អង្គការសហប្រជាជាតិសម្រេចផ្តល់ជំនួយស្បៀងដល់ប្រជាជនកូរ៉េខាងជើង
កម្មវិធីស្បៀងអាហារពិភពលោករបស់អង្គការសហប្រជាជាតិទើបបានសម្រេច នៅថ្ងៃសៅរ៍ ផ្តល់ជំនួយស្បៀង ដល់ប្រជាជនកូរ៉េខាងជើង ដែលកំពុងរស់ ពឹងអាស្រ័យដោយជំនួយបរទេស។ ចាប់ពីថ្ងៃទី១កក្កដា ជំនួយស្បៀង ដែលមានតម្លៃ ២០០លានដុល្លារ នឹងត្រូវប្រគល់ទៅដល់ដៃប្រជាជនកុមារ និងស្រ្តីមានផ្ទៃពោះកូរ៉េខាងជើង ដែលពេលនេះ កំពុងរងគ្រោះដោយការខ្វះអាហារ។
ចុះផ្សាយនៅថ្ងៃ៖
ស្តាប់ - ០១:៤៥
គម្រោងផ្តល់ស្បៀង នឹងមានរយៈពេល ២ឆ្នាំ សម្រាប់ប្រជាជនកូរ៉េខាងជើង ជាង ២លាននាក់ ដែលភាគច្រើន ជាកុមារ ស្រ្តីមានផ្ទៃពោះ និងស្រ្តីដែលបំបៅកូនដោយទឹកដោះ។ យោងតាមអ្នកនាំពាក្យរបស់កម្មវិធីស្បៀងអាហារពិភពលោក គេកំពុងព្រួយបារម្ភពីកម្រិតបញ្ញា និងការអភិវឌ្ឍកាយសម្បទារបស់កុមារកូរ៉េខាងជើង ដែលកំពុងរងគ្រោះដោយកង្វះអាហារូបត្ថម្ភ។
កាលពីខែមីនា កម្មវិធីស្បៀងអាហាពិភពលោកបានបញ្ជូនជំនួយស្បៀង ជាបន្តបន្ទាប់ ទៅកូរ៉េខាងជើង ដើម្បីជៀងវាង គ្រោះទុរភិក្សក្នុងប្រទេសមួយនេះ។ ប៉ុន្តែ ស្បៀងនេះបានត្រឹមជួយមួយផ្នែកប៉ុណ្ណោះ ព្រោះប្រជាជន កូរ៉េខាងជើងរងគ្រោះដោយភាពអត់ឃ្លាន មានដល់ទៅ ២ភាគ ៣នៃប្រជាជន សរុប ២៤លាននាក់។
តាមមន្រ្តីរបស់កម្មវិធីស្បៀងអាហារពិភពលោក បើទោះជាផលកសិកម្មរបស់កូរ៉េខាងជើងបានកើនឡើង ជាង ១០ភាគរយ សម្រាប់ឆ្នាំ ២០១២ ប៉ុន្តែ គេនៅតែពិបាកក្នុងការប្រយុទ្ធប្រឆាំងនឹងភាពក្រីក្រ និងគ្រោះអត់ឃ្លាន។ ក្រោមការគ្រប់គ្រងរបស់មេដឹកនាំត្រកូល គីម កូរ៉េខាងជើងជួបគ្រោះទុរភិក្សជាញឹកញយ។ គ្រោះរាំងស្ងួត ទឹកជំនន់បានធ្វើឲ្យប្រជាជនរងគ្រោះខ្វះអាហារ ប៉ុន្តែ ការគ្រប់គ្រងគ្មានប្រសិទ្ធិភាពជាមូលហេតុ សំខាន់ដែលបានបណ្តាលឲ្យមានគ្រោះទុរភិក្ស និងដែលបានសម្លាប់មនុស្សរាប់ពាន់ នាក់ ក្នុងទសវត្សរ៍ឆ្នាំ ៩០។ នេះគេមិនរាប់បញ្ចូលពីមហិច្ឆតា របស់ថ្នាក់ដឹកនាំកូរ៉េខាងជើង ដែលផ្តោតសំខាន់ថវិកាជាតិទៅលើកម្មវិធីផលិតអាវុធនុយក្លេអ៊ែរ ច្រើនជាងទៅលើប្រជាជន។
នៅរយៈពេល ៨ឆ្នាំចុងក្រោយនេះ ប្រជាជនកូរ៉េខាងជើងភាគច្រើនរស់អាស្រ័យនឹងជំនួយស្បៀងពីប្រទេសខាងក្រៅ ជាពិសេសពីកូរ៉េខាងត្បូង និងអាមេរិក។ ប៉ុន្តែ ការផ្គើនបាញ់សាកល្បងមីស៊ីលជាបន្តបន្ទាប់ របស់កូរ៉េខាងជើងបានធ្វើឲ្យអាមេរិកផ្តាច់ជំនួយស្បៀង កាលពីឆ្នាំ ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ