ហ្វ្រង់ស័រហូឡង់និងម៉ារីយ៉ូម៉ុងទីយល់ស្របគ្នាពីមធ្យោបាយដើម្បីប្រយុទ្ធទល់នឹងវិបត្តិនៅក្នុងតំបន់អឺរ៉ូ
លោកប្រធានាធិបតីបារាំង ហ្វ្រង់ស័រហូឡង់ និងលោកប្រមុខរដ្ឋាភិបាលអ៊ីតាលី ម៉ារីយ៉ូម៉ុងទី បានសម្តែងបង្ហាញឲ្យឃើញនៅថ្ងៃព្រហស្បតិ៍ទី១៤មិថុនាឆ្នាំ២០១២នេះនៅទីក្រុងរ៉ូមនូវ “ទស្សនៈយល់ឃើញដូចគ្នា” ស្តីពីមធ្យោបាយដើម្បីប្រយុទ្ធប្រឆាំងទល់នឹងវិបត្តិហិរញ្ញវត្ថុនិងវិបត្តិសេដ្ឋកិច្ចនៅក្នុងតំបន់អឺរ៉ូ ហើយនិងដើម្បីជួយជំរុញឲ្យមានសន្ទុះកំណើនសេដ្ឋកិច្ចនៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០២
នៅថ្ងៃព្រហស្បតិ៍ទី១៤មិថុនាឆ្នាំ២០១២នេះគឺជាលើកទីមួយហើយ ដែលលោកប្រធានាធិបតីបារាំង ហ្វ្រង់ស័រហូឡង់ និងលោកប្រមុខរដ្ឋាភិបាលអ៊ីតាលី ម៉ារីយ៉ូម៉ុងទី បានជួបពិភាក្សាគ្នាជាផ្លូវការ។ គ្មានអ្វីគួរឲ្យភ្ញាក់ផ្អើលឡើយ ទីក្រុងប៉ារីសនិងទីក្រុងរ៉ូមមានការវិភាគនិងទស្សនៈយល់ឃើញដូចគ្នា ពាក់ព័ន្ធនឹង មធ្យោបាយដើម្បីប្រយុទ្ធប្រឆាំងទល់នឹងវិបត្តិហិរញ្ញវត្ថុនិងវិបត្តិសេដ្ឋកិច្ចនៅក្នុងតំបន់អឺរ៉ូ ហើយនិងដើម្បីជួយជំរុញឲ្យមានសន្ទុះកំណើនសេដ្ឋកិច្ចនៅអឺរ៉ុប។ ទាំងនេះបានបណ្តាលឲ្យ លោកប្រមុខរដ្ឋាភិបាលអ៊ីតាលី ម៉ារីយ៉ូម៉ុងទី ថ្លែងថា “ប្រទេសបារាំងនិងប្រទេសអ៊ីតាលីមានទស្សនៈយល់ឃើញដូចគ្នាពាក់ព័ន្ធនឹងបញ្ហាសំខាន់ៗដែលកំពុងចោទឡើងបច្ចុប្បន្ននេះ”។
គោលបំណងរបស់ប្រមុខដឹកនាំនៃប្រទេសអឺរ៉ុបសំខាន់ទាំងពីរគឺ ការពារប្រាក់អឺរ៉ូ និងរិះរកមធ្យោបាយដើម្បីជួយជំរុញឲ្យមានសន្ទុះកំណើនសេដ្ឋកិច្ច ហើយគេក៏ពុំភ្លេចដែរពីកិច្ចការពារវិន័យថវិកា ដែលទីក្រុងព្រុចសែលពុំអនុញ្ញាតឲ្យមានឧនភាពលើសពី៣%នៃផលិតផលដុលក្នុងប្រទេស។ អឺរ៉ុបត្រូវធ្វើពលិកម្ម ប៉ុន្តែអឺរ៉ុបក៏មានសមត្ថភាពគ្រប់គ្រាន់នឹងធ្វើការហក់លោតឡើងវិញដែរ។ នេះជាជំនឿរបស់លោកប្រធានាធិបតីបារាំង ហ្វ្រង់ស័រហូឡង់។ លោកប្រមុខរដ្ឋបារាំងក៏បានថ្លែងទៀតថា “បញ្ហាច្រើនណាស់ដែលនៅរង់ចាំការដោះស្រាយពីយើង ដូច្នេះយើងត្រូវតែមានការវិភាគច្បាស់លាស់ មាននយោបាយត្រឹមត្រូវសម្រាប់ដោះស្រាយវិបត្តិសេដ្ឋកិច្ចនិងវិបត្តិហិរញ្ញវត្ថុនៅអឺរ៉ុប ហើយយើងក៏មានជំនឿថា ទ្វីបអឺរ៉ុបរបស់យើងមានសមត្ថភាពគ្រប់គ្រាន់នឹងរៀបចំអឺរ៉ុបឲ្យមានអនាគតរុងរឿង”។
នៅខណៈពេលដែលការបោះឆ្នោតជ្រើសតាំងសមាជិកសភាក្រិកខិតកាន់តែជិតមកដល់ ក្តីបារម្ភពាក់ព័ន្ធនឹងអនាគតរបស់ប្រាក់អឺរ៉ូក៏កើតមានកាន់តែខ្លាំងដែរ។ ដូច្នេះហើយបានជា លោកប្រធានាធិបតីបារាំង ហ្វ្រង់ស័រហូឡង់ និងលោកប្រមុខរដ្ឋាភិបាលអ៊ីតាលី ម៉ារីយ៉ូម៉ុងទី បានប្រកាសបញ្ជាក់ប្រាប់ ពីការទុកចិត្តរបស់ខ្លួនទៅលើប្រជាជនក្រិក ហើយនិងពីការចង់ឲ្យទីក្រុងអាថែនបន្តឋិតនៅក្នុងតំបន់ចាយប្រាក់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ