អន្តរការីនៃសហភាពអាហ្រ្វិកធ្វើដំណើរឆ្ពោះទៅកាន់ TripoliនិងBenghazi
ប្រមុខរដ្ឋអាហ្រ្វិកចំនួន៤នាក់និងរដ្ឋមន្ត្រីក្រសួងការបរទេស អ៊ូហ្កង់ដា ដែលជាអន្តរការីនៃសហភាពអាហ្រ្វិក ត្រូវធ្វើដំណើរទៅកាន់ប្រទេសលីប៊ីនាព្រឹកថ្ងៃអាទិត្យ១០មេសា២០១១នេះ។ គឺមានប្រធានាធិបតីម៉ាលី លោក Amadou Toumani ប្រធានាធិបតីអាហ្វ្រិកខាងត្បូង លោក Zacob Zuma ប្រធានាធិបតីកុងហ្គោ លោក Denis Sassou Nguesso ប្រធានាធិបតី ម៉ូរីតានីលោក Mohamed Ould Abddel Aziz ក៏ព្រមទាំងប្រមុខការទូត អ៊ូហ្កង់ដា លោក Henry Oryem Okello បានរួមប្រជុំគ្នាក្នុងជំនួបកំពូលតូចមួយនៅ Nouakchott ក្នុងប្រទេសMauritanieដើម្បីកំណត់តួនាទីរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
គោលដៅសំខាន់របស់អន្តរការីសហភាពអាហ្រ្វិកនៅលីប៊ី គឺអំពាវនាវឲ្យភាគីបដិបក្សទាំងពីរនៅក្នុងប្រទេសឈប់បាញ់គ្នាជាបន្ទាន់ និងរកដំណោះស្រាយសមស្របមួយដើម្បីចេញឲ្យផុតពីវិបត្តិបច្ចុប្បន្ន។ ដូច្នេះហើយ បានជាអន្តរការីសហភាពអាហ្រ្វិកត្រូវចូលជួបសន្ទនាជាមួយប្រមុខដឹកនាំលីប៊ី លោក កាដាហ្វីនិងបន្ទាប់មកជាមួយអ្នកដឹកនាំនៃចលនាបះបោរលីប៊ីនៅក្នុងទីតាំងរបស់គេនៅក្រុង Benghazi។
គួររំលឹកថា កាលពីមួយខែមុន ការប៉ុនប៉ងលើកទីមួយរបស់ប្រមុខរដ្ឋអាហ្វ្រិក ឆ្ពោះទៅកាន់ទីក្រុង TRIPOLI ត្រូវអាក់ខានទៅវិញ ដោយហេតុគ្មានការអនុញ្ញាតឲ្យយន្តហោះបើកឆ្លងកាត់តំបន់ហាមប្រាម។
ប៉ុន្តែក្នុងពេលនេះ ស្ថានការណ៍បានប្រែប្រួល។ ប្រតិបត្តិការអន្តរាគមន៍របស់អង្គការអូតង់តាមអាកាស ក៏ស្ថិតនៅក្នុងស្ថានភាពទ័លច្រក ជំរុញ ឲ្យកងទ័ពចលនាបះបោរនៅលើដីត្រូវបរាជ័យ។ ហេតុនេះហើយបានជា ប្រមុខរដ្ឋអាហ្រ្វិក ងាកមករកដំណោះស្រាយតាមផ្លូវទូតវិញ។
ម្យ៉ាងទៀត ផែនការសន្តិភាព របស់ប្រមុខរដ្ឋអាហ្រ្វិកដែលមានបួនចំណុចនោះ ក៏ពុំមានប្រែប្រួលអ្វីទេនិងក៏ត្រូវបង្កើតសម័យអន្តរកាលមួយនៅលីប៊ី ប្រកបដោយចំណុចដ៏សំខាន់ គឺ ស្ថាប័នប្រជាធិបតេយ្យ។
ខាងលោក Mouammar Kadhafi វិញ ក៏បានទទួលយល់ព្រមហើយចំពោះផែនការសន្តិភាពនេះ និងបានថ្លែងថាលោកត្រៀមខ្លួនជាស្រេចដើម្បីធ្វើឲ្យមានការឈប់បាញ់គ្នាមួយដែល ទុកជាបានការនិងពិតប្រាកដ។
ចំណែក ខាងចលនាបះបោរលីប៊ីវិញ បានប្រកាសថា ពួកគេ ទទួលស្វាគមប្រមុខរដ្ឋអាហ្រ្វិក ដោយការគោរពដ៏ជ្រាលជ្រៅ ក៏ប៉ុន្តែ បានគូសបញ្ជាក់ថា ខ្លួននឹងបដិសេធទាត់ចោលរាល់ការឈប់បាញ់គ្នា ដរាបណាលោកវរសេនីយឯក កាដាហ្វីឬ កូនប្រុសរបស់លោកនៅតែបន្តក្តោបក្តាប់អំណាចនៅក្នុងប្រទេស។
លោកAnders Fogh Rasmussen អគ្គលេខាធិការអង្គការអូតង់ ទើបបានថ្លែងនៅចំពោះមុខកាសែតអាល្លឺម៉ង់ Der Spiegel ដែរថា វិបត្តិនៅលីប៊ី គេពុំអាចដោះស្រាយតាមផ្លូវយោធាបានទេនិង មានតែដំណោះស្រាយតាមផ្លូវនយោបាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ