លោកអូបាម៉ាចុះហត្ថលេខាលើច្បាប់ដាក់ទណ្ឌកម្មលើវិស័យប្រេងកាតអ៊ីរ៉ង់
នៅថ្ងៃសៅរ៍ ម្សិលមិញនេះ លោកអូបាម៉ាបានចុះហត្ថលេខាប្រកាសឲ្យប្រើច្បាប់ ស្តីពីការដាក់ទណ្ឌកម្មលើវិស័យប្រេងកាតរបស់អ៊ីរ៉ង់ ពោលគឺ នៅចំថ្ងៃ ដែលអ៊ីរ៉ង់ប្រកាសពន្យារពេលការបាញ់សាកល្បងមីស៊ីល និងចង់ឲ្យមានការចរចាលើសំណុំរឿងនុយក្លេអ៊ែរ។ ក្នុងពេលជាមួយគ្នានេះ អាមេរិកក៏កំពុងតែពង្រឹងកម្លាំងទ័ពនៃប្រទេសជាសម្ព័ន្ធមិត្តក្នុងតំបន់ឈូងសមុទ្រពែរ្សផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
អ៊ីរ៉ង់បានប្រកាសផ្អាកការបាញ់សាកល្បងមីស៊ីលរយៈចម្ងាយឆ្ងាយ ដែលគ្រោងធ្វើ កាលពីថ្ងៃសៅរ៍ ម្សិលមិញ ហើយបានប្រកាសថា អ៊ីរ៉ង់ត្រៀមខ្លួនបើកការចរចាឡើងវិញ ជាមួយប្រទេសមហាអំណាច ជុំវិញសំណុំរឿងនុយក្លេអ៊ែរអ៊ីរ៉ង់។
ក៏ប៉ុន្តែ កាយវិការទាំងនេះមិនបានធ្វើឲ្យអាមេរិកប្តូរចិត្តក្នុងការបន្ថែមទណ្ឌកម្មលើអ៊ីរ៉ង់នោះទេ។ ទណ្ឌកម្ម ដែលលោកអូបាម៉ាចុះហត្ថលេខា កាលពីម្សិលមិញនេះ គឺសំដៅទៅលើដង្ហើមសេដ្ឋកិច្ចរបស់អ៊ីរ៉ង់ គឺវិស័យប្រេងកាត។ សហភាពអឺរ៉ុបក៏កំពុងពិចារណាអំពីការដាក់ទណ្ឌកម្មលើវិស័យប្រេងកាតរបស់អ៊ីរ៉ង់នេះដែរ។ ការប្រជុំ ដើម្បីអនុម័តទណ្ឌកម្មនេះ គ្រោងនឹងបើកធ្វើ នៅចុងខែមករាខាងមុខ។
ប្រឈមមុខនឹងទណ្ឌកម្មនេះ អ៊ីរ៉ង់ ដែលជាប្រទេសនាំចេញប្រេងកាត លំដាប់ទី៤ នៅលើពិភពលោក ព្រមានផងថា ទណ្ឌកម្មលើវិស័យប្រេងកាតរបស់អ៊ីរ៉ង់ អាចនឹងធ្វើឲ្យតម្លៃប្រេងឆៅ នៅលើទីផ្សារអន្តរជាតិ កើនឡើងរហូតដល់ ២០០ដុល្លារ ក្នុងមួយធុង។ អ៊ីរ៉ង់ក៏បានគំរាមផងដែរថា នឹងបិទច្រកសមុទ្រ Ormuz ដែលជាផ្លូវដឹកជញ្ជូនប្រេងដ៏សំខាន់ តភ្ជាប់ តំបន់ឈូងសមុទ្រពែរ្ស ទៅមហាសមុទ្រឥណ្ឌា។
ក្រៅពីបានព្រមានអ៊ីរ៉ង់ ជុំវិញការបិទច្រកសមុទ្រនេះ អាមេរិកក៏បានប្រកាសផងដែរ អំពីការលក់គ្រឿងសព្វាវុធយ៉ាងច្រើនសន្ធឹកសន្ធាប់ ទៅឲ្យប្រទេសសម្ព័ន្ធមិត្ត នៅក្នុងតំបន់ឈូងសមុទ្រពែរក្ស។ ក្រសួងការពារជាតិអាមេរិកបានឲ្យដឹងថា កាលពីថ្ងៃទី២៤ ធ្នូ អាមេរិកបានចុះហត្ថលេខាលើកិច្ចសន្យាលក់យន្តហោះចម្បាំង ចំនួន ៨៤គ្រឿង ទៅឲ្យអារ៉ាប៊ីសាអ៊ូឌីត។ មួយថ្ងៃក្រោយមក កិច្ចសន្យាមួយទៀតត្រូវបានចុះជាមួយប្រទេសអារ៉ាប់រួម ជុំវិញការលក់ប្រព័ន្ធខែលការពារមីស៊ីល។ មីស៊ីលប្រឆាំងមីស៊ីល ចំនួនជាង២០០ដើម ក៏ត្រូវបានអាមេរិកលក់ទៅឲ្យប្រទេសកូវ៉ែតដែរ កាលពីដើមឆ្នាំ២០១១។
គួរបញ្ជាក់ថា ប្រទេសនៅក្នុងតំបន់ឈូងសមុទ្រពែរ្ស៍ រួមមាន អារ៉ាប៊ីសាអ៊ូឌីត អារ៉ាប់រួម កាតា បារ៉ែន កូវ៉ែត ជាដើម ថ្វីដ្បិតតែជាប្រទេសអ៊ីស្លាមដូចគ្នា ប៉ុន្តែ គឺជាគូប្រជែងដ៏ស្រួចស្រាល់របស់អ៊ីរ៉ង់។ ការណ៍ដែលអាមេរិកលក់គ្រឿងសព្វាវុធក្នុងទឹកប្រាក់ដ៏ច្រើនសន្ធឹកសន្ធាប់ ទៅឲ្យប្រទេសទាំងនេះ គឺជាការគូសបញ្ជាក់កាន់តែច្បាស់ថែមទៀត អំពីភាពតានតឹងជុំវិញសំណុំរឿងនុយក្លេអ៊ែរអ៊ីរ៉ង់។
បើទោះជាមានកិច្ចខិតខំប្រឹងប្រែងផ្នែកការទូត ក៏ប៉ុន្តែ អាមេរិក និងអ៊ីស្រាអែល នៅតែប្រកាន់ជំហរថា ការប្រើកម្លាំងយោធាវាយប្រហារលើទីតាំងនុយក្លេអ៊ែរអ៊ីរ៉ង់ គឺជាជម្រើសមួយ ដើម្បីរារាំងអ៊ីរ៉ង់កុំឲ្យផលិតអាវុធនុយក្លេអ៊ែរ។ អារ៉ាប៊ីសាអ៊ូឌីតធ្លាប់បានព្រលយពាក្យថា ប្រសិនបើគេមិនអាចទប់ស្កាត់អ៊ីរ៉ង់ ក្នុងការផលិតអាវុធនុយក្លេអ៊ែរបានទេនោះ អារ៉ាប៊ីសាអ៊ូឌីតក៏នឹងចាប់ផ្តើមផលិតអាវុធនុយក្លេអ៊ែរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ