បណ្តាប្រទេសអាស៊ានបារម្ភពីផលវិបាកបង្កដោយនយោបាយធនាគារកណ្តាលអាមេរិក
នៅថ្ងៃសៅរ៍ម្សិលមិញ ក្នុងកិច្ចប្រជុំនៅភូមា រដ្ឋមន្ត្រីហិរញ្ញវត្ថុបណ្តាប្រទេសអាស៊ានទាំង១០ បានអំពាវនាវអោយមានការប្រុងប្រយ័ត្នចំពោះផលវិបាកនានាដែលអាចបង្កឡើងដោយនយោបាយរបស់ធនាគារកណ្តាលអាមេរិក ហៅកាត់ថា ធនាគារFED។ ធនាគារកណ្តាលអាមេរិកកំពុងចាប់ផ្តើមកាត់បន្ថយជំនួយសម្រាប់សេដ្ឋកិច្ចអាមេរិក ជាមូលហេតុធ្វើអោយអ្នកវិនិយោគដកដើមទុនរកស៊ីរបស់ខ្លួន ចេញពីបណ្តាប្រទេសអាស៊ាន ដើម្បីត្រលប់ទៅរកស៊ីនៅអាមេរិកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ក្នុងជំនួបប្រជុំនៅភូមាម្សិលមិញ រដ្ឋមន្ត្រីក្រសួងហិរញ្ញវត្ថុនៃប្រទេសអាស៊ានទាំង១០ បានសំដែងការព្រួយបារម្ភចំពោះផលវិបាកនានា ដែលអាចបង្កឡើងដោយនយោបាយរបស់ធនាគារកណ្តាលអាមេរិក ហៅកាត់ថា ធនាគារFED។ មូលហេតុគឺថា ធនាគារFED កំពុងកាត់បន្ថយការគាំទ្រនិងជំនួយដែលខ្លួនធ្លាប់ជួយដល់សេដ្ឋកិច្ចសហរដ្ឋអាមេរិក។ ដូច្នេះ អ្នកវិនិយោគនានា ដែលធ្លាប់ដាក់ដើមទុនរកស៊ី ក្នុងបណ្តាប្រទេសអាស៊ាន ក៏ចាប់ផ្តើមដកដើមទុនរបស់ខ្លួន ដើម្បីត្រលប់ទៅរកស៊ីនៅអាមេរិកវិញ។
គួររំលឹកថា ធនាគារកណ្តាលអាមេរិកមានគោលនយោបាយបង្កើតរូបិយបណ្ណ និងទិញយកបំណុលពីស្ថាប័នហិរញ្ញវត្ថុនានា។ នយោបាយនេះជួយជំរុញសំទុះសេដ្ឋកិច្ច និងជំរុញទឹកចិត្តសហគ្រាស និងគ្រួសារជាច្រើនអោយហ៊ានខ្ចីប្រាក់កាស។ ដោយសារនយោបាយនេះ ចាប់ពីឆ្នាំ២០០៨មក អ្នកវិនិយោគជាច្រើនបាននាំគ្នាមកដាក់ទុនរកស៊ីក្នុងបណ្តាប្រទេសអាស៊ានដែលមានឧស្សាហកម្មកំពុងរីកលូតលាស់ បែបយ៉ាងនៅឥណ្ឌូណេស៊ី ហ្វីលីពីន រឺក៏ថៃ ដើម្បីរកផលចំណេញ។ ប៉ុន្តែ ឥឡូវនេះ សេដ្ឋកិច្ចអាមេរិកចាប់ផ្តើមងើបក្បាលឡើងបន្តិចម្តងៗ ធ្វើអោយធនាគារកណ្តាលអាមេរិកចាប់ផ្តើមកាត់បន្ថយជំនួយខ្លួនសម្រាប់សេដ្ឋកិច្ចអាមេរិកផងដែរ។ ដូច្នេះ ជាផលវិបាកជាក់ស្តែង អ្នកវិនិយោគក៏ត្រូវដកដើមទុនរកស៊ី ពីបណ្តាប្រទេសអាស៊ាន ត្រលប់ទៅវិនិយោគនៅអាមេរិកវិញ ហើយរូបិយបណ្ណនៅប្រទេសអាស៊ានដូចជាឥណ្ឌូណេស៊ី បានធ្លាក់ចុះភ្លាមៗផងដែរ។
ជាដំណោះស្រាយ បណ្តាប្រទេសអាស៊ានផ្តោតការយកចិត្តទុកដាក់លើការកាត់បន្ថយឱនភាពថវិកាក្នុងស្រុក និងទប់ស្កាត់ការបញ្ចេញលុយសុទ្ធចេញពីបណ្តាប្រទេសអាស៊ានទៅបរទេស។ ទោះយ៉ាងនេះក្តី ធនាគារអភិវឌ្ឍអាស៊ី បានលើកឡើងថា នៅពេលនេះ គ្រឹះម៉ាក្រូសេដ្ឋកិច្ចរបស់អាស៊ានមានលក្ខណៈរឹងមាំជាងកាលពីឆ្នាំ១៩៩៧ ជាឆ្នាំដែលអាស៊ានរងវិបត្តិហិរញ្ញវត្ថុ។
ធនាគារអភិវឌ្ឍអាស៊ីរំពឹងថា អាស៊ាននឹងជួបកំណើនចាប់ពី៥ភាគរយឡើងទៅ ក្នុងឆ្នាំ២០១៤នេះ ហើយកំណើននេះឡើងដល់៥,៤ភាគរយ នៅឆ្នាំ២០១៥។ គួររំលឹកដែរថា ចាប់ពីពេលនេះរហូតឆ្នាំ២០១៥ បណ្តាប្រទេសអាស៊ានដែលមានប្រជាជនសរុប ៦០០លាននាក់នោះ ចង់បង្កើតអោយមានសហគមន៍សេដ្ឋកិច្ចមួយ ដើម្បីងាយស្រួលប្រកួតប្រជែងជាមួយចិននិងឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ