ស្លាប់៤នាក់ ក្នុងភេរវកម្មវាយប្រហាររថយន្តដឹកភ្ញៀវទេសចរកូរ៉េ នៅអេហ្ស៊ីប
នៅស៊ីណៃ ប្រទេសអេហ្ស៊ីប ថ្ងៃអាទិត្យម្សិលមិញ ការផ្ទុះគ្រាប់បែកមួយ បានវាយប្រហាររថយន្តដឹកភ្ញៀវទេសចរកូរ៉េខាងត្បូង មួយគ្រឿង សម្លាប់ភ្ញៀវទេសចរកូរ៉េ៣នាក់ និងអ្នកបើកបររថយន្ត ជាជនជាតិអេហ្ស៊ីបម្នាក់។ ភេរវកម្មនេះក៏បានបង្កអោយមានមនុស្ស១៥នាក់ទៀតរបួសផងដែរ។ ប៉ូលិសកំពុងស៊ើបអង្កេតរកជនដៃដល់បង្កការផ្ទុះនេះ។ ក្រុមជីហាដ អាន់សា បេត អាល់ម៉ាក់ដេស ជាក្រុមជិតដិតនឹងក្រុមអាល់កៃដា ប្រហែលជាក្រុមដែលបានបង្កភេរវកម្មនេះ។ នេះជាអំពើភេរវកម្មទី១ហើយ ដែលវាយប្រហារភ្ញៀវទេសចរបរទេស នៅអេហ្ស៊ីប ចាប់តាំងពីកងទ័ពអេហ្ស៊ីបបានទំលាក់អតីតប្រធានាធិបតីមរស៊ី ពីអំណាចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
រថយន្តទេសចរដែលរងការបំផ្ទុះគ្រាប់បែកនៅស៊ីណៃ ប្រទេសអេហ្ស៊ីប ថ្ងៃអាទិត្យម្សិលមិញនេះ ជារថយន្តដឹកភ្ញៀវទេសចរកូរ៉េខាងត្បូង ៣១នាក់ សុទ្ធតែជាគ្រិស្តសាសនិកមកពីវិហារមួយកន្លែង នៅខេត្ត ជីនឆឺរ៉ុង ភាគខាងត្បូង ប្រទេសកូរ៉េខាងត្បូង។ រថយន្តទេសចរនេះ ធ្វើដំណើរមកពីទីក្រុងគែរ ហើយនៅព្រំដែនតាបា ជាប់ជាមួយអ៊ីស្រាអែល រថយន្តនេះត្រៀមរង់ចាំបរចូលក្នុងទឹកដីអ៊ីស្រាអែល។
យោងតាមឯកអគ្គរដ្ឋទូតកូរ៉េខាងត្បូងនៅអេហ្ស៊ីប នេះជាអំពើភេរវកម្មអត្តឃាត ព្រោះថា ការផ្ទុះបានកើតឡើង បន្ទាប់ពីមានបុរសម្នាក់បានឡើងទៅក្នុងរថយន្តទេសចរនោះភ្លាមៗតែម្តង។ ភេរវកម្មសម្លាប់ទេសចរជនជាតិកូរ៉េខាងត្បូង ម្សិលមិញនេះ បានធ្វើអោយក្រសួងការបរទេសកូរ៉េខាងត្បូងសំដែងការខឹងក្តៅក្រហាយ និងប្រាប់ថា រងការប៉ះទង្គិចចិត្តដោយសារហេតុការណ៍នេះ។ អគ្គលេខាធិការអង្គការសហប្រជាជាតិ បាន គីមូន ដែលជាជនជាតិកូរ៉េខាងត្បូងដែរនោះ បានថ្កោលទោសអំពើភេរវកម្មនេះ។
នេះជាលើកទី១ហើយ ដែលអំពើភេរវកម្មបានកើតឡើងនៅអេហ្ស៊ីប វាយប្រហារភ្ញៀវទេសចរបរទេស គិតចាប់ពីពេលដែលកងទ័ពអេហ្ស៊ីប បានទំលាក់អតីតប្រធានាធិបតីមរស៊ីពីអំណាច កាលពីដើមខែកក្កដា ឆ្នាំ២០១៣មក។ គេនៅចាំបានថា នៅឆ្នាំ១៩៩៧ ក្រុមបះបោរអ៊ីស្លាមបានសម្លាប់អ្នកទេសចរបរទេស៥៨នាក់ នៅលុចសរ ភាគខាងត្បូងអេហ្ស៊ីប។ ចន្លោះឆ្នាំ២០០៤និងឆ្នាំ២០០៦ ភេរវកម្មជាច្រើននៅស្ថានីយងូតទឹកនៅស៊ីណៃ ក៏បានសម្លាប់អ្នកទេសចរអេហ្ស៊ីបនិងអ្នកទេសចរបរទេសជាច្រើននាក់ដែរ។ ស្ត្រីទេសចរបារាំម្នាក់ ក៏ត្រូវបានស្លាប់ កាលពីខែកុម្ភៈឆ្នាំ ២០០៩ ក្នុងភេរវកម្មមួយ នៅទីក្រុងគែរដែរ។
ចាប់ពីប្រមុខទ័ពអាល់ ស៊ីសស៊ី បានឡើងកាន់អំណាចបានជាង៧ខែមក ស្ថានភាពសន្តិសុខបានធ្លាក់ដុនដាប។ មនុស្សជាង១៤០០នាក់ហើយ ភាគច្រើនជាក្រុមបាតុករអ៊ីស្លាម ត្រូវបានកងទ័ពរឺក៏ប៉ូលិសអេហ្ស៊ីបសម្លាប់។
ទន្ទឹមនេះដែរ អំពើភេរវកម្មជាច្រើន បានផ្ទុះឡើងប្រឆាំងកងទ័ពនិងប៉ូលិសនៅក្រុងគែរ សងសឹកកងទ័ពដែលបានទំលាក់អតីតប្រធានាធិបតីមរស៊ី និងបង្ក្រាបបាតុកម្មសកម្មជនភាតរអ៊ីស្លាម។ ភេរវកម្មប្រឆាំងប៉ូលិសភាគច្រើន ជាស្នាដៃរបស់ក្រុមជីហាដ អាន់សា បេត អាល់ម៉ាក់ដេស ដែលជាក្រុមយកគំរូតាមក្រុមអាល់កៃដា។ ប៉ុន្តែរដ្ឋាភិបាលអេហ្ស៊ីបទំលាក់កំហុសទាំងអស់នេះ ទៅលើសកម្មជនបក្សភាតរអ៊ីស្លាមរបស់លោកមរស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ