តៃវ៉ាន់បន្តរុករកនិងសង្គ្រោះ ខណៈអ្នកស្លាប់ក្នុងគ្រោះថ្នាក់ធ្លាក់យន្តហោះ កើនដល់៣២នាក់
នៅថ្ងៃសុក្រនេះ តៃវ៉ាន់បន្តប្រតិបត្តិការរុករកនិងសង្គ្រោះរបស់ខ្លួន ខណៈដែលចំនួនអ្នកស្លាប់នៅក្នុងគ្រោះថ្នាក់ធ្លាក់យន្តហោះ កើនឡើងដល់៣២នាក់ហើយ។ កាលពីថ្ងៃព្រហស្បតិ៍ បំណែកយន្តហោះធំៗ ព្រមទាំងប្រអប់ខ្មៅ ត្រូវបានគេស្រង់ចេញពីទឹករួចហើយ ប៉ុន្តែគេនៅមិនទាន់រកឃើញមនុស្ស១១នាក់ទៀត ដែលកំពុងបាត់ខ្លួននោះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ក្រុមអ្នករុករកតៃវ៉ាន់ បានប្រើប្រាស់ឧបករណ៍ស្វែងរកក្នុងទឹក ដើម្បីព្យាយាមកំណត់ទីតាំងមនុស្សទាំង១១នាក់ ដែលកំពុងលិចបាត់ទៅក្នុងទឹកស្ទឹងជាមួយយន្តហោះ TransAsia តាំងពីថ្ងៃពុធ ទី៤ខែកុម្ភៈកន្លងទៅ។ ការរុករកនេះ ធ្វើឡើងនៅខណៈដែលចំនួនអ្នកស្លាប់បានកើនឡើងដល់៣២នាក់ គិតត្រឹមព្រឹកថ្ងៃសុក្រទី៦កុម្ភៈ។
គួរជម្រាបជូនថា រហូតមកទល់ពេលនេះ ក្បាលនិងកន្ទុយរបស់យន្តហោះ TransAsia ជើងហោះហើរលេខ GE២៣៥ ដែលបានដាំក្បាលធ្លាក់ចូលក្នុងទឹកស្ទឹងក្នុងទីក្រុងតៃប៉ិកកាលពីថ្ងៃពុធនោះ ត្រូវបានគេស្រង់ចេញពីទឹកហើយ។ ប្រអប់ខ្មៅទាំងពីររបស់យន្តហោះ ដែលរួមមានឧបករណ៍កត់ត្រាទិន្នន័យការហោះហើរ ព្រមទាំងឧបករណ៍ថតសំឡេងនៅក្នុងបន្ទប់បើកបរយន្តហោះ ក៏ត្រូវបានស្រង់ចេញពីទឹករួចហើយដែរ។ បើតាមប្រធានរដ្ឋបាលអាកាសចរណ៍ស៊ីវិលរបស់តៃវ៉ាន់ មន្ដ្រីជំនាញកំពុងតែវិភាគពីព័ត៌មានទាំងឡាយនៅក្នុងប្រអប់ខ្មៅទាំងពីរនេះ ដើម្បីឈានទៅកំណត់ពីមូលហេតុនៃការធ្លាក់យន្តហោះ TransAsia។ ជាការធ្លាក់យន្តហោះដែលកើតឡើងនៅក្នុងអាកាសធាតុស្រឡះល្អយ៉ាងដូច្នេះ ។
យ៉ាងណាក៏ដោយ ព័ត៌មានបឋមបង្ហើបឲ្យដឹងថា មូលហេតុនៃការធ្លាក់យន្តហោះនេះ គឺអាចបណ្ដាលមកពីម៉ាស៊ីនមួយ ក្នុងចំណោមម៉ាស៊ីនទាំងពីររបស់យន្តហោះ មានបញ្ហាមិនដំណើរការ។ លោក Huang Jin Sun វ័យ៧២ឆ្នាំ ជាអ្នករស់រានមានជីវិតម្នាក់ ក្នុងចំណោម១៥នាក់ ពីគ្រោះថ្នាក់ធ្លាក់យន្តហោះ TransAsia នេះ បានផ្ដល់សម្ភាសដល់ទូរទស្សន៍តៃវ៉ាន់មួយថា លោកបានលឺសំឡេងខុសប្រក្រតីចេញពីម៉ាស៊ីនយន្តហោះ បន្ទាប់ពីយន្តហោះឡើងបានបន្តិច។
សូមរំលឹកថា នៅកោះតៃវ៉ាន់ នាព្រឹកថ្ងៃពុធ ទី៤ កុម្ភៈ មានយន្តហោះមួយគ្រឿងរបស់ក្រុមហ៊ុន TransAsia ប្រភេទ ATR ៧២-៦០០ បានហោះទៅប៉ះនឹងស្ពានអាកាសមួយសង់ពីលើស្ទឹងក្នុងទីក្រុងតៃប៉ិក រួចក៏ដាំក្បាលធ្លាក់ចូលក្នុងស្ទឹងនោះតែម្តង។ តុល្យការបណ្ដោះអាសន្នចុងក្រោយឲ្យដឹងថា ក្នុងចំណោមមនុស្សទាំង៥៨នាក់ដែលស្ថិតក្នុងយន្តហោះនោះ មាន១៥នាក់ត្រូវបានគេជួយសង្គ្រោះទាន់ពេលវេលា ៣២នាក់ស្លាប់បាត់បង់ជីវិត និង១១នាក់ទៀតកំពុងបាត់ខ្លួននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ