ប្រធានាធិបតីអ៊ីរ៉ង់បានការគាំទ្រពីអាមេរិកឡាទីន ប្រឆាំងដាច់ខាតនឹងសម្ពាធអន្តរជាតិ
លោក ម៉ាម៉ូត អាម៉ាតឌីនិនចាត ប្រធានាធិបតីអ៊ីរ៉ង់ ទើបបានបញ្ចប់ទស្សនកិច្ចមួយជុំនៅទ្វីបអាមេរិកឡាទីន ល្ងាចថ្ងៃព្រហស្បតិ៍ ទី ១២ មករា ២០១២ ប្រកបដោយជោគជ័យ ដូចការគ្រោងទុក។ ប្រទេសវ៉េណេស៊ុយអេឡា នីការ៉ាហ្គា គុយបា និងប្រទេសអេក្វាទ័រ សុទ្ធតែបានសម្តែងការគាំទ្រកម្មវិធីនុយក្លេអ៊ែរអ៊ីរ៉ង់។ ដោយបានបង្អែកពីសម្ព័ន្ធមិត្ត ប្រធានាធិបតីអ៊ីរ៉ង់ បានប្រកាសថានឹងតស៊ូ ជានិច្ច ប្រឈមទល់នឹងសម្ពាធរបស់បស្ចិមលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
សំណុំរឿងនុយក្លេអ៊ែរអ៊ីរ៉ង់ គឺជាលេសនយោបាយរបស់បស្ចិមលោក និងជាការម៉ាក់ងាយប្រទេស ព្រមទាំងប្រជាជនអ៊ីរ៉ង់ ! ដូច្នេះវាច្បាស់ណាស់ដែលថាអ៊ីរ៉ង់ត្រូវតែងើបឡើងតស៊ូប្រឆាំងដាច់ខាតនឹងសម្ពាធរបស់លោកខាងលិច ! នេះជាប្រសាសន៍របស់លោកម៉ាមូតអាម៉ាឌីនិនចាត ក្នុងសន្និសីទកាសែត ទីក្រុងគីតូ ប្រទេសអេក្វាទ័រ ដំណាក់កាលចុងក្រោយនៃដំណើរទស្សនកិច្ចនៅអាមេរិកឡាទីន។
ទស្សនកិច្ចមួយជុំនៅតាមបណ្តាប្រទេស វ៉េណេស៊ុយអេឡា នីការ៉ាហ្គា គុយបា និង អេក្វាទ័រ ប្រទេសប្រឆាំងនឹងសហរដ្ឋអាមេរិក ដែលប្រព្រឹត្តទៅក្នុងបរិបទតឹងតែងបំផុតរវាងអ៊ីរ៉ង់និងបស្ចិមលោក បានទទួលលទ្ធផលគួរទីមោទនៈបំផុតសម្រាប់លោកម៉ាមូត អាម៉ាឌីនិនចាត។
វ៉េណេស៊ុយអេឡា បានបង្ហាញពីសាមគ្គីភាពជាមួយអ៊ីរ៉ង់ ដោយប្រកាសបន្តចាប់ដៃគ្នាប្រយុទ្ធប្រឆាំងនឹងនយោបាយចក្រពត្តិនិយមដែលចង់គ្រប់គ្រងពិភពលោកម្នាក់ឯងរបស់អាមេរិក។ សម្រាប់ប្រទេស នីការ៉ាហ្គា និងគុយបា ការអភិវឌ្ឍន៍ថាមពលនុយក្លេអ៊ែរស៊ីវិល គឺសិទ្ធិរបស់អ៊ីរ៉ង់ ស្របតាមច្បាប់អន្តរជាតិ។ លើសពីនេះទៅទៀត ប្រមុខដឹកនាំប្រទេសអេក្វាទ័រ បានស្នើសុំទីភ្នាក់ងារថាមពលបរមាណូអន្តរជាតិសើរើរក្បួនវាយតម្លៃ កម្មវិធីនុយក្លេអ៊ែរ។ អេក្វាទ័រមិនជឿលើរបាយការណ៍របស់ AIEA កាលពីដើមសប្តាហ៍ដែលថាអ៊ីរ៉ង់កំពុងប៉ុនប៉ងផលិតអាវុធនុយក្លេអ៊ែរនោះទេ ព្រោះរបាយការណ៍នោះផ្អែកលើប្រភពព័ត៌មានមិនច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ