យុវជនម្នាក់ប្រើកាំភ្លើងបាញ់រះទៅលើអ្នកយាមសន្តិសុខនៅព្រលានយន្តហោះLos Angeles
នៅសហរដ្ឋអាមេរិកមានការផ្ទុះអាវុធសម្លាប់ហ្វូងមនុស្សជាថ្មីដោយលើកនេះកើតមាននៅព្រលានយន្តហោះអន្តរជាតិ ក្នុងទីក្រុងLos Angelesដែលជាព្រលានយន្តហោះធំទីបី របស់អាមេរិក។នៅល្ងាចថ្ងៃសុក្រម្សិលមិញបន្ទាប់ពីបានបាញ់សម្លាប់ ភ្នាក់ងារសន្តិសុខ ព្រលានយន្តហោះម្នាក់និងធ្វើឲ្យរបួសជាច្រើននាក់ឃាតករដែលមានអាយុ ២៣ឆ្នាំ ត្រូវបានប៉ូលិសបាញ់ឲ្យ របួស និងចាប់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
តាមរូបភាពបង្ហាញ ដោយទូរទស្សន៍រដ្ឋ Los Angeles ចលាចល កើតមានពេញព្រលានយន្តហោះ បន្ទាប់ពីយុវជនម្នាក់លេចមុខនៅជិតច្រកត្រួតពិនិត្យសន្តិសុខ បានដកកាំភ្លើងចេញពីស្បោងនិងបាញ់រះទៅលើហ្វូងមនុស្ស ដែលកំពុងរង់ចាំ ត្រៀមឡើងយន្តហោះ។ ប៉ូលិសសហព័ន្ធ FBIបានកំណត់មុខយុវជនដែលមានឈ្មោះថាPaul Anthonu Cianciaរស់នៅរដ្ឋLos Angelesប៉ុន្តែមានកំណើតមកពីរដ្ឋ New Jersey។
អ្វីដែលគួរឲ្យកត់សំគាល់គឺយុវជនរូបនេះដែលមានអាវុធ ជាប់ខ្លួននិងគ្រាប់កាំភ្លើងជាច្រើនគ្រាប់ អាចធ្វើដំណើរឆ្លងកាត់កន្លែងត្រួតពិនិត្យ និងចូលយ៉ាងជ្រៅ ទៅជិតដល់ច្រកត្រួតពិនិត្យ ចុងក្រោយ គឺនៅជិតកន្លែងដែលអ្នកធ្វើដំណើរត្រៀមឡើងយន្តហោះ។ តាមប៉ូលិសព្រលានយន្តហោះ ដែលបានបាញ់ឧក្រិដ្ឋជន ឲ្យរបួសឧក្រិដ្ឋជនអាចធ្វើសកម្មភាពតែម្នាក់ឯងប៉ុន្តែប៉ូលិសសហព័ន្ធ FBIបានស៊ើបអង្កេតដើម្បីរកមនុស្ស ដែលអាចផ្សំ គំនិត ជាមួយជនដៃដល់។ តាមសាក្សីនៅកន្លែងកើតហេតុយុវជនដែលមានកាន់កាំភ្លើង ពាក់កណ្តាល ស្វ័យប្រវត្តិអាចមានគំនិតគុំគួន ព្រោះគេបានបាញ់រះ សំដៅតែទៅលើ បុគ្គលិកទីភ្នាក់ងាររក្សាសន្តិសុខព្រលានយន្តហោះ TSA ដែលកំពុងធ្វើការ ឆែកឆេរ នៅច្រក ត្រួតពិនិត្យ។ ក្រុមហ៊ុន TSA Transportation Security Administration បានបញ្ជាក់ថាបុគ្គលិករបស់ខ្លួនបីនាក់ទទួលរងរបួស ដែលម្នាក់ បានស្លាប់ នៅមន្ទីរពេទ្យ ដោយសារមុខរបួសធ្ងន់ធ្ងរ។
រហូតមកដល់ពេលនេះ គេនៅមិនទាន់ដឹងពីមូលហេតុ ដែលជំរុញឲ្យយុវជនអាយុ២៣ឆ្នាំធ្វើសកម្មភាពបាញ់រះ សម្លាប់មនុស្ស នៅព្រលានយន្តហោះ នៅឡើយទេប៉ុន្តែនៅលើខ្លួនឧក្រិដ្ឋជនប៉ូលិសរកឃើញ កូនសំបុត្រតូចមួយដែលឧក្រិដ្ឋជនបានសរសេរពីការមិនសប្បាយចិត្តរបស់ខ្លួន នឹងរដ្ឋាភិបាល។ក្រុមគ្រួសាររបស់ជនដៃដល់បាននិយាយប្រាប់ប៉ូលិសថាកាលពីប៉ុន្មានថ្ងៃមុនគេបានទទួលសំបុត្រមួយដែលយុវជនPaulបានសរសេរថាគេចង់ធ្វើអត្តឃាត សម្លាប់ខ្លួន។
យោងតាមចៅហ្វាយក្រុង Los Angeles ឧក្រិដ្ឋជនមានចេតនាប៉ងសម្លាប់រង្គាលនៅព្រលានយន្តហោះ ព្រោះខ្លួនគេមានផ្ទុកគ្រាប់កាំភ្លើង ជាប់ខ្លួន ដល់ទៅជាង ១០០ការទូស។ នៅ ក្រោយហេតុការណ៍ បាញ់សម្លាប់នៅព្រលានយន្តហោះ ជើងហោះហើរទាំងអស់ ត្រូវផ្អាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ