ជំនួបកំពូល G៨៖ ៥ពាន់លានដុល្លារ ដើម្បីទ្រទ្រង់វិស័យគំាពារមាតា និងទារកក្នុងប្រទេសក្រីក្រ
ចាប់ពីថ្ងៃសៅរ៍ ទី២៦ មិថុនា ដល់ថ្ងៃអាទិត្យ ទី២៧ មិថុនា ឆ្នំា ២០១០ ក្រុមប្រទេស G២០ បើកជំនួបកំពូលនៅក្នុងទីក្រុងតូរ៉ុងតូ (Toronto) ប្រទេសកាណាដា។ នៅក្នុងជំនួបកំពូលរបស់ក្រុមប្រទេស G៨កាលពីម្សិលមិញ មានទឹកប្រាក់ចំនួន ៥ពាន់លានដុល្លារ ដែល G៨បានប្រកាសដើម្បីជួយ ទ្រទ្រង់វិស័យគំាពារមាតា និងទារកនៅក្នុងបណ្តាប្រទេសកំពុងអភិវឌ្ឍន៍លើពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
G៨ គឺជាក្រុមប្រទេសដែលមានឧស្សាហកម្មជឿនលឿនជាងគេលើពិភពលោក ក្នុងនោះមាន សហរដ្ឋអាមេរិក ជប៉ុន អាឡឺម៉ង់អង់គ្លេស បារាំង អ៊ីតាលីកាណាដានិងប្រទេសរុស្ស៊ីដែលទើបបញ្ចូលបន្ថែមនៅក្នុងសម័យលោកប្រធានាធិបតីអាមេរិកប៊ីលគ្លីនតុន។ ចំណែកឯក្រុមប្រទេស G២០ គឺមានក្រុមប្រទេស G៨ បូកនឹង ១២ប្រទេសផ្សេងទៀតក្នុងនោះ ៥ប្រទេសមកពីអាស៊ី-ប៉ាស៊ីហ្វិក មានចិន ឥណ្ឌា កូរ៉េខាងត្បូងឥណ្ឌូនេស៊ី និងអូស្រ្តាលី។
៣ប្រទេសមកពីអាមេរិកឡាទីន មានប្រេស៊ីល ម៉ិចស៊ិក និងអារហ្សង់ទីន។
២ប្រទេសមកពីមជ្ឈិមបូព៌ាមានទួរគី និងអារ៉ាប៊ី សាអ៊ូឌីត។ ប្រទេសមួយមកពីទ្វីបអាហ្រ្វិក គឺអាហ្រ្វិកខាងត្បូង និងសមាជិកទី១២គឺសហភាពអឺរ៉ុប។
មុននឹងបើកជំនួបកំពូលក្រុមប្រទេស G២០ នាពេលរាត្រី ជំនួបកំពូលក្រុមប្រទេសG៨ បានបន្តការងាររបស់ខ្លួននៅថ្ងៃនេះ ដោយលើកយកបញ្ហាអន្តរជាតិមួយចំនួនទៀតទៅនិយាយ ពិសេស អំពីបញ្ហាសន្តិសុខសង្គម និងសន្តិភាពលើពិភពលោក។ កាលពីម្សិលមិញ ថ្នាក់ដឹកនំាក្រុមប្រទេស G៨ បានប្រកាសនូវមូលនិធិមួយដែលមានទឹកប្រាក់ចំនួន ៥ពាន់លានដុល្លារ ទុកសម្រាប់ជួយទ្រទ្រង់វិស័យគំាពារមាតា និងទារកនៅក្នុងបណ្តាប្រទេសកំពុងអភិវឌ្ឍន៍។
កាណាដាជាប្រទេសម្ចាស់ផ្ទះដែលមានគំនិតបង្កើតឲ្យមានមូលនិធិសម្រាប់ទ្រទ្រង់វិស័យគំាពារមាតា និងទារកនៅក្នុងបណ្តាប្រទេសក្រីក្រ។ មូលនិធិនេះត្រូវបានគេហៅថា « មូលនិធិ Muskoka »។ Muskoka គឺជាឈ្មោះតំបន់មួយរបស់ប្រទេសកាណាដា និងជាកន្លែងប្រជុំរបស់ក្រុមប្រទេស G៨ក្នុងឆ្នំា ២០១០នេះ។ ចំនួនទឹកប្រាក់ទំាង ៥ពាន់លានដុល្លារដើម្បីជួយទ្រទ្រង់វិស័យគំាពារមាតា និងទារកនៅក្នុងបណ្តាប្រទេសកំពុងអភិវឌ្ឍន៍ គឺសម្រាប់ប្រើប្រាស់រយៈពេល ៥ឆ្នំា។ មួយវិញទៀត ក្រៅពីការចូលរួមចំណែករបស់ក្រុមប្រទេស G៨ ក៏មានការចូលរួមវិភាគទានពីប្រទេសមួយចំនួនទៀតដែលមិនមែនជាសមាជិក G៨ ក្នុងនោះមានប្រទេសហូឡង់ នូវែលហ្សេឡង់ កូរ៉េខាងត្បូង អេស្ប៉ាញ ស្វីស មូលនិធិរបស់មហាសេដ្ឋី Bill Gates និងមូលនិធិរបស់អង្គការសហប្រជាជាតិ។ បើនិយាយតែនៅក្នុងចំណោមក្រុមប្រទេស G៨ គេនៅមិនទាន់បានកំណត់ថា តើប្រទេសណាត្រូវចេញប៉ុន្មាននោះទេ។ តែមានប្រទេសមួយចំនួនបានសន្យារួចហើយ ដូចយ៉ាងសហរដ្ឋអាមេរិកបានសន្យាផ្តល់ជាង ១ពាន់ ៣រយលានដុលា្លរសម្រាប់រយៈពេល ២ឆ្នំា។ ប្រទេសកាណាដាសន្យាផ្តល់ ២ពាន់ ៧រយ ៥០លានដុល្លារសម្រាប់រយៈពេល ៥ឆ្នំា។ ប្រទេសរុស្ស៊ីសន្យាផ្តល់ ៧៥លានដុលា្លរសម្រាប់រយៈពេល ៣ឆ្នំា និងមូលនិធិរបស់មហាសេដ្ឋី Bill Gates សន្យាជួយចំនួន១ពាន់ ៥រយលានដុល្លារ។ ចំណែកឯប្រទេសមួយចំនួនទៀត សន្យានឹងប្រកាសឲ្យដឹងនៅថ្ងៃខាងមុខ។ លោកនាយករដ្ឋមន្រ្តីកាណាដា Stephen Harper បានចាត់ទុកការសម្រេចឲ្យមានវិធានការគំាពារមាតា និងទារកនៅក្នុងបណ្តាប្រទេសក្រីក្រពេលនេះ ថាជារឿងប្រវត្តិសាស្រ្តមនុស្សលោក។
កាត់បន្ថយអត្រាមរណៈមាតា និងទារក នៅក្នុងប្រទេសក្រីក្រ
សំខាន់ គឺជួយកាត់បន្ថយអត្រាមរណៈមាតា និងទារក នៅពេលមាតាមានផ្ទៃពោះក្តី ឬមួយក៏នៅពេលឆ្លងទន្លេក្តី។ សូមជម្រាបជូនថា វិធានការដែលប្រកាសដោយក្រុមប្រទេស G៨ស្តីពីការជួយគំាពារមាតា និងទារកពេលនេះ គឺជាការរួមចំណែកជួយពន្លឿនផែនការរបស់កម្មវិធីអភិវឌ្ឍន៍សហប្រជាជាតិហៅកាត់ថា PNUD ក្នុងការសម្រេចឲ្យបានកម្មវត្ថុសហស្សវត្សស្តីពីការអភិវឌ្ឍន៍របស់ខ្លួនចាប់ពីពេលនេះ ទៅទល់នឹងឆ្នំា ២០១៥។ ទាក់ទងនឹងការកាត់បន្ថយអត្រាមរណៈមាតា និងទារក អង្គការ PNUD បានកត់សម្គាល់ឃើញថា នៅមានការយឺតយ៉ាវយ៉ាងច្រើន។ ឧទាហរណ៍ជាក់ស្តែង ក្នុងចន្លោះឆ្នំា ១៩៩០ និង ២០០៨ អត្រាមរណៈទារកបានថយចុះតែ ២៨ % ប៉ុណ្ណោះ ពោលគឺនៅមានទារកស្លាប់ចំនួន ៧២នាក់ក្នុងចំណោមទារកកើត ១០០០នាក់។ ជាអត្រាមួយដែលស្ថិតនៅឆ្ងាយពីកម្មវត្ថុចង់បានរបស់អង្គការ PNUD ដែលចង់ឲ្យអត្រាមរណៈទារកមានការថយចុះរហូតដល់ទៅ ៦៦% ក្នុងចន្លោះឆ្នំា ១៩៩០ និង២០១៥។
នៅមានកម្មវត្ថុសហស្សវត្សរបស់កម្មវិធីអភិវឌ្ឍន៍សហប្រជាជាតិមួយទៀត នោះគឺការកាត់បន្ថយភាពក្រីក្រឲ្យបានពាក់កណ្តាលក្នុងចន្លោះឆ្នំា ១៩៩០ និង២០១៥ ពិសេស កាត់បន្ថយឲ្យបានពាក់កណ្តាលចំនួនមនុស្សដែលទទួលបានប្រាក់ចំណូលតែ១ដុល្លារក្នុងមួយថ្ងៃ។ នៅត្រង់ចំណុចនេះ អង្គការ PNUD ក៏បានទទួលស្គាល់ថា នៅមានភាពយឺតយ៉ាវគួរឲ្យកត់សម្គាល់ដែរ។
តែយ៉ាងណាក៏ដោយ អ្វីដែលក្រុមប្រទេស G៨ បានប្រកាសនាពេលនេះ គ្រាន់តែជាពាក្យសន្យានៅឡើយ។ ការពិតជាក់ស្តែងយ៉ាងណានោះ ជារឿងមួយផ្សេងទៅវិញ ព្រោះថាកន្លងមក ពាក្យសន្យារបៀបហ្នឹងមានច្រើនរាប់មិនអស់ តែការអនុវត្តន៍មិនសូវមានទេ។ ខណៈនេះទៀត សំណួរដែលចោទនៅត្រង់ថា ចំពេលប្រទេសមួយចំនួនកំពុងត្រដរខ្យល់ដោយសារវិបត្តិសេដ្ឋកិច្ចទៀត តើនឹងបានលុយរាប់ពាន់លានដុលា្លរពីណា មកជួយ។
នៅមានសំណុំរឿងអន្តរជាតិមួយចំនួនទៀតដែលក្រុមប្រទេស G៨ត្រូវលើកយកទៅនិយាយនៅថ្ងៃនេះ មុននឹងជំនួបកំពូលក្រុមប្រទេស G២០ នាពេលរាត្រី។ មានជាអាទិ៍ វិបត្តិនុយក្លេអ៊ែររបស់ប្រទេសអៀរ៉ង់ និងកូរ៉េខាងជើង ស្ថានការណ៍នៅក្នុងប្រទេសអាហ្វហ្កានីស្តង់ និងប៉ាគីស្តង់។ ទំាងនេះមិនភ្លេចទេ អំពីស្ថានភាពរបស់ប្រទេសមួយចំនួនដែលផុយស្រួយ និងងាយនឹងទទួលគ្រោះថ្នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ