ។
បើអ្វីៗនឹងត្រូវចប់ដាច់ស្រឡះ និងរួចផុតពីការចោទប្រកាន់គ្រប់បែបយ៉ាងមែន នោះលោកស្រីគ្លីនតុនអាចនឹងបន្តយុទ្ធនាការឃោសនារហូតដល់សមាជបក្សនៅហ្វីឡាដែលហ្វីដែលលោកស្រីនឹងត្រូវក្លាយជាបេក្ខនារីផ្លូវការរបស់គណបក្សប្រជាធិបតេយ្យសម្រាប់ចូលរួមការបោះឆ្នោតនៅថ្ងៃទី៨ វិច្ឆិកាខាងមុខ។ ទន្ទឹមគ្នានេះ គណបក្សសាធារណរដ្ឋដែលជាគូប្រជែងនឹងនៅបន្តនិយាយថា បើលោកស្រីគ្លីនតុនបានរួចផុតពីការចោទប្រកាន់របស់ FIB គឺមកពី FBI ទទួលគំនាបពីរដ្ឋបាលរបស់លោកប្រធានាធិបតីអូបាម៉ា។
ភាពមន្ទិលសង្ស័យរបៀបនេះអាចនឹងត្រូវលោកដូណាល់ ត្រាំដែលជាបេក្ខជនប្រធានាធិបតីរបស់គណបក្សសាធារណរដ្ឋលើកទៅនិយាយញឹកញយរហូតដល់ថ្ងៃរៀបចំបោះឆ្នោតប្រធានាធិបតីផ្លូវការក្នុងថ្ងៃទី៨ វិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ