សាលាក្តីខ្មែរក្រហមរកវិធីបង្កើនល្បឿនសវនាការសំណុំរឿង ០០២
បញ្ហាសុខភាពរបស់ជនជាប់ចោទដែលកាន់តែដុនដាបទៅៗ បានជំរុញឲ្យសាលាក្តីខ្មែរក្រហមពិភាក្សាឡើងវិញជាបន្ទាន់អំពីការបង្កើនល្បឿននៃសវនាការសំណុំរឿង ០០២ ឲ្យបានលឿនបំផុតតាមដែលអាចធ្វើទៅបាន។ ខុសពីការគ្រោងទុក សវនាការនៅដើមសប្តាហ៍ក្រោយនេះ មិនមែនជាការបន្តស្តាប់សក្ខីកម្មរបស់សាក្សីទេ តែគឺជាសវនាការពិសេសមួយដើម្បីរកវិធីជំរុញសវនាការឲ្យបានលឿន និងមានប្រសិទ្ធភាពបំផុត។ ការប្រែប្រួលនេះបានកើតឡើង ខណៈដែល នួន ជា កំពុងបន្តសម្រាកក្នុងមន្ទីរពេទ្យនៅឡើយ។
ចុះផ្សាយនៅថ្ងៃ៖
ស្តាប់ - ០២:១៩
សុខភាពរបស់ជនជាប់ចោទបានធ្វើឲ្យមានក្តីបារម្ភកាន់តែខ្លាំងឡើងហើយសម្រាប់សាលាក្តីខ្មែរក្រហម។ ភាគីពាក់ព័ន្ធទាំងឡាយមានដូចជាព្រះរាជអាជ្ញា ដើមបណ្តឹងរដ្ឋប្បវេណី និងមេធាវីការពារក្តីនឹងត្រូវពិភាក្សាគ្នាក្នុងសវនាការពិសេសមួយនៅថ្ងៃចន្ទ និងថ្ងៃអង្គារដើមសប្តាហ៍ក្រោយនេះ ដើម្បីរិះរកវិធីពន្លឿនសវនាការឲ្យឆាប់ចប់តាមដែលអាចធ្វើទៅបាន។ នេះបើយោងតាមសេចក្តីជូនដំណឹងរបស់សាលាក្តីខ្មែរក្រហមនៅថ្ងៃសុក្រម្សិលមិញ។ លោកនេត្រ ភក្ត្រា អ្នកនាំពាក្យសាលាក្តីបានប្រាប់វិទ្យុបារាំងអន្តរជាតិនៅថ្ងៃនេះថា បន្ទាប់ពីស្តាប់មតិយោបល់របស់គ្រប់ភាគីពាក់ព័ន្ធរួច អង្គជំនុំជម្រះសាលាដំបូងនឹងសម្រេចជាថ្មីនូវនីតិវីធីណាមួយដែលអាចឲ្យសវនាការសំណុំរឿង ០០២ ប្រព្រឹត្តទៅបានលឿន និងមានប្រសិទ្ធភាពបំផុត។
សូមបញ្ជាក់ថា កន្លងទៅនេះ អង្គជំនុំជម្រះសាលាដំបូងធ្លាប់បានសម្រេចបំបែកសំណុំរឿង ០០២ ជាផ្នែកតូចៗដោយសង្ឃឹមថា វិធីនេះអាចនឹងពន្លឿនការចេញសាលក្រមទៅតាមផ្នែកនៅមួយៗឲ្យបានឆាប់។ ជាក់ស្តែង ផ្នែកទី១ដែលកំពុងតែដំណើរការសវនាការ គឺផ្តោតតែទៅលើការជម្លៀសប្រជាជន និងឧក្រិដ្ឋកម្មប្រឆាំងមនុស្សជាតិតែប៉ុណ្ណោះ។ ចំណែកផ្នែកទី២ ផ្តោតទៅលើឧក្រិដ្ឋកម្មសង្គ្រាម និងផ្នែកទី៣ ផ្តោតទៅលើឧក្រិដ្ឋកម្មប្រល័យពូជសាសន៍។
ប៉ុន្តែ បន្ទាប់ពីដំណើរការបានជាង៥ខែមក អង្គជំនុំជម្រះតុលាការកំពូលបានសម្រេចកាលពីសប្តាហ៍មុនថា ការបំបែកសំណុំរឿង ០០២ ជាផ្នែកតូចៗនេះ គ្មានសុពលភាពទេ ហើយបានសុំឲ្យសាលាដំបូងពិនិត្យឡើងវិញនូវនីតិវិធីរបស់ខ្លួន និងពិគ្រោះយោបល់ឲ្យបានគ្រប់គ្រាន់។ ម្យ៉ាងទៀត ការពិនិត្យនីតិវិធីនៃសវនាការរបស់ខ្លួនឡើងវិញនេះក៏ដើម្បីពន្លឿនសវនាការផងដែរ។
បច្ចុប្បន្ននេះ ជនជាប់ចោទទាំងបីកំពុងតែមានវ័យចាស់ជរា និងមានបញ្ហាសុខភាពរៀងៗខ្លួន។ រហូតមកទល់ថ្ងៃនេះ នួន ជា អតីតបងធំទី២នៃរបបខ្មែរក្រហមអាយុ ៨៦ឆ្នាំ កំពុងស្ថិតក្នុងមន្ទីរពេទ្យនៅឡើយ ខណៈដែលខៀវ សំផន អតីតប្រមុខរដ្ឋអាយុ ៨២ឆ្នាំបានបោះបង់សិទ្ធិចូលសវនាការ រីឯអៀង សារី អតីតរដ្ឋមន្ត្រីការបរទេសខ្មែរក្រហមអាយុ ៨៧ឆ្នាំ ក៏ទើបតែចេញពីមន្ទីរពេទ្យដែរ។ ស្ថានភាពបែបនេះហើយដែលតម្រូវឲ្យសាលាក្តីពិនិត្យឡើងវិញជាបន្ទាន់នូវនីតិវិធីរបស់ខ្លួនដើម្បីជំរុញល្បឿនសវនាការបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ