មេដឹកនាំយោធាកម្ពុជា-ថៃ ស្វែងរកការធានាសន្តិសុខព្រំដែន
រដ្ឋមន្ត្រីការពារជាតិកម្ពុជា និងថៃបានដឹកនាំប្រតិភូជួបគ្នា នៅក្បែរប្រាសាទព្រះវិហារ នៅព្រឹកថ្ងៃអង្គារទី២៦ កុម្ភៈដើម្បីសន្យារក្សាភាពស្ងប់ស្ងាត់អោយបាននៅតាមព្រំដែន។ ការជួបគ្នានេះមានសារៈសំខាន់ ខណៈដែលតុលាការយុត្តិធម៌អន្តរជាតិទីក្រុងឡាអេ នឹងសម្រេចលើបណ្តឹងរបស់កម្ពុជា ដែលស្នើអោយតុលាការអន្តរជាតិនេះបកស្រាយសាលក្រមឆ្នាំ ១៩៦២ ស្តីពីប្រាសាទព្រះវិហារ នៅពាក់កណ្តាលខែមេសា ខាងមុខនេះ។ ហើយថាមានចលនាជ្រុលនិយមខ្លះនៅក្នុងប្រទេសថៃកំពុងព្យាយាមបង្កអោយមានជម្លោះនៅព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ប្រសិនបើចលនាជ្រុលនិយមថៃមួយចំនួនគ្រោងបង្កអសន្តិសុខនៅតាមតំបន់ព្រំដែន ពិសេសនៅតំបន់ព្រំដែនព្រះវិហារនោះ កម្ពុជាមានកាតព្វកិច្ចប្រុងជើងការ និងត្រៀមទប់ទល់ស្ថានការនេះ។ ជំនួបរវាងរដ្ឋមន្ត្រីការពារជាតិកម្ពុជានិងថៃ នៅព្រឹកថ្ងៃអង្គារទី២៦ កុម្ភៈ នៅក្បែរប្រាសាទព្រះវិហារ ក្នុងទឹកដីកម្ពុជា មានគោលដៅចាំបាច់ ដើម្បីភាគីទាំងពីររម្លឹកប្រាប់គ្នាអំពីការរក្សាសន្តិភាពតាមព្រំដែនដោយអនុវត្តតាមយន្តការ និងការសន្យានានាដែលមានស្រាប់ក្នុងពេលកន្លងមក។
ជំនួបនេះក៏បានប្រព្រឹត្តិទៅ បន្ទាប់ពីលោកនាយករដ្ឋមន្ត្រីកម្ពុជា ហ៊ុន សែន បានចេញបញ្ជាអោយកំលាំងប្រដាប់អាវុធគ្រប់ប្រភេទត្រៀមលក្ខណៈ ដើម្បីទប់ទល់នឹងចលនាជ្រុលនិយមរបស់ថៃមួយចំនួន ដែលគ្រោងបង្កបញ្ហានៅតាមព្រំដែន ក្នុងករណីដែលតុលាការយុត្តិធម៌អន្តរជាតិក្រុងឡាអេសម្រេចក្តី ដោយផ្តល់ផលប្រយោជន៍មកអោយខាងភាគីកម្ពុជានោះ។
ការទាមទាររបស់រដ្ឋាភិបាលថៃដែលដឹកនាំដោយអតីតនាយកដ្ឋមន្ត្រីថៃ លោក អាប់ភីស៊ីត វេចាជីវ៉ា យកដីជុំវិញប្រាសាទព្រះវិហារនោះ បានតម្រូវអោយកម្ពុជាដាក់បណ្តឹងទៅតុលាការយុត្តិធម៌អន្តរជាតិ ដើម្បីស្នើសុំតុលាការអន្តរជាតិអោយបកស្រាយឡើងវិញសាលក្រមរបស់ខ្លួនឆ្នាំ១៩៦២ ដែលបានបញ្ជាអោយថៃប្រគល់កម្មសិទ្ធលើប្រាសាទព្រះវិហារ មកអោយកម្ពុជាវិញ។ ក្នុងពេលថ្មីៗនេះក្រុមជ្រុលនិយមថៃមួយចំនួន កំពុងព្យាយាមបង្កអោយមានជម្លោះតាមព្រំដែន ប្រសិនបើថៃចាញ់នៅក្នុងក្តីមួយនេះទៀត។ ជាសញ្ញាដែលប្រាប់អោយកម្ពុជាត្រូវបន្ថែមការប្រុងប្រយ័ត្ន ការពារបូរណភាពដែនដីឡើងវិញ។
យោងតាមគេហទំព័ររបស់ប៉ូលីសជាតិ នៅក្នុងជំនួបទ្វេភាគី នៅព្រឹកថ្ងៃទី២៦កុម្ភៈ ភាគីកម្ពុជាដឹកនាំដោយលោកនាយឧត្តមសេនីយ៍ ទៀ បាញ់ រដ្ឋមន្ត្រីក្រសួងការពារជាតិ លោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ លោកនាយឧត្តមសេនីយ៍ គន់ គីម អគ្គមេបញ្ជាការរងកងយោធពលខេមរភូមិន្ទ លោកនាយឧត្តមសេនីយ៍ ជា ដារ៉ា លោកឧត្តមសេនីយឯកសៀក សុជាតិ នាយកទីចាត់ការព្រំដែន និងមន្ត្រីយោធាជាច្រើនរូបទៀត។ រីឯភាគីថៃវិញ ដឹកនាំដោយលោក ស៊ូគុំពូល ស៊ូវណ្ណាថាត (Sukumpol Suwanatat) ជារដ្ឋមន្ត្រីការពារជាតិ និងមន្ត្រីជាន់ខ្ពស់យោធាថៃជាច្រើនរូបទៀត។
លោកនាយករដ្ឋមន្ត្រី ហ៊ុន សែន បានថ្លែងនៅក្នុងសន្និបាតបូកសរុបការងារក្រសួងមហាផ្ទៃកាលពីសប្តាហ៍មុនថា លោកបានជជែកបញ្ហាសាលក្រមឡាអេ ខាងមុខនេះជាមួយលោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់ ដែរ ដើម្បីបង្ហាញអំពីជំហររបស់កម្ពុជា ដែលមិនចង់អោយបញ្ហាព្រំដែនព្រះវិហារនេះ រាលដាលដល់ព្រំដែនក្នុងតំបន់ផ្សេងទៀត ហើយក៏មិនចង់អោយបញ្ហាព្រំដែននេះរាលដាលបង្កជាទំនាស់ក្នុងវិស័យផ្សេងៗទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ