តុលាការអេហ្ស៊ីបកាត់ទោសប្រហារជីវិតសកម្មជនគាំទ្រអតីតប្រធានាធិបតីមរស៊ីជាង៥០០នាក់
នៅថ្ងៃចន្ទម្សិលមិញ សាលាដំបូងអេហ្ស៊ីបបានកាត់ទោស សកម្មជនគាំទ្រអតីតប្រធានាធិបតីមរស៊ី៥២៩នាក់ អោយទទួលទោសប្រហារជីវិត ក្នុងបទចោទប្រកាន់ថា បានធ្វើឃាតមន្ត្រីប៉ូលិសមួយរូប នៅខេត្តអាន់ មីនយ៉ា ក្នុងអំពើហិង្សា កាលពីរដូវក្តៅឆ្នាំ ២០១៣កន្លងទៅ។ ការសម្រេចដាក់ទោសប្រហារជីវិតដល់មនុស្សជាង៥០០នាក់ បែបនេះ មិនដែលមានសោះឡើយ ក្នុងពិភពលោក។ ការសម្រេចទោសនេះ ប្រហែលជាអាចនឹងត្រូវលុបចោលទៅវិញ ព្រោះថា តុលាការបានសម្រេចទោសលឿនពេក ហើយមិនបានគោរពនិតិវិធីនិងសិទ្ធិបឋមនៃការការពារជនជាប់ចោទនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅខាងត្បូងក្រុងគែរ ប្រទេសអេហ្ស៊ីប បន្ទាប់ពីសកម្មជនគាំទ្រអតីតប្រធានាធិបតីមរស៊ី ៥២៩នាក់ ត្រូវបានសាលាដំបូងដាក់ទោសប្រហារជីវិត នៅថ្ងៃចន្ទម្សិលមិញមក នៅថ្ងៃអង្គារនេះ សវនាការកាត់ទោសនឹងបន្តធ្វើសម្រាប់សកម្មជនជាប់ចោទអ៊ីស្លាមប្រមាណ៧០០នាក់ទៀត ពីបទបង្កអំពើហិង្សា កាលពីខែសីហា ឆ្នាំ ២០១៣កន្លងទៅ។ គួររំលឹកថា ជនជាប់ចោទពីបទអំពើហិង្សានៅអេហ្ស៊ីប ដែលតុលាការត្រូវកាត់ទោស មានគ្នាសរុបប្រមាណ១២០០នាក់។
នៅថ្ងៃចន្ទម្សិលមិញ តុលាការបានសម្រេចយ៉ាងរហ័សបំផុត ដាក់ទោសប្រហារជីវិតដល់ជនជាប់ចោទ៥២៩នាក់ ពីបទបានធ្វើឃាតប៉ូលិសមួយរូបនៅខេត្តអាល់ មីនយ៉ា ប្រមាណ២៤៥គីឡូម៉ែត្រ ខាងត្បូងក្រុងគែរ។ ការសម្រេចដាក់ទោសរហ័សបែបនេះ ធ្វើអោយមានការគិតថា តុលាការមានភាពលំអៀងខាងនយោបាយ ព្រោះថា តើអាចទៅរួចទេ ដែលមនុស្សរហូតជាង៥០០នាក់ នាំគ្នាសម្លាប់ប៉ូលិសតែម្នាក់ ? យោងតាមអ្នកជំនាញច្បាប់នានា តុលាការមិនបានគោរពនិតិវិធី និងសិទ្ធិការពារបឋមនានារបស់ជនជាប់ចោទសោះឡើយ ដូច្នេះ ជនជាប់ចោទអាចនឹងទទួលបានការបន្ធូរបន្ថយទោស នៅតុលាការកំពូល។ ដោយឡែក នៅថ្ងៃចន្ទម្សិលមិញ តុលាការបានសម្រេចអោយមនុស្ស១៧នាក់ បានរួចខ្លួន។ គួរបញ្ជាក់ថា ក្នុងចំណោមសកម្មជនអ៊ីស្លាមទទួលទោសប្រហារជីវិត៥២៩នាក់ មានតែ១៥៣នាក់ប៉ុណ្ណោះ ដែលជាប់ឃុំ។ សកម្មជនផ្សេងទៀតកំពុងរត់គេចខ្លួន។ នេះជាលើកទី១ហើយ ដែលការសម្រេចដាក់ទោសប្រហារជីវិតលើមនុស្សសន្ធឹកសន្ធាប់បែបនេះ បានកើតឡើង ជាប្រវត្តិសាស្ត្រ មិនត្រឹមសម្រាប់អេហ្ស៊ីបតែមួយប៉ុណ្ណោះទេ គឺសម្រាប់ពិភពលោកទាំងមូលតែម្តង។ នេះបើយោងតាមអង្គការAmnesty International។
គួររំលឹកថា អំពើហិង្សាថ្ងៃ១៤សីហាឆ្នាំ២០១៣ នៅអេហ្ស៊ីប ជាអំពើហិង្សាសម្លាប់មនុស្សច្រើនបំផុតក្នុងប្រវត្តិប្រទេសនេះ។ កាលណោះ ប៉ូលិសនិងកងទ៍ពបានបើកប្រតិបត្តិការបង្ក្រាបបាតុកម្មរបស់សកម្មគាំទ្រអតីតប្រធានាធិបតីមរស៊ី នៅក្រុងគែរ ធ្វើអោយស្លាប់មនុស្សរាប់រយនាក់។ តាំងពីលោកមរស៊ីត្រូវកងទ័ពទម្លាក់ពីអំណាច នៅថ្ងៃ៣កក្កដាឆ្នាំ២០១៣មក អំពើហិង្សាតែងកើតមានជាប្រចាំ។ គិតពីថ្ងៃ៣កក្កដាមក សកម្មជនគាំទ្រលោកមរស៊ីជាង១៤០០នាក់ហើយ ដែលត្រូវបានស្លាប់ក្នុងការបង្ក្រាបហិង្សារបស់អាជ្ញាធរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ