ស៊ីរីប្រកាសថានឹងវាយប្រហារតបទៅអ៊ីស្រាអែលវិញ
បន្ទាប់ពីបានប្រកាសថាយន្តហោះអ៊ីស្រាអែល បានទំលាក់គ្រាប់បែកលើមជ្ឈមណ្ឌលស្រាវជ្រាវវិទ្យាសាស្ត្រយោធា នៅជិតក្រុងដាម៉ាស ប្រទេសស៊ីរីបានគំរាម នៅថ្ងៃព្រហស្បតិ៍ ម្សិលមិញថា នឹងប្រើសិទ្ធិរបស់ខ្លួន ធ្វើការតបតទៅអ៊ីស្រាអែលវិញ។ ការគំរាមប្រកាសនេះធ្វើឡើង នៅពេលដែលប្រមុខការទូតចាស់របស់សហរដ្ឋអាមេរិក លោកស្រី Hillary Clinton បានចោទប្រទេសរុស្ស៊ី និងអ៊ីរ៉ង់ ថានៅតែផ្តល់ជំនួយផ្នែកអាវុធដល់ប្រទេសស៊ីរី។ អង្គការសហប្រជាជាតិមានការព្រួយបារម្ភ បន្ទាប់ពីបានទទួលដំណឹងថាអ៊ីស្រាអែល បានទំលាក់គ្រាប់បែក នៅស៊ីរីមក ប៉ុន្តែមិនទាន់មានលទ្ធភាពស្វែងរកមើលថា តើដំណឹងនេះជាការពិត រឺយ៉ាងណានៅឡើយទេ។ កាលពីម្សិលមិញនេះ រុស្ស៊ីបានសន្យាថា នឹងផ្តន្ទាទោសនូវទង្វើរបស់អ៊ីស្រាអែល ប្រសិនបើហេតុការណ៍នេះ ពិតជាបានកើតឡើងមែននោះ។
ចុះផ្សាយនៅថ្ងៃ៖
ស្តាប់ - ០២:២៥
លោក Alil Abdel Karim Ali ឯកអគ្គរដ្ឋទូតរបស់ស៊ីរីនៅប្រទេសលីបង់ បានប្រកាសថា ក្រុងដាម៉ាសត្រៀមប្រើសិទ្ធិរបស់ខ្លួន ដើម្បីធ្វើការឆ្មក់តបតទៅនឹងទង្វើឈ្លានពានរបស់អ៊ីស្រាអែលវិញ។ លោក Ali បានអោយនិយមន័យ នៃការវាយប្រហាររបស់អ៊ីស្រាអែលថា ជា “ការឈ្លានពានមានលក្ខណៈគាំទ្រដល់ការបង្កើតរដ្ឋហ្ស៊ីហ្វ នៅប៉ាឡេស្ទីន”។
បន្ទាប់ពីបានប្រកាសថា យន្តហោះអ៊ីស្រាអែលទំលាក់គ្រាប់បែក លើមជ្ឈមណ្ឌលស្រាវជ្រាវវិទ្យាសាស្ត្រយោធា នៅជិតក្រុងដាម៉ាសមក អាជ្ញាធរស៊ីរីបានរំលឹកឡើងវិញ នូវសិទ្ធិការពារបូរណភាពដែនដីរបស់ខ្លួន។
ប្រធានអង្គការសហប្រជាជាតិ លោក Ban Ki-moon បានសំដែងការព្រួយបារម្ភចំពោះព័តម៌ានទាក់ទង នឹងការទំលាក់គ្រាប់បែករបស់អ៊ីស្រាអែល ប៉ុន្តែមិនទាន់មានលទ្ធភាពស្វែងរកមើលថា តើហេតុការណ៍នេះពិតជាបានកើតមានឡើងមែន ឬយ៉ាងណានៅឡើយ។ ចំពោះហេតុការណ៍នេះ អ៊ីស្រាអែលបានបង្ហាញភាពស្ងៀមស្ងាត់ មិនបានបញ្ជាក់អ្វីជាផ្លូវការទេ។ ប្រភពព័តម៌ានមួយបានលេចលឺមក កាលពីថ្ងៃពុធថា យន្តហោះអ៊ីស្រាអែលបានវាយប្រហារលើក្បួនដឹកអាវុធមួយ ធ្វើដំណើរពីប្រទេសស៊ីរី ទៅកាន់ព្រំដែនប្រទេសលីបង់។ ប៉ុន្តែយោធាស៊ីរី បានបដិសេធព័តម៌ាននេះ។
ការគំរាមប្រកាស វាយតបតទៅវិញរបស់អាជ្ញាធរក្រុងដាម៉ាស ធ្វើឡើងចំពេលដែលប្រមុខការទូតចាស់របស់សហរដ្ឋអាមេរិក លោកស្រី Hillary Clinton បានចោទរុស្ស៊ី និងអ៊ីរ៉ង់ថាបានផ្តល់ជំនួយផ្នែកអាវុធដល់ប្រទេសស៊ីរី។ លើសពីនេះ អាមេរិកបានក្រើនរំលឹកក្រុងដាម៉ាស មិនអោយបង្កអស្ថិរភាពក្នុងតំបន់តទៅទៀត តាមរយៈការបញ្ជូនអាវុធ ទៅអោយក្រុម Hezbollah ដែលជាក្រុមអ៊ីស្លាមជ្រុលនិយមនៅលីបង់។
បន្ទាប់ពីរុស្ស៊ី ដែលជាប្រទេសលក់អាវុធសំខាន់ដល់របបប្រធានាធិបតី អាសាដ បានសន្យាផ្តន្ទាទោសអ៊ីស្រាអែល ប្រសិនហេតុការណ៍វាយប្រហារតាមយន្តហោះពិតជាបានកើតឡើងមែននោះ ប្រទេសអ៊ីរ៉ង់ សម្ព័ន្ធអារ៉ាប់ និងក្រុមអ៊ីស្លាមជ្រុលនិយម Hezbollah បានថ្កោលទោសអ៊ីស្រាអែល ថាបានឈ្លានពានបូរណភាពដែនដីស៊ីរី។ ក្រុងដាម៉ាសបានព្រមានរំលឹកក្រុង Tel Aviv អំពីផលវិបាក ដែលខ្លួននឹងត្រូវប្រឈមមុខ ដោយសារតែការវាយប្រហារនេះ។
ទន្ទឹមនឹងនេះ សម្ព័ន្ធអារ៉ាប់បានឆ្លៀតរិះគន់ ប្រធានាធិបតីស៊ីរី លោក អាសាដ ថាមិនបានធ្វើប្រតិកម្មប្រើយន្តហោះវាយតបតភ្លាមៗទៅវិញ ដើម្បីការពារដែនដីរបស់ខ្លួន ហើយបន្ថែមទៀតថា យន្តហោះរបស់លោក អាសាដ គឺប្រើសំរាប់តែបំផ្លាញវិហារ សាកលវិទ្យាល័យ និងជនស៊ីវិលតែប៉ុណ្ណោះ។
ជារៀងរាល់ថ្ងៃ មានមនុស្សប្រហែលជាង ១០នាក់ បានបាត់បង់ជីវិត ដោយសារតែការបាញ់ប្រហាររបស់យន្តហោះស៊ីរី។ យោងតាមអង្គការសហប្រជាជាតិ ជិតពីរឆ្នាំមកនេះ សង្គ្រាមនៅក្នុងប្រទេស បានសំលាប់មនុស្ស រហូតដល់ទៅជាងប្រាំមួយម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ