លោកចន ឃែរីបំពេញទស្សនកិច្ចនៅកេនយ៉ាប្រទេសកំណើតរបស់ឪពុកលោកអូបាម៉ា
លោកចន ឃែរី ដែលទើបនឹងបញ្ចប់ដំណើរទស្សនកិច្ចនៅក្នុងប្រទេសស្រីលង្កា បានបន្តដំណើរទៅកាន់ប្រទេសកេនយ៉ា នៅថ្ងៃអាទិត្យនេះ ដើម្បីពង្រឹងសហប្រតិបត្តិការក្នុងការប្រយុទ្ធប្រឆាំងនឹងភេរវកម្មអ៊ីស្លាមជ្រុលនិយមនៅអាហ្វ្រិក។ ដំណើរទស្សនកិច្ចរបស់លោកចន ឃែរី ក៏មានគោលដៅផងដែរ ក្នុងការបិទបញ្ចប់ភាពចម្រូងចម្រាសខាងផ្នែកការទូតដែលបានកើតឡើងជាមួយកេនយ៉ា ក្នុងរយៈពេលប៉ុន្មានឆ្នាំចុងក្រោយនេះ។
ចុះផ្សាយនៅថ្ងៃ៖
ស្តាប់ - ០១:៣៩
កេនយ៉ា គឺជាប្រទេសកំណើតរបស់ឪពុកលោកអូបាម៉ា។ ក៏ប៉ុន្តែ គេសង្កេតឃើញថា ចាប់តាំងពីលោកអូបាម៉ាបានឡើងមកកាន់តំណែងជាប្រធានាធិបតីអាមេរិក លោកមិនដែលឈានជើងជាន់ទឹកដីកេនយ៉ាម្តងឡើយ។
លើសពីនេះទៅទៀត ទំនាក់ទំនងទ្វេភាគី អាមេរិក-កេនយ៉ាបានឆ្លងកាត់នូវភាពចម្រូងចម្រាសយ៉ាងខ្លាំង នៅក្នុងរយៈពេលប៉ុន្មានឆ្នាំចុងក្រោយនេះ គឺនៅក្រោយពេលដែលលោក អ៊ូរូ កេនយ៉ាតា ប្រធានាធិបតីកេនយ៉ា ត្រូវបានតុលាការព្រហ្មទណ្ឌអន្តរជាតិចោទប្រកាន់ពីឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងអំពើហិង្សាក្រោយការបោះឆ្នោត កាលពីចុងឆ្នាំ២០០៧ និងដើមឆ្នាំ២០០៨។
ដំណើរទស្សនកិច្ចរបស់លោក ចន ឃែរី នៅកេនយ៉ា នៅពេលនេះ គឺជាជំហានដ៏សំខាន់មួយ នៅក្នុងការស្តារទំនាក់ទំនងនឹងគ្នាឡើងវិញ ក្រោយពីបញ្ហាចម្រូងចម្រាសជុំវិញការស៊ើបអង្កេតរបស់តុលាការព្រហ្មទណ្ឌអន្តរជាតិត្រូវបិទបញ្ចប់ ដោយរដ្ឋអាជ្ញានៃតុលាការក្រុងឡាអេបានលើកការចោទប្រកាន់ពីប្រធានាធិបតីកេនយ៉ាវិញ កាលពីខែធ្នូកន្លងទៅ ក្នុងហេតុផលថាមិនមានភស្តុតាងគ្រប់គ្រាន់ ដើម្បីដាក់បន្ទុក។
លោកចន ឃែរី នឹងស្ថិតនៅក្នុងប្រទេសកេនយ៉ា រហូតដល់ថ្ងៃអង្គារ ហើយគ្រោងនឹងជួប ជាមួយនឹងថ្នាក់ដឹកនាំជាន់ខ្ពស់របស់កេនយ៉ា ក្នុងនោះក៏មានលោកប្រធានាធិបតី អ៊ូរូ កេនយ៉ាតាផងដែរ។
មន្រ្តីការទូតអាមេរិកដែលអមដំណើរលោកចន ឃែរី បានប្រាប់ទីភ្នាក់ងារព័ត៌មាន AFP ថា សំណុំរឿងសំខាន់ នៅក្នុងដំណើរទស្សនកិច្ចរបស់លោកចន ឃែរី នៅកេនយ៉ានេះ គឺការពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងនឹងក្រុមភេរវជនអ៊ីស្លាមជ្រុលនិយម ដែលជាសាខារបស់អាល់កៃដាប្រចាំនៅអាហ្វ្រិក។ សំណុំរឿងដ៏សំខាន់មួយទៀត គឺការត្រៀមរៀបចំដំណើរទស្សនកិច្ចរបស់លោកអូបាម៉ា ដែលគ្រោងនឹងធ្វើដំណើរទៅកាន់ប្រទេសកំណើតឪពុករបស់លោកជាលើកទី១ក្នុងឋានៈជាប្រធានាធិបតីអាមេរិក នៅខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ