ជប៉ុនចង់បង្កើតក្រុមពិសេសមួយការពារប្រជុំកោះជម្លោះ
យោងតាមសារព័ត៌មានបារាំង AFP ចុះផ្សាយថ្ងៃសុក្រនេះ ក្រសួងការពារជាតិជប៉ុន បានទាមទារអោយមានការបង្កើនថវិកាជាតិ ដើម្បីជួយឧបត្ថម្ភដល់ការបង្កើតកងការពារពិសេសមួយក្រុម ទទួលភារកិច្ចការពារប្រជុំកោះជាប់ជម្លោះជាមួយចិន។ ទឹកប្រាក់ដែលទាមទារមានប្រមាណជា ៣៧ពាន់លានអឺរ៉ូ។ បើគិតទៅ ទឹកប្រាក់នេះ មានការកើនឡើង៣ភាគរយ ប្រៀបធៀបទៅនឹងថវិកាដើម ដែលបានកំណត់ទុកមកហើយ សំរាប់ឆ្នាំ២០១៣នេះ។ ហើយគិត២០ឆ្នាំមកនេះ ថវិកានេះជាថវិកាមានកម្រិតខ្ពស់បំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
មួយភាគនៃថវិកាជាតិដែលក្រសួងការពារជាតិជប៉ុនបានស្នើទាមទារទៅរដ្ឋាភិបាលនេះ មានទិសដៅជួយឧបត្ថម្ភដល់ការបង្កើតក្រុមការពារប្រជុំកោះជាប់ជម្លោះជាមួយចិន។ យោងតាមសារព័ត៌មានបារាំង AFP ចុះផ្សាយនៅថ្ងៃសុក្រទី៣០សីហានេះ ក្រសួងការពារជាតិជប៉ុនចង់អោយរដ្ឋាភិបាលផ្តល់ជាថវិកាប្រមាណជា៤៨០០ ពាន់លានយេន ត្រូវនឹង៣៧ពាន់លានអឺរ៉ូ សំរាប់ការហ្វឹកហ្វឺនរបស់ក្រុមការពារ សំរាប់ឆ្នាំ២០០១៣-២០០១៤ នេះ។ គិតជាភាគរយ កម្រិតថវិកាដែលទាមទារនេះ មានការកើនឡើង៣ភាគរយ ប្រៀបនឹងថវិកាដែលធ្លាប់កំនត់ទុករួចហើយ សំរាប់ឆ្នាំ២០១៣នេះ។
មន្ត្រីជាន់ខ្ពស់ក្រសួងការពារជាតិ លើកហេតុផលថា ត្រូវការថវិកាបន្ថែមទៀត ដើម្បីបង្កើតក្រុមការពារថ្មីមួយ ប្រដាប់ដោយយានជំនិះដែលអាចធ្វើសកម្មភាពបានទាំងជើងគោក និងជើងទឹក។ ក្រសួងការពារជាតិចង់អោយក្រុមការពារនេះ មានលក្ខណៈដូចជាក្រុមទាហានជើងទឹកអាមេរិក ដូច្នោះដែរ។ ក្រុមការពារប្រជុំកោះជម្លោះនេះ មានកាតព្វកិច្ចការពារកោះនានា នៅភាគនិរតីប្រទេស។ ចង្កោមកោះទាំងនោះមានចាប់ពីកោះអូគីណាវ៉ា នៅចុងភាគខាងត្បូងជប៉ុន រហូតជិតដល់តៃវ៉ាន់ តាមព្រំដែនសមុទ្រចិនខាងកើត និងមហាសមុទ្រប៉ាស៊ីហ្វិក។ ក្នុងចំណោមកោះទាំងនេះ ក៏មានប្រជុំកោះសេនកាគូ ដែលជាកោះជម្លោះរវាងជប៉ុន និងចិន ព្រមទាំងតៃវ៉ាន់ផងដែរ។
ទោះយ៉ាងនេះក្តី សំណើសុំថវិកាបន្ថែមរបស់ក្រសួងការពារជាតិជប៉ុន ប្រហែលអាចត្រូវរដ្ឋាភិបាលអភិរក្សនិយមរបស់នាយករដ្ឋមន្ត្រី ស៊ីនសូ អាបេ បដិសេធ រឺក៏ទទួលយកត្រឹមតែខ្លឹមសារមួយចំណែកនៃសំណើប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ