សាលាក្តីខ្មែរក្រហម៖ អង្គភាពបកប្រែ បន្ធូរលក្ខខណ្ឌ
ការិយាល័យរដ្ឋបាលនៃសាលាក្តីខ្មែរក្រហម និងអង្គភាពបកប្រែ បានជួបចរចារគ្នា នៅព្រឹកថ្ងៃអង្គារទី៥ មិនានេះ ដើម្បីបន្ធូរបន្ថយភាពតានតឹង ខណៈដែលក្រុមអ្នកបកប្រែកំពុងធ្វើពហិការមិនបំពេញការងារ។ អ្នកនាំពាក្យសាលាក្តីលោក នេត ភក្ត្រា បានប្រាប់អោយដឹងថា ក្រុមបុគ្គលិកអ្នកតវ៉ាបានសម្រួលការទាមទារប្រាក់បៀវត្សរ៍របស់ពួកគេ ទាំង៣ ខែ (ធ្នូ មករា កុម្ភៈ) មកនៅត្រឹមប្រាក់បៀវត្សរ៍ខែធ្នូសិន ជាថ្នូរនឹងការត្រឡប់ចូលបំពេញការងារជាធម្មតាវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅពេលនេះ ការិយាល័យរដ្ឋបាលគ្រាន់តែត្រូវប្រញាប់រកប្រាក់បៀវត្សរ៍ខែធ្នូ តែមួយខែសិន ដើម្បីផ្តល់អោយបុគ្គលិកផ្នែកជាតិ នៅសាលាក្តីខ្មែរក្រហម នោះសវនាការសំណុំរឿង០០២ និងការងារផ្សេងៗទៀត នឹងអាចដំណើរការឡើងវិញជាប្រក្រតី។ ពីព្រោះក្រុមអ្នកបកប្រែភាសាដែលបានចាប់ផ្តើមធ្វើកូដកម្ម កាលពីថ្ងៃចន្ទម្សិលមិញ ជាមួយនឹងការទាមទារប្រាក់បៀវត្សរ៍ទាំង៣ខែ ដែលពួកគេមិនទាន់បានទទួលនោះ បានយល់ព្រមទទួលប្រាក់បៀវត្សរ៍ខែធ្នូ មួយខែសិន ជាថ្នូរនឹងការត្រឡប់ចូលបំពេញការងារជាធម្មតាវិញ។
នេះជាដំណោះស្រាយមួយ ដែលត្រូវបានរកឃើញនៅក្នុងការចរចារគ្នារវាងលោកក្រាញ់ តូនី ប្រធានស្តីទីរដ្ឋបាលនៃសាលាក្តីខ្មែរក្រហម និងក្រុមអង្គភាពបកប្រែ នៅព្រឹកថ្ងៃអង្គារទី៥ មិនានេះ។
ទោះយ៉ាងណាក៏ដោយ បុគ្គលិកជាតិពិសេសអង្គភាពបកប្រែ នៅបន្តធ្វើពហិការមិនបំពេញការងារដដែល បើទោះជាពួកគេមានវត្តមាននៅសាលាក្តីក៏ដោយ រហូតដល់ពួកគេបានទទួលប្រាក់បៀវត្សរ៍ខែធ្នូសិន។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានអត្ថាធិប្បាយប្រាប់វិទ្យុបារាំងអន្តរជាតិថា នេះគឺជាការវិវត្តន៏ល្អបន្តិច។ ប៉ុន្តែក្រុមអ្នកតវ៉ាបានកំណត់លក្ខខណ្ឌមួយដែលថា ប្រសិនបើពួកគេនៅមិនទាន់បានទទួលប្រាក់បៀវត្សរ៍ខែមករា កុម្ភៈ និងមិនា រហូតដល់ថ្ងៃទី១ មេសានោះទេ ពួកគេនឹងចាប់ផ្តើមពហិការ មិនបំពេញការងារសារជាថ្មី។
បើតាមការបញ្ជាក់របស់អ្នកនាំពាក្យសាលាក្តីពិសេសមួយនេះ សាលាក្តីខ្មែរក្រហមកំពុងរង់ចាំថវិកាជំនួយរបស់សហភាពអឺរ៉ុប ដែលបានសន្យាផ្តល់ទឹកប្រាក់ទំហំ៣០ម៉ឺនដុល្លារ ដល់ភាគីជាតិដើម្បីដោះស្រាយបញ្ហាប្រាក់បៀវត្សរ៍បុគ្គលិកនេះ។ លោក នេត្រ ភក្ត្រា បានអំពាវនាវអោយសហភាពអឺរ៉ុបប្រញាប់អន្តរាគមទម្លាក់ថវិកាអោយបានលឿនបំផុត ដើម្បីធានាដំណើរការនៅក្នុងសាលាក្តី។
គួររម្លឹកថា អង្គភាពបកប្រែនៃសាលាក្តីខ្មែរក្រហមចំនួន២៧នាក់ បានផ្តើមធ្វើពហិការមិនបំពេញការងារ កាលពីថ្ងៃចន្ទម្សិលមិញ ដែលធ្វើអោយសវនាកាសំណុំរឿង០០២ដែលត្រូវធ្វើជា៣ភាសា ត្រូវផ្អាកភ្លាមៗ។ ពហិការនេះក៏ត្រូវបានគាំទ្រដោយស្ងាត់ស្ងៀម ពីបុគ្គលិកជាតិនៅផ្នែកផ្សេងទៀតផងដែរ។
បុគ្គលិកជាតិចំនួន២៨៧នាក់ នៅសាលាក្តីខ្មែរក្រហម មិនបានទទួលប្រាក់បៀវត្សរ៍៣ខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ