Edward Snowden៖ អាមេរិកក៏លួចស៊ើបការអង្គការសហប្រជាជាតិ និងទីភ្នាក់ងារថាមពលបរមាណូអន្តរជាតិផងដែរ
ទីភ្នាក់ងារសន្តិសុខជាតិអាមេរិក NSA ក៏បានលួចស៊ើបការអង្គការសហប្រជាជាតិ និងទីភ្នាក់ងារថាមពលបរមាណូអន្តរជាតិផងដែរ។ នេះបើយោងតាមខ្លឹមសារឯកសារថ្មីៗមួយចំនួនទៀត ផ្តល់ដោយ Edward Snowden ដែលត្រូវបានសារព័ត៌មានប្រចាំសប្តាហ៍អាល្លឺម៉ង់ Der Spiegel យកមកចុះផ្សាយ កាលពីថ្ងៃអាទិត្យ២៥សីហា កន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
យោងតាមការចុះផ្សាយរបស់សារព័ត៌មានប្រចាំសប្តាហ៍អាល្លឺម៉ង់ Der Spiegel អ្នកជំនាញនានានៃទីភ្នាក់ងារសន្តិសុខជាតិអាមេរិក NSA បានលួចចូលទៅចាប់ស្កាត់យកខ្លឹមសារទំនាក់ទំនង ក្នុងប្រព័ន្ធកិច្ចប្រជុំនានារបស់អង្គការសហប្រជាជាតិ ដែលកិច្ចប្រជុំនេះបានធ្វើឡើងជារូបភាពវីដេអូ តាមគេហទំព័រផ្ទៃក្នុង។ ការស៊ើបការនេះ បានប្រព្រឹត្តទៅកាលពីរដូវក្តៅ ឆ្នាំ២០១២។ សារព័ត៌មានអាល្លឺម៉ង់បន្ថែមទៀតថា ក្រៅពីទីស្នាក់ការអង្គការសហប្រជាជាតិក្រុងញូវយក ទីភ្នាក់ងារសន្តិសុខជាតិអាមេរិក ក៏បានលួចស៊ើបការទីភ្នាក់ងារថាមពលបរមាណូអន្តរជាតិ ដែលហៅកាត់ថា AIEA ផងដែរ។
សហរដ្ឋអាមេរិក មិនមែនជាប្រទេសតែមួយ ដែលបានលួចស៊ើបការអង្គការសហប្រជាជាតិនោះទេ។ យោងតាមសារព័ត៌មានអាល្លឺម៉ង់ Der Spiegel ដដែលនេះ ភ្នាក់ងារសំងាត់ចិនជាច្រើនរូប ក៏បានលួចស៊ើបការសំងាត់ពីអង្គការសហប្រជាជាតិផងដែរ។ កាលពីឆ្នាំ២០១១ ទីភ្នាក់ងារសន្តិសុខជាតិអាមេរិក មានការភ្ញាក់ផ្អើលដោយបានរកឃើញថា ចិនកំពុងតែលួចស៊ើបការអ.ស.បដោយសំងាត់។
ព័ត៌មានទាក់ទងប្រព័ន្ធស៊ើបការទាំងអស់នេះ គឺទទួលបានតាមរយៈឯកសារថ្មីៗ ដែលផ្តល់ដោយអ្នកទំលាយប្រព័ន្ធស៊ើបការសំងាត់អាមេរិកដ៏ល្បីល្បាញ គឺ Edward Snowden។ គួររំលឹកថា Snowden ធ្លាប់បំរើការអោយទីភ្នាក់ងារសន្តិសុខជាតិអាមេរិក NSA និងទីភ្នាក់ងារសេអ៊ីអា។
កាលពីថ្ងៃពុធសប្តាហ៍មុន រដ្ឋាភិបាលអាមេរិក បានទទួលស្គាល់ថា ចន្លោះពីឆ្នាំ២០០៨ ដល់ឆ្នាំ ២០១១ ទីភ្នាក់ងារNSA បានរំលោភបំពានច្បាប់ ដោយបានលួចស៊ើបការខ្លឹមសារនៃសារអេឡិចត្រូនិករបស់ប្រជាជនអាមេរិកាំង ដែលគ្មានជាប់ពាក់ព័ន្ធនឹងសកម្មភាពភេរវកម្មទាល់តែសោះនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ