នួន ជា និងអៀង សារី នឹងទទួលការត្រួតពិនិត្យកាយសម្បទាពីអ្នកជំនាញ
សាលាក្តីខ្មែរក្រហមបានចាត់តាំងគ្រូពេទ្យជំនាញ ៣រូប ដើម្បីវាយតម្លៃអំពីកាយសម្បទារបស់ នួន ជា និង អៀង សារី ដែលកំពុងមានបញ្ហាសុខភាពធ្ងន់ធ្ងរ។ ក្រុមអ្នកជំនាញនឹងផ្តើមពិនិត្យ និងតាមដានសុខភាពនិងបញ្ញាស្មារតីរបស់ជនជាប់ចោទទាំងពីរ ចាប់ពីពាក់កណ្តាលខែ មីនា ខាងមុខនេះហើយ។ មានការព្រួយបារម្ភថា អ្នកទាំងពីរអាចនឹងមានវាសនាដូចលោកស្រី អៀង ធីរិទ្ធដែរ។ យ៉ាងណាក៏ដោយ សវនាកាលើសំណុំរឿង ០០២ នឹងបើកធ្វើឡើងវិញចាប់ពីដើមសប្តាហ៍ក្រោយ ក្រោមសម្ពាធនៃវិបត្តិថវិកា។
ចុះផ្សាយនៅថ្ងៃ៖
ស្តាប់ - ០២:២២
ជនជាប់ចោទក្នុងសំណុំរឿង ០០២ ចំនួនពីរនាក់ទៀតហើយដែលត្រូវតុលាការដាក់ឲ្យស្ថិតក្រោមការត្រួតពិនិត្យផ្នែកកាយសម្បទា ពីសំណាក់គ្រូពេទ្យជំនាញ។ ការត្រួតពិនិត្យនេះធ្វើឡើងដើម្បីវាយតម្លៃថា តើលោក នួន ជា អាយុ ៨៦ឆ្នាំ និងលោក អៀង សារី អាយុ ៨៧ ឆ្នាំ នៅមានបញ្ញាស្មារតីគ្រប់គ្រាន់អាចចូលរួមសវនាកាបន្តទៀតបានដែរឬទេ?
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា គ្រូពេទ្យជំនាញ៣រូប ត្រូវបានចាត់តាំងដោយសាលាក្តីដើម្បីបំពេញកិច្ចការនេះ។ អ្នកជំនាញទាំងបីនាក់រួមមានជនជាតិខ្មែរម្នាក់ អង់គ្លេសម្នាក់ រួមទាំងលោក ចន ខែមប៊ែល ជនជាតិនូវែលហ្សេឡង់ដែលជាអ្នកជំនាញត្រួតពិនិត្យកាយសម្បទារបស់លោកស្រី អៀង ធីរិទ្ធ ផងដែរ។ អ្នកជំនាញទាំងបីនឹងផ្តើមការងាររបស់ខ្លួននៅពាក់កណ្តាលខែមីនានេះ។
ការដាក់ឲ្យជនជាប់ចោទទាំងពីរស្ថិតក្រោមការត្រួតពិនិត្យផ្នែកកាយសម្បទា បានធ្វើឡើងទៅតាមសំណើរបស់មេធាវីការពារក្តីឲ្យជនជាប់ចោទ បន្ទាប់ពីពួកគេសង្កេតឃើញថា កូនក្តីរបស់ខ្លួនមានបញ្ហាសុខភាពធ្ងន់ធ្ងរ និងចុះខ្សោយខាងបញ្ញាស្មារតីយ៉ាងខ្លាំង។ តុលាការគ្រោងបើកសវនាកា ដើម្បីស្តាប់របាយការណ៍អ្នកជំនាញទាំងបី នាចុងខែមីនានេះ។ នេះបើយោងតាមអ្នកនាំពាក្យសាលាក្តីខ្មែរក្រហម។
ព្រឹត្តិការណ៍នេះនាំឲ្យមានការព្រួយបារម្ភជាថ្មីទៀតថា នួន ជា និង អៀង សារី អាចនឹងត្រូវបានដោះលែងដូចលោកស្រី អៀង ធីរិទ្ធិ ដែរ ប្រសិនបើពួកគេបាត់ការចងចាំធ្ងន់ធ្ងរមិនអាចទទួលការកាត់ទោសបាន។ យ៉ាងណាក៏ដោយ សវនាកាសំណុំរឿង ០០២ដែលបានផ្អាកដំណើរការមួយរយៈមកនោះ នឹងត្រូវបើកធ្វើឡើងវិញ នៅថ្ងៃចន្ទដើមសប្តាហ៍ក្រោយនេះ។
សាក្សីជំនាញពីររូបគឺ លោក Phillip Short អ្នកសរសេរសៀវភៅប្រវត្តិសាស្ត្រនៃរបបកម្ពុជាប្រជាធិបតេយ្យ និងលោកស្រី Elizabeth Becker អ្នកកាសែតជនជាតិអាមេរិកាំង នឹងត្រូវឡើងធ្វើសក្ខីកម្មជាបន្តបន្ទាប់ នៅក្នុងសវនាកាដែលមានតែលោក ខៀវ សំផន ម្នាក់ប៉ុណ្ណោះអាចមានវត្តមានដោយផ្ទាល់។ ដោយឡែក នួន ជា និង អៀង សារី បានត្រឹមស្តាប់សវនាកាពីចម្ងាយតែប៉ុណ្ណោះ ដោយសារបញ្ហាសុខភាព។
ការដាក់ជនជាប់ចោទទាំងពីរឲ្យស្ថិតក្រោមការវាយតម្លៃផ្នែកកាយសម្បទា បានកើតឡើងខណៈបុគ្គលិកភាគីកម្ពុជានៃសាលាក្តីខ្មែរក្រហមកំពុងរងសម្ពាធកាន់តែខ្លាំង ពីបញ្ហាប្រាក់ខែ។ ពួកគេមិនបានបើកប្រាក់ខែរយៈពេលបីខែមកហើយ ដោយសារតែខ្វះថវិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ