លទ្ធផលស្តួចស្តើងនៃជំនួបកំពូលក្រុមប្រទេស G២០ ក្នុងទីក្រុងតូរ៉ុងតូ
ជំនួបកំពូលក្រុមប្រទេស G២០បានបិទបញ្ចប់កាលពីយប់ថ្ងៃអាទិត្យ ទី២៧ មិថុនា ក្នុងទីក្រុងតូរ៉ុងតូ ប្រទេសកាណាដា។ ជាលទ្ធផលផ្លូវការ G២០បានដាក់ចេញនូវគោលការណ៍សំខាន់ៗមួយចំនួនមានជាអាទិ៍៖ ជំរុញឲ្យមានកំណើនសេដ្ឋកិច្ច និងកាត់បន្ថយបំណុលសាធារណៈ។ ក្នុងករណីនេះ G២០បានទុកឲ្យប្រទេសនីមួយៗចាត់វិធានការទៅតាមស្ថានភាពជាក់ស្តែង របស់ខ្លួន។ ទាក់ទងនឹងការយកពន្ធអាករលើសេវាធនាគាររវាងប្រទេស និងប្រទេសដែលជាសំណើរបស់ប្រទេសអាឡឺម៉ង់ និងបារំាង G២០បានទុកសិទ្ធិឲ្យប្រទេសនីមួយៗជាអ្នកសម្រេចដោយខ្លួនឯង ដើម្បីចៀសវាងកុំឲ្យកើតវិបត្តិជាថ្មីទៀត។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
តើត្រូវធ្វើដូចម្តេច ដើម្បីជំរុញឲ្យមានកំណើនសេដ្ឋកិច្ច ដោយមិនបង្កើនបំណុលសាធារណៈ ? នេះហើយជាការចង់បានរបស់ក្រុមប្រទេស G២០។ ទីបំផុតទៅ G២០បានសម្រុះសម្រួលដោយមិនឲ្យភាគីណាមួយបាក់មុខ មាត់ទេ ទំាងសហរដ្ឋអាមេរិក ក៏ដូចសហភាពអឺរ៉ុប។
នៅក្នុងសេចក្តីថ្លែងការណ៍រួម G២០បានជំរុញឲ្យមានកំណើនសេដ្ឋកិច្ចដូចការចង់បានរបស់អាមេរិក តែទន្ទឹមគ្នានេះ G២០ក៏បានស្នើឲ្យបណ្តាប្រទេសអភិវឌ្ឍន៍កាត់បន្ថយបំណុលសាធារណៈរបស់ខ្លួនចំនួនពាក់កណ្តាលចាប់ពីពេលនេះ ទៅទល់នឹងឆ្នំា ២០១៣ ដូចដែលបណ្តាប្រទេសសមាជិកសហភាពអឺរ៉ុបបានអនុវត្តកន្លងមក។
យ៉ាងណាក៏ដោយ គ្រប់វិធានការទំាងអស់ខាងលើ G២០បានទុកសិទ្ធិឲ្យប្រទេសនីមួយៗជាសម្រេចដោយខ្លួនឯង ដោយផ្អែកលើស្ថានភាពជាក់ស្តែងរបស់ប្រទេសនីមួយៗ។ ឧទាហរណ៍ ប្រទេសជប៉ុនដែលកំពុងមានបំណុលដ៏ច្រើនសម្បើម មិនអាចកាត់បន្ថយឲ្យបានឆាប់នូវបំណុលរបស់ខ្លួនទេ និយាយបែបផ្សេង ប្រទេសនីមួយៗចាត់វិធានការទៅតាមលទ្ធភាព និងសមត្ថភាពដែលខ្លួនមាន។
ទាក់ទងនឹងការយកពន្ធអាករលើសេវាធនាគាររវាងប្រទេស និងប្រទេសដែលជាសំណើរបស់ប្រទេសអាឡឺម៉ង់ និងបារំាង G២០ មិនបានចាប់បង្ខំប្រទេសណាមួយឲ្យអនុវត្តទេ។ តែលោកប្រធានាធិបតីបារំាង Nicolas Sarkozy និងលោកស្រីនាយករដ្ឋមន្រ្តីអាឡឺម៉ង់ Angela Merkel បានប្រកាសប្រាប់ឲ្យដឹងថា គេនឹងផ្តើមអនុវត្តវិធានការនេះនៅក្នុងប្រទេសរបស់ខ្លួន។
ទាក់ទងនឹងក្រុមប្រទេសដែលកំពុងមានសេដ្ឋកិច្ចលូតលាស់ ឬហៅប្រទេសអ្នកមានថ្មី G២០ បានស្នើឡើងនូវពីរចំណុច ទីមួយ៖ ធ្វើឲ្យមានសមតានៅក្នុងតម្រូវការពិភពលោក និងទីពីរ៖ កំណត់អត្រាតម្លៃរូបិយប័ណ្ណជាតិរបស់ខ្លួនឲ្យស្របតាមតម្លៃទីផ្សារសេរី។ ត្រង់ចំណុចនេះ G២០ ចង់និយាយសំដៅប្រទេសចិនដែលបានរក្សាតម្លៃប្រាក់យ័នរបស់ខ្លួន ឲ្យមានតម្លៃទាបជ្រុលប្រៀបនឹងប្រាក់ដុល្លារអាមេរិកំាង។
ចុងក្រោយ G២០ បានជំរុញក្រុមប្រទេសអ្នកមានឲ្យគោរពពាក្យសន្យារបស់ខ្លួន ក្នុងការជួយអភិវឌ្ឍន៍ដល់ក្រុមប្រទេសក្រីក្រ។ កន្លងមក ក្រុមប្រទេសអ្នកមានបានសន្យាច្រើនរាប់មិនអស់ក្នុងការជួយប្រទេសក្រីក្រ តែពាក្យសន្យាមានតែនៅលើក្រដាស ដោយគ្មានការអនុវត្តន៍ជាក់ស្តែងទេ។
សរុបមកវិញ ជំនួបកំពូលក្រុមប្រទេស G២០ ក្នុងឆ្នំា ២០១០ នៅប្រទេសកាណាដា បានបិទបញ្ចប់ទៅ ដោយគ្មានលទ្ធផលអ្វីជាដុំកំភួនទេ។ ជំនួបកំពូលក្រុមប្រទេស G២០ នៅឆ្នំា ២០១១ ខាងមុខ នឹងត្រូវរៀបចំនៅក្នុងប្រទេសកូរ៉េខាងត្បូង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ