ក្រុមជ្រុលនិយមថៃផ្តើមធ្វើចលនានៅតាមព្រំដែន
ភ្លាមៗក្រោយពីនាយករដ្ឋមន្ត្រីកម្ពុជា ស្នើឲ្យកម្លាំងប្រដាប់អាវុធដែលឈរជើងតាមព្រំដែនប្រុងប្រយ័ត្ន ក្រុមប្រឆាំងជ្រុលនិយមថៃក៏បានផ្តើមធ្វើសកម្មភាព នៅតាមព្រំដែនមែន។ ពួកគេរាប់រយនាក់បានជួបជុំគ្នា នាចុងសប្តាហ៍នេះនៅក្នុងខេត្តក្បែរព្រំដែនកម្ពុជា ដើម្បីប្រឆាំងយុត្តាធិការរបស់តុលាការយុត្តិធម៌អន្តរជាតិក្រុងឡាអេ ស្តីពីបញ្ហាព្រះវិហារ។ ស្របពេលជាមួយគ្នានេះដែរ មានសេចក្តីរាយការណ៍ថារដ្ឋមន្ត្រីការពារជាតិកម្ពុជានិងថៃ គ្រោងជួបគ្នានៅសប្តាហ៍ក្រោយ ដើម្បីសម្រាលសភាពការណ៍ នៅមុនការបកស្រាយសាលក្រមរបស់តុលាការក្រុងឡាអេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ពួកជ្រុលនិយមថៃដែលស្ថិតក្នុងក្រុមអំណាចរបស់ទឹកដី និងក្រុមបណ្តាញការពារទឹកដីថៃបានប្រមូលផ្តុំគ្នានាចុងសប្តាហ៍នេះ នៅក្នុងបណ្តាខេត្តក្បែរព្រំដែនកម្ពុជា។ គោលបំណងរបស់ក្រុមនេះគឺធ្វើសកម្មភាពប្រឆាំងនឹងយុត្ថាធិការរបស់តុលាការក្រុងឡាអេ ស្តីពីបញ្ហាព្រះវិហារ។ ក្រុមអ្នកតវ៉ាទាំងនោះបានអះអាងថាសកម្មភាពរបស់ពួកគេ គឺដើម្បីការពារអធិបតេយ្យភាពរបស់ប្រទេសថៃ។ នេះបើយោងតាមសារព័ត៌មានថៃ ដែលបានផ្សាយឲ្យដឹងនៅថ្ងៃអាទិត្យនេះ។
ភាពរំជើបរំជួលនៅក្នុងប្រទេសថៃ បានផ្តើមកើតឡើងតាំងពីខែមករាមកម្ល៉េះ ខណៈដែលតុលាការយុត្តិធម៌អន្តរជាតិក្រុងឡាអេគ្រោងបកស្រាយឡើងវិញ នូវសាលក្រមឆ្នាំ ១៩៦២ ស្តីពីបញ្ហាព្រះវិហារ ទៅតាមសំណើរបស់ភាគីកម្ពុជា។ ទន្ទឹមនឹងសកម្មភាពផ្សេងៗជាច្រើន ក្រុមជ្រុលនិយមថៃទាំងនោះក៏បានដាក់សម្ពាធទៅលើរាជរដ្ឋាភិបាលក្រុងបាងកក ឲ្យបដិសេធការសម្រេចរបស់តុលាការអន្តរជាតិមួយនេះផងដែរ។ យ៉ាងណាក៏ដោយ ពួកគេមិនអាចរុលចូលមកជិតបន្ទាត់ព្រំដែនកម្ពុជាបានទេ ដោយសារការរារាំងរបស់ប៉ូលិសថៃ។
ទន្ទឹមនឹងនោះដែរ សារព័ត៌មានថៃក៏បានផ្សាយឲ្យដឹងថា រដ្ឋមន្ត្រីការពារជាតិប្រទេសទាំងពីរគឺ លោក ទៀ បាញ់ និងលោក ស៊ូគុមពល ស៊ូវ៉ាណាថាត មានគម្រោងជួបគ្នានៅសប្តាហ៍ក្រោយនេះនៅក្នុងខេត្តស៊ូរិន្ទរបស់ថៃ។ បណ្តាញសារព័ត៌មានថៃឲ្យដឹងទៀតថា ជំនួបដែលស្នើឡើងដោយភាគីថៃនេះមានគោលដៅសម្រាលស្ថានការណ៍តាមព្រំដែន នៅមុនការបកស្រាយសាលក្រមរបស់តុលាការក្រុងឡាអេ ដែលគ្រោងបើកធ្វើនៅពាក់កណ្តាលខែមេសាខាងមុខនេះ។
គ្មានប្រភពអះអាងពីក្រសួងការពារជាតិកម្ពុជាស្តីពីជំនួបនេះនៅឡើយទេ ប៉ុន្តែកាលពីថ្ងៃសុក្រ លោកនាយករដ្ឋមន្ត្រី ហ៊ុន សែន បានស្នើឲ្យកងកម្លាំងប្រដាប់អាវុធនៅតាមព្រំដែនព្រះវិហារ បង្កើនការប្រុងប្រយ័ត្នក្រែងមានសភាពការណ៍អាក្រក់ណាមួយ ដែលអាចកើតឡើងជាយថាហេតុដោយសារពួកជ្រុលនិយមថៃ។
ប្រមុខរាជដ្ឋាភិបាលកម្ពុជាបានបញ្ជាក់ថា ទោះបីជាទំនាក់ទំនងរវាងរាជរដ្ឋាភិបាលទាំងពីរមានការវិវឌ្ឍន៍ល្អក៏ដោយ ក៏កម្ពុជាគួរប្រុងប្រយ័ត្នចំពោះសកម្មភាពរបស់ពួកជ្រុលនិយមថៃ ដែលអាចបង្កបញ្ហាប៉ះពាល់ដល់បូរណភាពទឹកដីកម្ពុជា ក្នុងអំឡុងពេលដែលតុលាការក្រុងឡាអេបកស្រាយសាលក្រមស្តីពីបញ្ហាព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ