ឥណ្ឌាសម្រេចថាទិញអាវុធរុស្ស៊ីថែមទៀត
ការសម្រេចចិត្តនេះ ត្រូវបានអនុម័ត ល្ងាចម្សិលមិញនៅក្រុង New Delhi ដោយ“គណៈកម្មាធិការទទួលបន្ទុ្ខកខាងសន្តិសុខជាតិ” នៅអមរដ្ឋាភិបាលឥណ្ឌា នាសម័យប្រជុំ ក្រោមអធិបតីភាពលោកនាយករដ្ឋមន្ត្រី Manmohan Singh។ ការទិញលើកនេះ មានទឹកប្រាក់១.៥០០លានដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:០៩
តាមដែលទីភ្នាក់ងារព័ត៌មានផ្លូវការរបស់សហព័ន្ធរុស្ស៊ី ITAR-TASS ផ្សាយយប់មិញ ពីទីក្រុង New Delhi យោងទៅលើប្រភពក្នុងរដ្ឋាភិបាលឥណ្ឌា អាវុធដែលឥណ្ឌាទិញនេះ គឺ ៖
- គ្រាប់បែកបាញ់រថក្រោះ ម៉ាក Invar ចំនួន ១០.០០០ គ្រាប់តម្លៃ ៣០០លានដុល្លារ សម្រាប់បំពាក់នៅនឹងរថក្រោះធុនធ្ងន់ T-90 រាប់រយគ្រឿងដែលឥណ្ឌាបានទិញពីរុស្ស៊ីទៅហើយ។
- រ៉ុកកែតម៉ាក BrahMosចំនួន ២០០ដើមតម្លៃ១.២០០លានដុល្លារសម្រាប់បំពាក់នៅនឹងយន្តហោះប្រដេញធុន Sukhoi-30 MKI រាប់សិបគ្រឿងដែលរុស្ស៊ីបានលក់ទៅឲ្យឥណ្ឌាកាលពីមុនៗ។ ដូច្នេះជាសរុបគឺមានទឹកប្រាក់ ១.៥០០លានដុល្លារអាមេរិក។
ជាការកត់សម្គាល់ គ្រាប់បែកបាញ់រថក្រោះម៉ាក Invar ជាគ្រាប់ដែលបញ្ជាឲ្យបាញ់ពីចម្ងាយ ហើយវាអាចបំផ្លាញរថក្រោះធុនទំនើបណាក៏ដោយ ដល់ចម្ងាយ ៣.០០០ម៉ែត្រ។
អំពីគ្រាប់បែកបាញ់រថក្រោះ ម៉ាក Invar នេះ ៖ ក្នុងដំណាក់ដំបូង ចំនួន ១០.០០០ គ្រាប់ វានឹងត្រូវរុស្ស៊ីលក់ទៅឲ្យឥណ្ឌាដោយនាំចេញពីរុស្ស៊ីទៅ ហើយក្នុងដំណាក់បន្ទាប់មកទៀតក្នុងចំនួន ១៥.០០០គ្រាប់វានឹងត្រូវផលិតនៅឥណ្ឌាផ្ទាល់ ដោយក្រុមហ៊ុនឥណ្ឌា ឈ្មោះ Bharat Dynamics Limited ផលិតទៅតាមអាជ្ញាប័ណ្ណរបស់រុស្ស៊ី។
ចំណែក រ៉ុកកែត ម៉ាក BrahMos គឺផលិតនៅឥណ្ឌា ដោយសហគ្រាសចម្រុះ រុស្ស៊ី-ឥណ្ឌា ដែលមានឈ្មោះថា BrahMos Aerospace។ វាទុក សម្រាប់បំពាក់នៅនឹងយន្តហោះនិងនាវាចម្បាំង។ ល្បឿនហោះរបស់វា គឺ៣.៥០០គ.ម. ក្នុង១ម៉ោងបានន័យថា សឹង៣ដង លឿនជាងសំឡេងដែលមានល្បឿន ១.២០០គ.ម. ក្នុង១ម៉ោង។
រ៉ុកកែតនេះ មាន២បែប គឺ ៖ អាធុនសម្រាប់បំពាក់នៅនឹងយន្តហោះមួយដើមៗ មានទម្ងន់ ២.៥០០គីឡូក្រាមនិងអាធុនសម្រាប់បំពាក់នៅនឹងនាវាចម្បាំងមានទម្ងន់ដល់ ៣.០០០គីឡូក្រាមដែលពីក្នុងនោះគ្រាន់តែក្បាលរំសេវប្រយុទ្ធរបស់វាសុទ្ធតែមានទម្ងន់ដល់ ៣០០ គីឡូក្រាមវង់ប្រតិបត្តិការរបស់វាគឺស៊ីរះពីកំពស់ ៥ម៉ែត្រពីដីរហូតដល់កំពស់ ១៥គ.ម.ក្នុងអាកាស ហើយអាចផ្ចាញ់ទីដៅដល់ចម្ងាយ ៣០០គ.ម.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ