អ៊ីរ៉ង់បាញ់សាកល្បងមីស៊ីលរយៈចម្ងាយឆ្ងាយនៅឈូងសមុទ្រពែរ្ស
នៅថ្ងៃសៅរ៍នេះ អ៊ីរ៉ង់បានបន្តបង្ហាញសាច់ដុំរបស់ខ្លួនជាបន្តទៀត ដោយបានបាញ់សាកល្បងមីស៊ីលរយៈចម្ងាយឆ្ងាយជាច្រើនគ្រាប់ នៅក្នុងឈូងសមុទ្រពែរ្ស។ ការបាញ់សាកល្បងមីស៊ីលនេះបានធ្វើឡើង តែប៉ុន្មានថ្ងៃប៉ុណ្ណោះ ក្រោយពីអ៊ីរ៉ង់បានគំរាមបិទច្រកសមុទ្រ Ormuz ដែលជាផ្លូវដឹកជញ្ជូនប្រេងដ៏សំខាន់។ មន្រ្តីយោធាអាមេរិកធ្លាប់បានព្រមានថានឹងមិនបណ្តោយឲ្យអ៊ីរ៉ង់បិទច្រកសមុទ្រនេះបានតាមចិត្តទេ។
ចុះផ្សាយនៅថ្ងៃ៖
ស្តាប់ - ០២:០៥
យោងតាមទីភ្នាក់ងារសារព័ត៌មានអ៊ីរ៉ង់ ការបាញ់សាកល្បងមីស៊ីល នៅថ្ងៃសៅរ៍នេះ គឺជាដំណាក់កាលចុងក្រោយ នៃសមយុទ្ធទ័ពជើងទឹកអ៊ីរ៉ង់ ដែលបានបើកធ្វើតាំងពីថ្ងៃសៅរ៍មុន នៅក្បែរច្រកសមុទ្រ Ormuz ដែលជាច្រកដ៏សំខាន់មួយ សម្រាប់ការដឹកជញ្ជូនប្រេង ពីតំបន់ឈូងសមុទ្រពែរ្ស ដែលជាតំបន់ជង្រុកប្រេង (អារ៉ាប៊ីសាអ៊ូឌីត បារ៉ែន កូវ៉ែត កាតា និងអារ៉ាប់រួម) ចេញទៅមហាសមុទ្រឥណ្ឌា។ Ormuz គឺជាច្រកសមុទ្រជាប់នឹងឆ្នេរសមុទ្រអ៊ីរ៉ង់ ហើយជាច្រកតូចចង្អៀត ដោយមានទទឹងតែប្រមាណ ៥០គីឡូម៉ែត្រប៉ុណ្ណោះ។
កាលពីថ្ងៃអង្គារ អនុប្រធានាធិបតីអ៊ីរ៉ង់បានព្រមានថា បើសិនជាអ៊ីរ៉ង់មិនអាចនាំប្រេងចេញទៅលក់នៅបរទេសបានទេ អ្នកផ្សេងទៀតក៏មិនអាចដឹកប្រេងកាត់តាមច្រកសមុទ្រ Ormuz បានដែរ។ អគ្គបញ្ជាការកងទ័ពជើងទឹកអ៊ីរ៉ង់បានបន្ទរបន្ថែមថា បិទច្រកសមុទ្រ Ormuz គឺជារឿងងាយស្រួលជាងបកចេកទៅទៀត។
ក៏ប៉ុន្តែ នៅថ្ងៃពុធ អ្នកនាំពាក្យក្រសួងការពារជាតិអាមេរិកបានព្រមានថា កងទ័ពអាមេរិកនឹងមិនបណ្តោយឲ្យអ៊ីរ៉ង់បិទច្រកសមុទ្រ Ormuz នេះបានតាមចិត្តនោះទេ។ គួរបញ្ជាក់ថា អាមេរិកមានមូលដ្ឋានទ័ពជើងទឹកដ៏ធំមួយ នៅក្នុងប្រទេសបារ៉ែន ដែលស្ថិតនៅក្នុងឈូងសមុទ្រពែរ្ស ក្បែរច្រកសមុទ្រ Ormuz។
ស្របពេលនឹងការសម្ញែងកម្លាំងទ័ព នៅថ្ងៃសៅរ៍នេះ ទីភ្នាក់ងារសារព័ត៌មានអ៊ីរ៉ង់បានផ្សាយឲ្យដឹងថា មន្រ្តីការទូតអ៊ីរ៉ង់ ដែលទទួលបន្ទុកចរចាបញ្ហានុយក្លេអ៊ែរ គ្រោងនឹងសរសេរលិខិតមួយច្បាប់ទៅសហភាពអឺរ៉ុប ដើម្បីបង្ហាញពីជំហរចង់ឲ្យបើកការចរចាឡើងវិញ ជុំវិញសំណុំរឿងនុយក្លេអ៊ែរអ៊ីរ៉ង់។
គួររំឭកឡើងវិញថា កិច្ចចរចាលើសំណុំរឿងនុយក្លេអ៊ែរអ៊ីរ៉ង់ ដែលរួមមានប្រទេសសមាជិកអចិន្រ្តៃយ៍នៃក្រុមប្រឹក្សាសន្តិសុខអ.ស.ប. (អាមេរិក អង់គ្លេស បារាំង ចិន រុស្ស៊ី) បូកនឹងប្រទេសអាល្លឺម៉ង់ បានជាប់គាំងអស់រយៈពេលជិតមួយឆ្នាំមកហើយ។
ភាពតានតឹងជុំវិញសំណុំរឿងនុយក្លេអ៊ែរអ៊ីរ៉ង់បានកើនឡើងកាន់តែខ្លាំង ចាប់តាំងពីទីភ្នាក់ងារថាមពលបរមាណូអន្តរជាតិ (AIEA) បានចេញផ្សាយរបាយការណ៍មួយ កាលពីខែវិច្ឆិកា ដោយបានបង្ហាញថា អ៊ីរ៉ង់ពិតជាធ្លាប់បានព្យាយាមអភិវឌ្ឍបច្ចេកវិទ្យានុយក្លេអ៊ែរផ្នែកយោធាមែន។
បន្ទាប់ពីមានរបាយការណ៍នេះ អាមេរិក និងសហភាពអឺរ៉ុប ក៏បានចាប់ផ្តើមគិតគូរពីការដាក់ទណ្ឌកម្មលើការនាំចេញប្រេងរបស់អ៊ីរ៉ង់។ ក៏ប៉ុន្តែ មន្រ្តីសហភាពអឺរ៉ុបកំពុងបារម្ភថា ទណ្ឌកម្មនេះអាចនឹងបង្កបញ្ហាដល់សហភាពអឺរ៉ុបខ្លួនឯងជាងដល់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ