តុលាការខ្មែរក្រហមផ្អាកសវនាការលើសំណុំរឿង ០០២ ដោយសារលោក នួនជា ឈឺធ្ងន់
បន្ទាប់ពីបើកសវនាការបានប៉ុន្មាននាទី នៅព្រឹកថ្ងៃចន្ទ ទី១៤ ខែមករានេះ អង្គជំនុំជម្រះសាលាដំបូង របស់តុលាការខ្មែរក្រហម បានសម្រេចផ្អាកសវនាការ លើសំណុំរឿង០០២ បន្ទាប់ពីលោក នួន ជា ត្រូវបានគេដឹកចូលពេទ្យ សង្គ្រោះបន្ទាន់ កាលពីល្ងាចថ្ងៃអាទិត្យម្សិលមិញ។ លោក នួន ជា អាយុ ៨៦ ឆ្នាំ កំពុងសម្រាកក្នុងបន្ទប់សង្គ្រោះបន្ទាន់ នៅមន្ទីរពេទ្យមិត្តភាព ខ្មែរ-សូវៀត លោក នួន ជា មានជំងឺរលាកទងសួត ធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:១៩
លោក នួន ជា មានជំងឺរលាកសួត ដ៏ស្រួចស្រាវ ហើយត្រូវបានគេបញ្ជូន ទៅសង្គ្រោះបន្ទាន់ នៅមន្ទីរពេទ្យមិត្តភាពខ្មែរ-សូវៀត ឬមន្ទីរពេទ្យរុស្ស៊ី ក្នុងទីក្រុងភ្នំពេញ កាលពីល្ងាចថ្ងៃអាទិត្យ ទី១៣ ខែមករា ឆ្នាំ២០១៣។ អាការៈជំងឺរបស់លោក នួន ជា នឹងត្រូវស្ថិតនៅមន្ទីរពេទ្យ សង្គ្រោះបន្ទាន់ ប្រហែលជា ៤ ទៅ ៧ ថ្ងៃ។ នេះបើតាមលោក នេត្រ ភ័ក្ត្រា អ្នកនាំពាក្យសាលាក្តីខ្មែរក្រហម។
ក្នុងសវនាការ ព្រឹកមិញ ក្រុមមេធាវីការពារក្តីលោក នួន ជា បានស្នើសុំឲ្យមានការផ្អាកសវនាការលើសំណុំរឿង០០២ ដើម្បីរង់ចាំចម្លើយពីលោក នួន ជា ដែលកំពុងសម្រាកពេទ្យ ថាតើលោកលះបង់សិទ្ធិ ក្នុងការចូលរួមសវនាការដោយផ្ទាល់ ឬយ៉ាងណា?។
អ្នកនាំពាក្យ បានលើកឡើងថា សវនាការលើសំណុំរឿង០០២ ដែលមានជនជាប់ចោទ នួនជា អៀងសារី និងខៀវសំផន នឹងត្រូវបន្តធ្វើឡើងវិញ នៅព្រឹកថ្ងៃពុធ ទី១៦ ខែមករា ឆ្នាំ២០១៣។
របាយការណ៍ពីគ្រូពេទ្យ បានបង្ហាញក្នុងសវនាការ នៅសាលាក្តីខ្មែរក្រហម កាលពីព្រឹកមិញថា លោក នួន ជា មានជំងឺរលាកទងសួត កំពុងស្ថិតក្នុងសភាពសង្គ្រោះបន្ទាន់។
អតីតអនុលេខាធិការបក្សកុម្មុនីស្តកម្ពុជា និងប្រធានសភាប្រជាជន នៅក្នុងរបបកម្ពុជាប្រជាធិបតេយ្យ លោក នួន ជា ត្រូវសាលាក្តីខ្មែរក្រហមចាប់ខ្លួន កាលពីថ្ងៃទី១៩ ខែកញ្ញា ឆ្នាំ២០០៧។ តុលាការ ចោទប្រកាន់បងទី២ លោក នួន ជា ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងបទឧក្រិដ្ឋកម្មប្រល័យពូជសាសន៍។
ចាប់តាំងពីចាប់ផ្តើមសវនាការដំបូង កាលពីថ្ងៃទី២១ ខែវិច្ឆិកា ឆ្នាំ២០១១ សំណុំរឿង០០២ គិតមកដល់បំណាច់ឆ្នាំ២០១២ បានដំណើរការរយៈពេល ១៤០ ថ្ងៃ។ ក្នុងនោះ មានសាក្សី ៣២ នាក់ ដើមបណ្តឹងរដ្ឋប្បេវណី ១៤នាក់ និងអ្នកជំនាញ ២ នាក់ បានផ្តល់សក្ខីកម្ម ក្នុងសវនាការ។
មិនមែនមានតែលោក នួនជា ទេ ដែលប្រឈមមុខនឹងបញ្ហាសុខភាព ចាស់ជរា លោក អៀង សារី អតីតរដ្ឋមន្ត្រីការបរទេសខ្មែរក្រហម ដែលមានអាយុ ៨៧ ឆ្នាំ ក៏មានជំងឺ និងមិនអាចចូលរួមសវនាការ ដោយផ្ទាល់បានឡើយ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ