សាកសពប្រធានាធិបតី Hugo Chavez នឹងត្រូវរក្សាទុកដូចជា សពលោក Lénine ដែរ
នៅថ្ងៃសុក្រនេះ ប្រទេសវេណេស៊ុយអេឡា កំពុងប្រារព្ធពិធីបុណ្យសពប្រធានាធិបតី Hugo Chavez ដែលបានទទួលមរណភាព កាលពីថ្ងៃអង្គារដើមសប្តាហ៍ ដោយរោគមហារីកប្រូស្តាត។ សាកសពរបស់លោក Chavez នឹងត្រូវរក្សាទុកដូចជាសាកសពលោក Lénine ដែលជាវីរបុរសបដិវត្តន៍ ក្នុងសតវត្សរ៍ទី ២០ ផងដែរ។ នៅថ្ងៃសុក្រនេះដែរ អនុប្រធានាធិបតី Nicolas Maduro នឹងស្បថចូលកាន់តំណែងជាប្រធានាធិបតីបណ្តោះអាសន្ន។ ហើយក្នុងរវាង៣០ថ្ងៃ បន្តទៅនេះ លោក Maduro នឹងប្រកាសអោយមានការបោះឆ្នោត ដើម្បីអោយសមស្របទៅតាមតាមរដ្ឋធម្មនុញ្ញ ក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:១២
នៅប្រទេសវេណេស៊ុយអេឡា នៅថ្ងៃសុក្រនេះ បុណ្យសពរបស់ប្រធានាធិបតី Hugo Chavez នឹងប្រព្រិត្តទៅនៅសាលាយោធា នៅក្រុងការ៉ាកាស ដោយមានការចូលរួមពីមេដឹកនាំនៃបណ្តាប្រទេសជាង ៣០ ជាពិសេសប្រទេសនានានៅអាមេរិកឡាទីន។ គេនឹងឃើញមានវត្តមានរបស់បណ្តាមិត្តដ៏សំខាន់របស់លោក Hugo Chavez ដូចជា ប្រធានាធិបតីអ៊ីរ៉ង់ Mahmoud Ahmadinejad ប្រធានាធិបតីគុយបា Raul Castro និងប្រធានាធិបតីបេឡារុស Alexandre Loukachenko។
ដោយឡែក សហរដ្ឋអាមេរិក និងបណ្តាបស្ចិមប្រទេសនានា ដែលមិនត្រូវរ៉ូវជាមួយនឹងលោក Hugo Chavez កាលដែលលោកនៅមានជីវិតនៅឡើយនោះ នឹងបញ្ជូនត្រឹមតែថ្នាក់ដឹកនាំកម្រិតទីពីរ ទៅគោរពវិញ្ញាណក្ខន្ធរបស់លោក Chavez តែប៉ុណ្ណោះ។
ប្រធានាធិបតីវេណេស៊ុយអេឡា ដែលត្រូវបានគេស្គាល់ថា ជាមេដឹកនាំដ៏មានសក្តានុពលមួយរូប នៅអាមេរិកឡាទីន បានទទួលមរណភាព កាលពីថ្ងៃអង្គារដើមសប្តាហ៍នេះ ដោយរោគមហារីកប្រូស្តាត។ តាំងពីថ្ងៃពុធមកម្ល៉េះ ប្រជាជនវេណេស៊ុយអេឡារាប់សិបម៉ឺននាក់ បាននាំគ្នាមកឧនលំទោនគោរពសាកសពលោក Chavez នៅសាលាយោធា ក្នុងក្រុងការ៉ាកាស។
យោងតាមលោក Nicolas Maduro ដែលជាអនុប្រធានាធិបតីវេណេស៊ុយអេឡា សាកសពរបស់លោក Hugo Chavez នឹងត្រូវរក្សាទុកដូចជា សាកសពរបស់លោក Lénine លោក ហូជីមិញ រឺក៏លោក ម៉ៅសេទុង ដែលជនតំណាងអោយចលនាបដិវត្តន៍សំខាន់ៗ ក្នុងសតវត្សទី ២០ផងដែរ។ សាកសពលោក Chavez នឹងអាចទុកអោយគេបានឃើញ ៧ថ្ងៃថែមទៀត តាមរយៈមឈ្ឈូសដែលធ្វើពីកញ្ចក់កែវ។ រួចហើយនៅទីបញ្ចប់ សាកសពនឹងត្រូវគេយកទៅដាក់នៅក្នុងសារៈមន្ទីរបដិវត្តន៍ ជាស្ថាពរ។
ប៉ុន្តែយោងតាមអាជ្ញាធរ សាកសពលោក Chavez នឹងត្រូវបញ្ជូនទៅដាក់នៅបន្ទាយទាហាននៅលើភ្នំ មួយកន្លែងស្ថិតនៅភាគខាងលិចក្រុងការ៉ាកាស ដែលនៅទីនោះ គេកំពុងតែសាងសង់សារៈមន្ទីរបដិវត្តន៍មួយឧទ្ទិសដល់វីរបុរសតំណាងឯករាជ្យភាពមួយរូប នៅអាមេរិកឡាទីន ឈ្មោះ Bolivar ដែលលោក Hugo Chavez តែងតែចង់ដើរតាមគំរូរបស់គាត់ កាលពីលោកនៅមានជីវិតរស់នៅឡើយ។
ទោះយ៉ាងណាក្តី នៅថ្ងៃសុក្រនេះ អនុប្រធានាធិបតី Nicolas Maduro នឹងស្បថចូលកាន់តំណែងជាប្រធានាធិបតីបណ្តោះអាសន្ន ក្នុងប្រទេស។ ហើយក្នុងរវាង៣០ថ្ងៃ បន្តទៅនេះ លោក Maduro នឹងប្រកាសអោយមានការបោះឆ្នោត នៅក្នុងពេលកំណត់មួយ អោយសមស្របតាមរដ្ឋធម្មនុញ្ញ នៅវេណេស៊ុយអេឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ