សហចៅក្រមស៊ើបអង្កតខ្វែងគំនិតគ្នាទៀតក្នុងសំណុំរឿង០០៣
ការិយាល័យសហចៅក្រមស៊ើបអង្កេតនៃសាលាក្តីខ្មែរក្រហមបានចេញផ្សាយសេចក្តីប្រកាសព័ត៌មានដែលបង្ហាញអំពីការខ្វែងគំនិតគ្នានៅក្នុងដំណើរការស៊ើបអង្កេតសំណុំរឿង០០៣។ សហចៅក្រមស៊ើបអង្កេតជាតិ បានប្រកាសបិទការស៊ើបសួរក្នុងសំណុំរឿង០០៣ហើយ ប៉ុន្តែសហចៅក្រមស៊ើបអង្កេតអន្តរជាតិថ្លែងថា លោកនៅបន្តការស៊ើបអង្កេតនេះទៀត ហើយក៏បានប្រកាសទទួលយកអ្នកចូលរួមជាសាក្សី និងអ្នកប្តឹងផងដែរ ដោយលោកបានបង្ហាញទីតាំងឧក្រិដ្ឋកម្មដែលទាក់ទងនឹងសំណុំរឿង០០៣នេះ។ ទន្ទឹមគ្នានេះដែរ អង់គ្លេសបានប្រកាសសន្យាផ្តល់ថវិកា២លាន២សែនដុល្លារដល់ភាគីអន្តរជាតិនៃសាលាក្តីខ្មែរក្រហមផងដែរ។
ចុះផ្សាយនៅថ្ងៃ៖
ស្តាប់ - ០២:២៣
ភាពខ្វែងគំនិតគ្នាក្នុងសំណុំរឿង០០៣ដ៏ចម្រូងចម្រាស រវាងសហចៅក្រមស៊ើបអង្កេតជាតិ និងសហចៅក្រមស៊ើបអង្កេតអន្តរជាតិនៅសាលាក្តីខ្មែរក្រហម ត្រូវបានបង្ហាញអោយឃើញសាជាថ្មីទៀត តាមរយៈសេចក្តីប្រកាសព័ត៌មានមួយនៅថ្ងៃនេះ។ ខណៈដែលលោកយូ ប៊ុនឡេង សហចៅក្រមស៊ើបអង្កេតជាតិបានប្រកាសថា លោកបានបិទការស៊ើបសួរក្នុងសំណុំរឿង០០៣ហើយ តាំងពីខែមេសាឆ្នាំ២០១១ ជាមួយសហចៅក្រមស៊ើបអង្កេតអន្តរជាតិ Siegfried Blunk នោះ សហចៅក្រមស៊ើបអង្កេតអន្តរជាតិថ្មី លោកMark B. Harmon បានប្រកាសថា លោកនៅបន្តបើកការស៊ើបអង្កេតក្នុងសំណុំរឿង០០៣នេះបន្តទៀត។
សហចៅក្រមស៊ើបអង្កេតអន្តរជាតិថែមទាំងប្រកាសស្វែងរកការចូលរួមពីអ្នកដែលអាចពាក់ព័ន្ធជាសាក្សី ជាដើមបណ្តឹងរដ្ឋប្បវេណីទៀតផង ដោយបានបង្ហាញទីតាំងឧក្រិដ្ឋកម្មក្នុងសំណុំរឿង០០៣នេះ។
យោងតាមសេចក្តីប្រកាសព័ត៌មានរបស់សហចៅក្រមស៊ើបអង្កេតអន្តរជាតិ ទីតាំងឧក្រិដ្ឋកម្មក្នុងសំណុំរឿង០០៣មានដូចជា មន្ទីរសន្តិសុខ ស ២១ ការដ្ឋានវាយថ្មស្ទឹងហាវនៅខេត្តកំពង់សោម ការដ្ឋានសាងសង់ព្រលានយន្តហោះកំពង់ឆ្នាំង ទីតាំងសម្លាប់ស្ទឹងតូចក្នុងស្រុកពញាក្រែក ខេត្តកំពង់ចាម ចំការធូរ៉េន ក្នុងភូមិរាមខេត្តកំពង់សោម ជាដើម។ សហចៅក្រមស៊ើបអង្កេតអន្តរជាតិបានអំពាវនាវរកជនណាដែលបានដឹងឮ អំពីការប្រព្រឹត្តិឧក្រិដ្ឋកម្មនៅលើទីតាំងដែលត្រូវបានបង្ហាញជាសាធារណៈនោះ។
លោកនេត ភក្ត្រា អ្នកនាំពាក្យសាលាក្តីខ្មែរក្រហមបានពន្យល់ថា ការខ្វែងគំនិតគ្នានៅក្នុងការអនុវត្តនីតិវិធីនៃវិធានផ្ទៃក្នុងយ៉ាងនេះគឺជាការធម្មតានោះទេ ហើយថា ក្រុមអ្នកច្បាប់នឹងអាចរកដំណោះស្រាយទៅតាមវិធានផ្ទៃក្នុងនេះវិញ។
សំណុំរឿង០០៣ ជាសំណុំរឿងដ៏ចម្រូងចម្រាសខ្លាំង រវាងរដ្ឋាភិបាលកម្ពុជា និងអង្គការសហប្រជាជាតិ ដែលជាភាគីបង្កើតតុលាការពិសេសកូនកាត់នេះ។ រដ្ឋាភិបាលកម្ពុជាបានប្រកាសមិនចង់ឃើញការកាត់ទោសលើសពីសំណុំរឿង០០២នៅក្នុងសាលាក្តីដែលកំពុងជួបប្រទះវិបត្តិហិរញ្ញវត្ថុនេះឡើយ។
នៅក្នុងតុលាការកូនកាត់នេះ បុគ្គលិកភាគីជាតិមិនបានទទួលប្រាក់ខែពួកគេ៣ខែមកហើយ ខណៈប្រទេសចាប់អារម្មណ៍លើសាលាក្តីនេះមួយចំនួននៅបន្តសន្យាផ្តល់ហិរញ្ញវត្ថុអោយតែភាគីអន្តរជាតិ។
ចុងក្រោយនេះ រដ្ឋាភិបាលអង់គ្លេសបានសន្យាផ្តល់ថវិកា២លាន២សែនដុល្លារដល់ភាគីអន្តរជាតិ។
អ្នកនាំពាក្យសាលាក្តីខ្មែរក្រហមបានថ្លែងថា សហភាពអឺរ៉ុបកំពុងស្វែករកថវិកាទំហំ៣០ម៉ឺនដុល្លារ ដើម្បីផ្តល់អោយភាគីជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ