អាមេរិក និងប្រទេសកាតារបន្ថែមទ័ណ្ឌកម្មសេដ្ឋកិច្ចលើស៊ីរី
សហរដ្ឋអាមេរិកបានប្រកាសឲ្យដឹងថា ខ្លួននឹងបិទខ្ទប់មិនឲ្យធនាគារមួយរបស់ស៊ីរីមានលទ្ធភាពប្រើប្រព័ន្ធហិរញ្ញវត្ថុអាមេរិកំាង។ មូលហេតុ មកពីធនាគារស៊ីរីនោះបានរកស៊ីជាមួយធនាគារផ្សេងទៀតដែលកំពុងជាប់ទ័ណ្ឌកម្ម។ តាមរយៈវិធានការនេះ លោកប្រធានាធិបតីអាមេរិក អូបាម៉ាចង់បង្ហាញពីការប្តេជ្ញាចិត្តរបស់ខ្លួនចំពោះរដ្ឋាភិបាលស៊ីរី។ លោក អូបាម៉ាដែលចង់បន្តប្រើទ័ណ្ឌកម្មសេដ្ឋកិច្ច មុននឹងសម្រេចចិត្តឈានដល់ការប្រើកម្លំាងយោធា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ធនាគារស៊ីរីឈ្មោះ Syria International Islamic Bank ត្រូវបានអាមេរិកសង្ស័យថា បានលួចទៅរកស៊ី និងជួយធនាគារពាណិជ្ជស៊ីរី និងស្ថាប័នហិរញ្ញវត្ថុផ្សេងទៀតដែលកំពុងជាប់ទ័ណ្ឌកម្មរបស់អាមេរិក សហភាពអឺរ៉ុប និងសម្ព័ន្ធអារ៉ាប់។ Syria International Islamic Bank ប្រហែលជាបានជួយធនាគារពាណិជ្ជស៊ីរីឲ្យបញ្ជូនប្រាក់ចេញចំនួន ១៥០លានដុល្លារ។ ដូច្នេះចាប់ពីនេះតទៅ Syria International Islamic Bank នឹងមិនអាចប្រើប្រព័ន្ធហិរញ្ញវត្ថុរបស់អាមេរិកបានទៀតឡើយ។ ចំណែកប្រទេសកាតារវិញក៏កំពុងរៀបចំវិធានការដូចគ្នានេះដែរ។ តែក្រសួងសេដ្ឋកិច្ចអាមេរិកបានបញ្ជាក់ថា ធនាគាររបស់ប្រទេសកាតារដែលរកស៊ីជាមួយ Syria International Islamic Bank នឹងមិនទទួលរងទ័ណ្ឌកម្មនេះទេ។
ការចាត់វិធានការដូចនេះរបស់រដ្ឋបាលអាមេរិកំាង គឺដើម្បីដាក់សម្ពាធបន្ថែមលើរបបទីក្រុងដាម៉ាស់ និងជាការបង្ខំឲ្យលោកប្រធានាធិបតីស៊ីរីចុះចេញពីតំណែង។ តែយ៉ាងណាក៏ដោយ លោក Mitt Romney និងលោក John Mcain ដែលបានចោទលោកអូបាម៉ាពីភាពទន់ខ្សោយ និងអសមត្ថភាពនៅចំពោះមុខព្រឹត្តិការណ៍សម្លាប់រង្គាលនៅ Houla ពីសំណាក់ទាហានស៊ីរី បានជំរុញលោក អូបាម៉ាឲ្យធ្វើអន្តរាគមតាមផ្លូវយោធា។ តែខណៈនេះ លោក អូបាម៉ាចង់បន្តប្រើវិធានការផ្លូវទូត ផ្សំនិងទ័ណ្ឌកម្មសេដ្ឋកិច្ច។ ទន្ទឹមគ្នានេះ លោក អូបាម៉ាក៏មិនចង់បំពាក់អាវុធទៅឲ្យក្រុមអ្នកប្រឆំាងដែរ ដោយខ្លាចអាវុធទំាងនោះធ្លាក់ទៅក្នុងកណ្តាប់ដៃពួកជ្រុលនិយម។
យ៉ាងណាក៏ដោយ នៅថ្ងៃទី ៦ មិថុនាខាងមុខ ក្រុមប្រទេសមិត្តរបស់ស៊ីរីនឹងបើកកិច្ចប្រជុំនៅក្នុងទីក្រុងវ៉ាស៊ីនតោន ដើម្បីសិក្សាពីប្រសិទ្ធិភាពនៃទ័ណ្ឌកម្មកន្លងមក និងស្វែងរកវិធានការថ្មីដើម្បីបង្ខំប្រធានាធិបតីស៊ីរី Bachar al-Assad ឲ្យបិទបញ្ចប់អំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ