បុគ្គលិកជាតិផ្នែកបកប្រែពហិការមិនធ្វើការ សវនាការសាលាក្តីខ្មែរក្រហមត្រូវផ្អាក
អង្គភាពបកប្រែរបស់សាលាក្តីខ្មែរក្រហមបានប្រកាសធ្វើពហិការមិនចូលធ្វើការ ចាប់ពីព្រឹកថ្ងៃចន្ទនេះ ហើយបានធ្វើអោយសវនាការត្រូវរាំងស្ទះ ចាប់ពីថ្ងៃនេះទៅហើយ។ ក្រុមអ្នកបកប្រែបានថ្លែងថា ពួកគេនឹងចូលធ្វើការវិញ ល្គឹកណាពួកគេបានទទួលប្រាក់ខែ៣ខែ ដែលពួកគេមិនបានទទួលនោះ។ អ្នកនាំពាក្យសាលាក្តីខ្មែរក្រហម លោក នេត ភក្ត្រា បានប្រាប់អោយដឹងថា ការិយាល័យរដ្ឋបាលក៏នៅរង់ចាំថវិកាពីប្រទេសផ្តល់ជំនួយ ដើម្បីអាចផ្តល់ប្រាក់បៀវត្សរ៍ ដល់បុគ្គលិកផ្នែកជាតិជិត ៣០០នាក់នោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៦
ប្រសិនបើសវនាការសំណុំរឿង០០២ត្រូវបានផ្អាក នៅព្រឹកថ្ងៃចន្ទនេះ គឺមិនមែនតែដោយសារលោកអៀង សារី មានបញ្ហាសុខភាព ហើយត្រូវបានដឹកបញ្ជូនទៅសង្គ្រោះបន្ទាន់នៅមន្ទីរពេទ្យ ដូចរាល់ដងនោះឡើយ។ ម្តងនេះគឺជាបញ្ហាធ្ងន់ធ្ងរ។
សវនាកាដែលត្រូវប្រព្រិត្តទៅជា ៣ភាសា គឺ ខ្មែរ អង់គ្លេស និងបារាំងនោះ ត្រូវជាប់គាំងដោយសារតែអង្គភាពបកប្រែប្រកាសធ្វើពហិការមិនចូលធ្វើការងារ ក្រោយពីពួកគេមិនបានទទួលប្រាក់បៀវត្សរ៍៣ខែមកហើយ ពោលគឺចាប់ពីខែធ្នូមក។
សកម្មភាពពហិការរបស់អង្គភាពបកប្រែនៃសាលាក្តីខ្មែរក្រហម ត្រូវបានគាំទ្រដោយបុគ្គលិកជាតិនៅផ្នែកផ្សេងៗទៀតដែរ ដែលមានចំនួនសរុបទាំងអស់ ២៨៧នាក់។ យោងតាមញត្តិដែលអង្គភាពបកប្រែនៅសាលាក្តីខ្មែរក្រហមបានដាក់ទៅការិយាល័យរដ្ឋបាលនោះ មានមូលហេតុ២ ដែលធ្វើអោយពួកគេត្រូវធ្វើពហិការយ៉ាងនេះ។ ទីមួយ គឺការមិនបានទទួលប្រាក់ខែចំនួន៣ខែមកហើយ ជាការពិត ប៉ុន្តែមូលហេតុទី២ គឺដោយសារតែចាប់ពីដើមខែមករា ឆ្នាំ ២០១៣នេះ ពួកគេមិនមានកិច្ចសន្យាការងារថ្មីឡើយ។
នៅក្នុងញត្តិដដែលនោះ អង្គភាពបកប្រែនៃសាលាក្តីខ្មែរក្រហម អំពាវនាវអោយរាជរដ្ឋាភិបាល និងអង្គការសហប្រជាជាតិស្វែងរកវិធានការបន្ទាន់ ដើម្បីធានានិរន្តរភាពនៃដំណើរការសាលាក្តីពិសេសមួយនេះ។
អ្នកនាំពាក្យរបស់សាលាក្តីខ្មែរក្រហម លោក នេត ភក្ត្រា បានថ្លែងប្រាប់វិទ្យុបារាំងអន្តរជាតិថា ការិយាល័យរដ្ឋបាលកំពុងរកដំណោះស្រាយចំពោះបញ្ហានេះ ប៉ុន្តែថាវាក៏អាស្រ័យលើប្រទេសអ្នកចាប់អារម្មណ៍ជួយសាលាក្តីខ្មែរក្រហមដែរ ដែលត្រូវផ្តល់ជំនួយហិរញ្ញវត្ថុ។
ស្ថានទូតបារាំងបានបដិសេធមិនធ្វើអត្ថាធិប្បាយលើព្រឹត្តិការណ៍ពហិការរបស់បុគ្គលិកផ្នែកជាតិ នៅសាលាក្តីខ្មែរក្រហមនេះឡើយ។ ប៉ុន្តែអ្នកនាំពាក្យស្ថានទូតអាមេរិកប្រចាំកម្ពុជា លោក Sean McIntoshបានប្រាប់វិទ្យុបារាំងអន្តរជាតិថា សហរដ្ឋអាមេរិកមានការព្រួយបារម្ភអំពីវិបត្តិជំនួយហិរញ្ញវត្ថុ ចំពោះសាលាក្តីខ្មែរក្រហមនេះ។ ជាមួយនឹងការជំរុញអោយគ្រប់ភាគីទាំងអស់ខិតខំបំពេញកាត្វកិច្ចរបស់ខ្លួន ដើម្បីដំណើរការស្វែងរកយុត្តិធម៌របស់សាលាក្តីខ្មែរក្រហមនេះ អ្នកនាំពាក្យសហរដ្ឋអាមេរិកបានបញ្ជាក់ថា ក្រោមកិច្ចព្រមព្រៀងស្តីពីការបង្កើតតុលាការខ្មែរក្រហម រាជរដ្ឋាភិបាលកម្ពុជាត្រូវទទួលខុសត្រូវចំពោះការផ្តល់ប្រាក់ខែ ដល់បុគ្គលិកផ្នែកជាតិ។ ហើយលោកលើកទឹកចិត្តអោយរាជរដ្ឋាភិបាលកម្ពុជាបំពេញកាត្វកិច្ចនេះ។
លោក នេត ភក្ត្រា អ្នកនាំពាក្យសាលាក្តីខ្មែរក្រហមបានពន្យល់បកវិញថា កិច្ចព្រមព្រៀងស្តីពីការបង្កើតតុលាការខ្មែរក្រហមនេះក៏បានចែងថា អង្គការសហប្រជាជាតិត្រូវមានការទទួលខុសត្រូវផ្តល់ថវិកាដល់ភាគីអន្តរជាតិដែរ។ ប៉ុន្តែ ជាក់ស្តែង វាមិនបានកើតឡើងយ៉ាងដូច្នេះឡើយ។ លោកបន្តថា កន្លងមក គឺទាំងភាគីជាតនិងភាគីអន្តរជាតិ តែងតែបានទទួល និងប្រើប្រាស់ហិរញ្ញវត្ថុរបស់ប្រទេសផ្តល់ជំនួយដូចគ្នា។
នៅតែគ្មានចំលើយអំពីប្រាក់បៀវត្សរ៍របស់បុគ្គលិកជាតិ នៅសាលាក្តីខ្មែរក្រហមដដែល។ ប៉ុន្តែ នៅក្នុងញត្តិរបស់អង្គភាពបកប្រែ ដែលដាក់ទៅការិយាល័យរដ្ឋបាលរបស់សាលាក្តីខ្មែរក្រហមនោះ ក្រុមអង្គភាពអ្នកបកប្រែបានសរសេរថា ការដែលពួកគេអត់បានប្រាក់បៀវត្សរ៍ តើមកពីអង្គការសហប្រជាជាតិ ឬក៏មកពីរាជរដ្ឋាភិបាលកម្ពុជា ឬក៏មកពីថ្នាក់ដឹកនាំតុលាការ? ហេតុអ្វីក៏ម្ចាស់ជំនួយផ្ដល់ថវិកាឲ្យតែបុគ្គលិកអន្តរជាតិ? ហេតុអ្វីបានជាគេឈប់ជួយបុគ្គលិកជាតិតទៅទៀត?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ