មហោស្រពភាពយន្តកានលើកទី ៦៤មិនស្គាល់វិបត្តិ
មហោស្រពកាន បានប្រព្រឹត្តយ៉ាងល្អ និងអស្ចារ្យខ្លាំងនៅឆ្នាំនេះ ដោយគ្មានសង្គ្រាមប៉ាកកា ទាក់ទងនឹងការជ្រើសរើសភាពយន្តដូចឆ្នាំមុន អាកាសធាតុក៏អំណោចផលល្អ តារាល្បីៗនៅលើលោក មកពីហូលីវូត បូលីវូត ។ល។ និង។ល។ បានមកចូលរួម ក្នុងឱកាសនេះ រហូតអ្នកវិភាគចាត់ទុកថាមហោស្រពនេះ អស្ចារ្យ និងជាពាណិជ្ជកម្ម ដ៏សម្បើមមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ដោយមានលោក Robert de Niro ជាប្រធាន និងវត្តមានរបស់ក្រុមតារាភាពយន្តល្បីៗលើពិភពលោក តួយ៉ាង Brad Pitt Angelina Jolie Johnny Depp Sean Penn Catherine Deneuve Sharon Stone ឬក៏ Zinadine Zidane និងភរិយា ។ល។ និង។ល។ មហោស្រពភាពយន្តលើកទី ៦៤ មានលក្ខណៈអស្ចារ្យជាងពេលណាៗទាំងអស់។
មហោស្រពលើកនេះ បានអញ្ជើញសមិទ្ធិករ ផលិតករភាពយន្ត មកពីប្រទេសដែលទទួលរងការគាបសង្កត់ ពីរបបកាន់អំណាចផ្តាច់ការ ជាច្រើននាក់ទៀត មានជាអាទិ៍ភាពយន្តអៀរ៉ង់។ អ្នកផលិតភាពយន្តនេះ ត្រូវបានអាជ្ញាធរចាប់ដាក់ពន្ធនាគារ៦ឆ្នាំ និងមិនអាចចាកចេញពីប្រទេសបានឡើយ។ ខ្សែភាពយន្តនេះនឹងចាក់បញ្ចាំងក្នុងថ្ងៃអាទិត្យទី១៥ឧសភា ដូចភាពយន្តខ្មែររបស់លោក រិទ្ធី ប៉ាន់ ដែរ។
ភាពយន្តកាន់តែសម្បូរបែប មានតារាល្បីៗចូលរួមយ៉ាងសន្ធឹកសន្ធាប់ ទេសចរ ចំនួនការងារកើនឡើង មហោស្រពកានបានក្លាយជាពាណិជ្ជកម្ម មួយដ៏សម្បើម គឺក្នុងតម្លៃប្រមាណជា ៩០០លានអឺរ៉ូ។ តម្លៃរថយន្តទំនើបៗ មួយគ្រឿង ជួលក្នុងតម្លៃ៦ពាន់អឺរ៉ូ ក្នុងមួយថ្ងៃ ចំណែក បន្ទប់សណ្ឋាគារល្អប្រណិតមានតម្លៃជិតបួនម៉ឺនអឺរ៉ូ ក្នុងមួយយប់។ ក្នុងរយៈពេលតែពីរសប្តាហ៍សោះ សណ្ឋាគារ និងភោជនីយដ្ឋានអាចរកប្រាក់ចំណូលបានប្រមាណ១៥% នៃប្រាក់ចំណូលប្រចាំឆ្នាំសរុប។
ប៉ុន្តែ ក្រុងកានត្រូវចំណាយថវិកាយ៉ាងច្រើន ក្នុងផ្នែកសុវត្ថិភាពដែរ។ កម្លាំងភ្នាក់ងារសន្តិសុខ ទាំងរដ្ឋ និងឯកជនចំនួនមួយសែននាក់ ត្រូវដាក់ពង្រាយពេញទីក្រុង ទាំងយប់ទាំងថ្ងៃ។ ការពង្រាយភ្នាក់ងារសន្តិសុខធ្វើឲ្យគេចំណាយអស់ប្រាក់ ២០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ