លទ្ធផលនៃកិច្ចសន្ទនាតាមទូរស័ព្ទរបស់ដូណាល់ ត្រាំ ជាមួយមេដឹកនាំធំៗ
កាលពីថ្ងៃសៅរ៍ទី២៨ មករា លោកដូណាល់ ត្រាំ ប្រធានាធិបតីសហរដ្ឋអាមេរិក បានទូរស័ព្ទនិយាយឆ្លើយឆ្លង ជាលើកដំបូងបង្អស់ ជាមួយមេដឹកនាំធំៗពិភពលោក មានលោកប្រធានាធិបតីរុស្ស៊ី លោកស្រីអធិការបតីអាល្លឺម៉ង់ លោកនាយករដ្ឋមន្ត្រីជប៉ុន និងលោកប្រធានាធិបតីបារាំង។ ការសន្ទនាតាមទូរស័ព្ទនេះ គឺជាឱកាសដែលលោកប្រធានាធិបតីអាមេរិកថ្មី ត្រូវបង្ហាញគោលជំហរ ស្តីពីនយោបាយកិច្ចការបរទេស ព្រមទាំងសហប្រតិបត្តិការ ជាមួយប្រទេសមហាអំណាចផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៣៥
អ្វីដែលគេរំពឹងរងចាំតាមដានជាយូរមកហើយ បានកើតមានឡើងកាលពីថ្ងៃសៅរ៍ ទី២៨មករា នៅពេលដែលលោកដូណាល់ ត្រាំ បានទូរស័ព្ទទៅនិយាយ ជាមួយមេដឹកនាំប្រទេសមហាអំណាចផ្សេងទៀត មានជប៉ុន បារាំង អាល្ហឺម៉ង់ និងរុស្ស៊ី។ អ្វីដែលធ្វើឲ្យគេចង់តាមដាន ក៏ដោយសារតែកន្លងមកនេះ លោកដូណាល់ ត្រាំ បាននិយាយរិះគន់សហភាពអឺរ៉ុប និងជាពិសេសលោកស្រីអង់ហ្គេឡា មែរគែល ដោយចំហរ។ បន្ថែមពីនេះ លោកដូណាល់ ត្រាំ បានសម្រេចដកខ្លួនសហរដ្ឋអាមេរិកចេញពីកិច្ចព្រមព្រៀងពាណិជ្ជកម្មសេរី អន្តរប៉ាស៊ីហ្វិក ធ្វើឲ្យជប៉ុនខកចិត្តជាខ្លាំង។ ហើយចុងក្រោយ គឺគេចង់ដឹងថា លោកត្រាំ ប្រកាន់សំដីបែបណាជាមួយលោកពូទីន ប្រធានាធិបតីរុស្ស៊ី ដែលគ្រប់គ្នាជឿថា បានជួយជ្រោមជ្រែងឲ្យលោកដូណាល់ ត្រាំ បានឈ្នះឆ្នោត។
អ្វីដែលគេសង្កេតឃើញ ក្នុងកិច្ចសន្ទនាតាមទូរស័ព្ទរបស់លោកត្រាំ ជាមួយមេដឹកនាំប្រទេសទាំង៤ គឺលោកត្រាំហាក់ប្រកាន់ជំហរកណ្តាល មិនក្អេងក្អាងត្រគោះបោះបោកដូចសព្វមួយដង។
ជាមួយលោកនាយករដ្ឋមន្ត្រីជប៉ុន លោកត្រាំបាននិយាយថា សហរដ្ឋអាមេរិក នឹងបន្តបំពេញតួនាទី ធានាសន្តិសុខជូនជប៉ុនយ៉ាងម៉ដ្ឋចត់។ ក្នុងន័យនេះ យើងអាចយល់បានថា លោកដូណាល់ ត្រាំចង់សំដៅដល់ការគំរាមកំហែងរបស់ចិនដោយប្រការណាមួយ មកលើជប៉ុន ហើយថាអាមេរិក នៅខាងជប៉ុនជានិច្ច។ លោក ស៊ិន ហ្សូអាបេ នឹងអញ្ជើញមកជួបលោកត្រាំ នៅថ្ងៃ១០កុម្ភៈខាងមុខ។ គួររំលឹកដែរថា លោកដូណាល់ ត្រាំ មិនបានទូរស័ព្ទទៅនិយាយជាមួយលោកស៊ី ជីនពីង ប្រធានាធិបតីចិនទេ។
ជាមួយនឹងលោកស្រីអង់ហ្គេឡា មែរគែល លោកដូណាល់ត្រាំ បានទប់មាត់ទប់ក មិនរិះគន់លោកស្រី ដូចកាលពីប៉ុន្មានថ្ងៃមុនទេ។ បើយោងតាមលិខិតជូនដំណឹងរបស់សេតវិមាន ស្តីពីកិច្ចសន្ទនានេះ មេដឹកនាំទាំងពីរ អាមេរិក អាល្លឺម៉ង់ បានយល់ឃើញដូចគ្នាពីតួនាទីរបស់OTAN ក្នុងការរក្សាស្ថិរភាព និងសន្តិសុខ ក្នុងតំបន់អាត្លង់ទិកខាងជើង។ លោកត្រាំថាលោកនឹងអញ្ជើញលោកស្រី អង់ហ្គេឡា មែរគែល មកវ៉ាស៊ីងតុន ក្នុងពេលខាងមុខ។
ចំណែកជាមួយលោកពូទីន ប្រធានាធិបតីរុស្ស៊ីវិញ មេដឹកនាំទាំងពីរ បានសន្យាថា នឹងរួមកម្លាំងគ្នា ដើម្បីវាយកម្ទេចក្រុមជីហាតអង្គការរដ្ឋអ៊ីស្លាម នៅស៊ីរី។ នេះបើយោងតាមការប្រកាសរបស់វិមានក្រឹមឡាំង។ ជាការពិត ខាងសេតវិមាន បានព្រលយពាក្យឲ្យដឹងជាមុនថា រដ្ឋាភិបាលលោកត្រាំ មានគម្រោងបញ្ជូនកម្លាំងទៅសហការជាមួយកងទ័ពរុស្ស៊ី នៅស៊ីរី។ ក្រៅពីនេះ លោកត្រាំ និងលោកពូទីន បានសន្យាថានឹងចាប់ដៃគ្នា ធ្វើសហប្រតិបត្តិការដោយស្មើភាពគ្នា ក្នុងន័យកសាង និងបានផលប្រយោជន៍ឈ្នះៗទាំងអស់គ្នា។
ជាចុងក្រោយ មានតែលោកប្រធានាធិបតីបារាំងម្នាក់ទេ ដែលហ៊ានបញ្ចេញយោបល់ រិះគន់ និងក្រើនរំលឹកលោកដូណាល់ ត្រាំ។ លោកហ្វ្រង់ស័រ ហូឡង់ បានលើកឡើងពីគ្រោះថ្នាក់ នៃនយោបាយបិទទ្វារសំងំយកសុខតែម្នាក់ឯងរបស់លោកត្រាំ។ សម្រាប់លោកហូឡង់ នយោបាយបែបនេះ គឺរឹតតែធ្វើឲ្យពិភពលោកបែកបាក់ ស្អប់គ្នា ប្រកាន់គ្នា ហើយស្របពេលនេះ ចលនាចរន្តគំនិតជ្រុលនិយម នឹងកាន់តែមានកម្លាំង។ លោកប្រធានាធិបតីបារាំង បាននិយាយបែបដាស់តឿនលោកត្រាំថា ក្នុងនាមជាមេដឹកនាំមហាអំណាចប្រជាធិបតេយ្យ យើងត្រូវធ្វើគំរូល្អ ដើម្បីការពារគោលការណ៍គ្រិះនៃប្រជាធិបតេយ្យ។ ការទទួលយកជនភៀសខ្លួន ដែលរត់គេចពីសង្រ្គាម ពីការកាប់សម្លាប់ ក៏គឺជាតំលៃមួយ នៃប្រជាធិបតេយ្យដែរ។
សូមបញ្ជាក់ថា បន្ទាប់ពីនិយាយទូរស័ព្ទជាមួយមេដឹកនាំប្រទេសមហាអំណាចទាំង៤ខាងលើ នៅថ្ងៃអាទិត្យនេះ លោកត្រាំ និងទូរស័ព្ទទៅនិយាយជាមួយព្រះចៅសាល់ម៉ាន់ នៃប្រទេសអារ៉ាប៊ីសាអូឌីត បន្ទាប់មកទៀត ជាមួយព្រះអង្គម្ចាស់ Mohammed Ben Zayed នៃប្រទេសអេមៀរ៉ាត់អារ៉ាប់រួម ហើយនិងចុងក្រោយ គឺលោកត្រាំនឹងទូរស័ព្ទទៅនិយាយជាមួយលោកប្រធានាធិបតីស្តីទី របស់កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ