ការស្ទង់មតិ៖ គណបក្សរបស់លោកអាបេនឹងទទួលបានសំឡេងភាគច្រើននៅរដ្ឋសភា
នៅសល់តែ១០ថ្ងៃទៀតប្រជាជនជប៉ុនត្រូវទៅបោះឆ្នោតជាតិ ដែលត្រូវរៀបចំមុនកាលកំណត់ នៅថ្ងៃទី ១៤ធ្នូ។ ការស្ទង់មតិដែលធ្វើឡើងដោយកាសែត ជាច្រើន ក្នុងស្រុកជប៉ុន បានបង្ហាញរួចហើយ នៅថ្ងៃនេះ ថា គណបក្សសេរី ប្រជាធិបតេយ្យរបស់លោកនាយករដ្ឋមន្រ្តីជប៉ុន ស្ហ៊ីនហ្សូ អាបេនឹងទទួលបានសំឡេងផ្តាច់មុខ នៅសភា នៅក្នុងការបោះឆ្នោត នាពេលខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កាសែតធំៗរបស់ជប៉ុន ដូចជាAsahi Shimbun ឬទីភ្នាក់ងារព័ត៌មានជប៉ុនក្យូដូ សុទ្ធតែបង្ហាញថា គណបក្សសេរី ប្រជាធិបតេយ្យរបស់លោកនាយករដ្ឋមន្រ្តីស្ហ៊ីនហ្សូ អាបេនឹងមានសំណាងឈ្នះឆ្នោត យ៉ាងស្រួល នៅថ្ងៃបោះឆ្នោតសភា ថ្ងៃទី ១៤ធ្នូ។
ការព្យាករណ៍ទុកមុន បានមកពីលទ្ធផលនៃការស្ទង់មតិ ដែលកាសែតក្នុងស្រុកជប៉ុនបានធ្វើ កាលពីថ្ងៃអង្គារ និងថ្ងៃ ពុធម្សិលមិញ ជាមួយ ប្រជាជនជប៉ុនច្រើនជាង១សែននាក់។ តាមការចុះផ្សាយរបស់កាសែតជាច្រើនរបស់ជប៉ុន ការចុះខ្សោយ និងបែកបាក់ របស់គណបក្សប្រឆាំង "គណបក្សប្រជាធិបតេយ្យជប៉ុន" បានផ្តល់ចំណេញយ៉ាងច្រើន ទៅឲ្យគណបក្សកាន់អំណាច។ គេប៉ាន់ប្រមាណថា គណបក្សសេរី ប្រជាធិបតេយ្យរបស់លោកស្ហ៊ីនហ្សូ អាបេ តែម្នាក់ឯង នឹងប្រមូលបានសំឡេងភាគច្រើននៅសភា គឺច្រើនជាង ២៣៨ អាសនៈ នៅក្នុងចំណោមអាសនៈសរុបចំនួន ៤៧៥។ នេះគេនៅមិនទាន់បូកបញ្ចូលចំនួនកៅអីរបស់គណបក្សកណ្តាលនិយម ឈ្មោះ កូមេតូ ដែលចូលធ្វើជាដៃគូរបស់គណបក្សកាន់អំណាច ចាប់ពីឆ្នាំ ២០១២មក។
ដោយមានការចូលរួមពី គណបក្សកណ្តាលនិយម គណបក្សអភិរក្សនិយមរបស់លោកអាបេនឹងកាន់កាប់សំឡេងភាគច្រើន នៅរដ្ឋសភា។ ឱកាសដ៏ល្អនេះនឹងអនុញ្ញាតឲ្យអនាគតរដ្ឋាភិបាលរបស់លោកអាបេងាយស្រួលចេញច្បាប់នានា នោះបើទោះបីជាមានការបោះឆ្នោតប្រឆាំងពីព្រឹទ្ធសភាក្តី។
យ៉ាងណាក៏ដោយ មានប្រជាជនជប៉ុនដែលត្រូវគេសាកសួរជាច្រើន បានបង្ហាញទឹកចិត្តមិនរំភើបរីករាយនឹងចូលរួមនៅក្នុងការបោះឆ្នោតមុនកាលកំណត់នោះទេ។ តាមកាសែត មានតែមនុស្ស១ភាគ៣ ដែលត្រូវគេសាកសួរ បាននិយាយថា ពួកគេចង់ទៅបោះឆ្នោត ប៉ុន្តែ អ្នកនៅសល់ពីនោះបានបង្ហាញថា ពួកគេមិនត្រេកត្រអាលប៉ុន្មានចំពោះ ការបោះឆ្នោតមុនកាលកំណត់។
កាលពីពាក់កណ្តាលខែវិច្ឆិកា នៅពេលដែលតួលេខបង្ហាញថា ជប៉ុនមានសេដ្ឋកិច្ចដើរថយក្រោយ នាយករដ្ឋមន្រ្តីជប៉ុនបានប្រកាសរំលាយសភា និងការរៀបចំបោះឆ្នោតមុនកាលកំណត់ ដែលតាមពិតត្រូវធ្វើ នៅឆ្នាំ ២០១៧។ គេប៉ាន់ស្មានថា លោកអាបេចង់ឆ្លៀតយកការបោះឆ្នោតមុនកាលកំណត់ ដើម្បីស្វែងរកការគាំទ្រពីប្រជាជនសម្រាប់នយោបាយសេដ្ឋកិច្ច Abenomic របស់លោក។ ប៉ុន្តែ មានប្រជាជនជប៉ុនជាច្រើនបានបង្ហាញការខកចិត្ត ព្រោះ ដោយសារការបោះឆ្នោតមិនមែនជារឿង អាទិភាព ប៉ុន្តែ គឺបញ្ហាសេដ្ឋកិច្ចឯណោះទេ ដែលជាកង្វល់ចំបងរបស់ប្រជាជន។ គេរំពឹងដែរថា ដោយសារតែការមិនឲ្យតម្លៃ នឹងមានប្រជាជនជប៉ុនច្រើនគួរសមដែលនឹងមិនទៅចូលរួមបោះឆ្នោត នៅថ្ងៃទី ១៤ធ្នូខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ