កិច្ចចរចាសន្តិភាពរវាងរបបភូមានិងក្រុមឧទ្ទាមការ៉ែន
របបភូមានិងក្រុមឧទ្ទាមជនជាតិភាគតិចការ៉ែន(Karens) បានរួមប្រជុំគ្នានៅទីក្រុងរ៉ង់ហ្គូន(Rangoun) ដើម្បីធ្វើការចរចាគ្នាអំពីការចាប់អនុវត្តន៍កិច្ចព្រមព្រៀងឈប់បាញ់គ្នាដែលបានចុះហត្ថលេខានៅដើមខែមករាកន្លងផុតទៅនេះនៅក្នុងសង្គ្រាមស៊ីវិលមួយដែលមានចំណាស់ជាងគេនៅក្នុងពិភពលោក-នេះជាការយល់ឃើញរបស់ក្រុមអ្នកកាសែតនៃទីភ្នាក់ងារព័ត៌មានបារាំងAFPនៅថ្ងៃសុក្រទី៦មេសានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
គណប្រតិភូនៃសាខាកងទ័ពនិងនយោបាយរបស់សហភាពជាតិការ៉ែន (Karen National Union KNU) ដែលជាក្រុមឧទ្ទាមជនជាតិភាគតិចមួយដែលមានឥទ្ធិពលខ្លាំងជាងគេនៅក្នុងប្រទេសភូមា បានធ្វើដំណើរមកកាន់រ៉ង់ហ្គូនរដ្ឋធានីសេដ្ឋកិច្ចនៃប្រទេសភូមាដើម្បី ចរចាពង្រឹងសន្តិភាពដែលនៅមានលក្ខណៈផុយស្រួយនៅឡើយ។
នៅល្ងាចថ្ងៃព្រហស្បតិ៍៥មេសាម្សិលមិញ លោក (Khin Yi) ឃិន យី រដ្ឋមន្ត្រីក្រសួងអន្តោប្រវេសន៍ បានថ្លែងប្រាប់ដល់ក្រុមអ្នកកាសែតថា “នៅពេលចរចាលើកមុននៅ Hpa-an រដ្ឋធានីរបស់រដ្ឋការ៉ែនភាគខាងកើតប្រទេស យើង បានជជែកគ្នារួចហើយ អំពីលក្ខខណ្ឌ នៃក្រមប្រតិបត្តិ សំរាប់កងទ័ពនៅលើសមរភូមិ។ លោកឃិនយី តំណាងរបស់រដ្ឋាភិបាលដ៏សំខាន់ម្នាក់ក្នុងចំណោម៣នាក់ទទួលបន្ទុកចរចាសន្តិភាព បានអះអាងថា រដ្ឋាភិបាលភូមាក៏ដូចជាក្រុមឧទ្ទាមការ៉ែនដែរ សុទ្ធតែប្រាថ្នាចង់បានសន្តិភាពគ្រប់ៗគ្នា ដូច្នេះកិច្ចចរចានៅពេលនេះ ពិតជានឹងបានទទួលជោគជ័យ”។
គួររំលឹកថា របបភូមាចាត់ទុក សហភាពជាតិការ៉ែន KNU ដែលមានទីចាត់ការនៅប្រទេសថៃ ថាជាអង្គការខុសច្បាប់ ។ ចំណែកទ័ពព្រៃការ៉ែន ក៏ធ្លាប់បានធ្វើសង្គ្រាមជាមួយរបបភូមាតាំងពីឆ្នាំ១៩៤៩មកម្ល៉េះដើម្បីទាមទារផ្តាច់ទឹកដី។
ប៉ុន្តែ នៅខែមករាកន្លងផុតទៅនេះ ក្នុងក្របខ័ណ្ឌកំណែទម្រង់ របបថ្មីភូមាបានចុះហត្ថលេខាលើកិច្ចព្រមព្រៀងឈប់បាញ់គ្នាជាមួយក្រុមជនជាតិភាគតិចការ៉ែន។រដ្ឋាភិបាលថ្មីនេះ បានចាត់វិធានការយ៉ាងច្រើន ជាអាទិ៍ ការបោះឆ្នោតសភានៅថ្ងៃទីមួយមេសាកន្លងទៅនេះ ដែលជ័យជំនះ ត្រូវធ្លាក់ទៅក្នុងកណ្តាប់ដៃ គណបក្សប្រឆាំងដឹកនាំដោយលោកស្រីអ៊ុងសានស៊ូជី។
នៅថ្ងៃអាទិត្យ៨មេសាខាងមុខនេះ ប្រតិភូការ៉ែន គ្រោងនឹងជួបសន្ទនាជាមួយលោកស្រីអ៊ុងសានស៊ូជី ដើម្បីស្ទាបស្ទង់ពីជំហរនិងចេតនាការផ្សះផ្សាជាតិរបស់លោកស្រី-នេះជាការថ្លែងបញ្ជាក់របស់លោក May Oo Mutraw-អ្នកនាំពាក្យរបស់សហភាពជាតិការ៉ែន ដោយបានសម្តែងការអបអរសាទរចំពោះពលីកម្មនិងតួនាទីដឹកនាំដ៏សំខាន់របស់ប្រធានបក្សប្រឆាំងភូមានេះ។
ប៉ុន្តែស្របគ្នានឹងការខិតខំប្រឹងប្រែងរបស់រដ្ឋាភិបាលភូមា ដើម្បីសន្តិភាពនេះ អំពើហិង្សាវាយប្រយុទ្ធគ្នា នៅតែបន្តចាប់តាំងពីខែមិថុនានៅក្នុងរដ្ឋ កាឈីន ជនជាតិភាគតិចមួយទៀតនៅប៉ែកខាងជើងចុងបំផុត ជាទីដែលក្រុមអង្គការការពារសិទ្ធិមនុស្សអះអាងថា ការជិះជាន់រំលោភសិទ្ធិមនុស្ស ប្រឆាំងប្រជាជនស៊ីវិលនៅតែមាននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ