អាមេរិកផ្តល់ឋានៈ “សម្ព័ន្ធមិត្តចម្បង” ដល់ទុយនីស៊ី
ក្រសួងការបរទេសអាមេរិកបានប្រកាសនៅថ្ងៃនេះ ព្រមព្រៀងទទួលយកទុយនីស៊ី ដែលមិនមែនជាសមាជិកអង្គការអូតង់ មកធ្វើជាសម្ព័ន្ធមិត្តចម្បងរបស់ខ្លួន។ បានឋានៈជាសម្ព័ន្ធមិត្តចម្បង គឺមានន័យស្មើនឹងការបើកផ្លូវឱ្យមានកិច្ចសហប្រតិបត្តិការយោធាទ្រង់ទ្រាយធំ សហរដ្ឋអាមេរិក-ទុយនីស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
អ្វីដែលលោកប្រធានាធិបតីអាមេរិក បារ៉ាក់ អូបាម៉ា បានសន្យា កាលពីខែឧសភា នាឱកាសទទួលជួបប្រធានាធិបតីទុយនីស៊ី នៅសេតវិមាន បានក្លាយជាការពិត ! ទុយនីស៊ី ដែលមិនមែនជាសមាជិកអូតង់សោះ ពេលនេះ បានក្លាយសម្ព័ន្ធមិត្តដ៏ចម្បងរបស់អាមេរិក
ឋាន្តរសក្តិ ដែលជានិមិត្តរូបនៃចំណងទំនាកទំនងដ៏ស្អិតល្មួតរវាងប្រទេសទាំងពីរ ជាសញ្ញាជួងដាស់ប្រាប់ពិភពលោកអំពីការគាំទ្រឥតងាករេរបស់អាមេរិកចំពោះទុយនីស៊ី ប្រទេសប្រជាធិបតេយ្យដ៏ក្មេងខ្ចីមួយនៅលើភពផែនដី។ នេះបើជាខ្លឹមសារដែលចុះនៅក្នុងសេចក្តីថ្លែងការណ៍របស់ក្រសួងការបរទេសអាមេរិក។
ទុយនីស៊ី ក៏ដូចជាបណ្តាប្រទេសក្នុងតំបន់ផ្សេងទៀត បានឆ្លងកាត់ចលនាបះបោរប្រជាជនធ្វើបដិវត្តប្រឆាំងនឹងរបបកាន់អំណាចផ្តាច់ការ កាលពីបួនឆ្នាំមុន ប៉ុន្តែប្រទេសនេះ បានឆ្លងអន្តរកាល ឆ្ពោះទៅប្រកាន់រកលទ្ធិប្រជាធិបតេយ្យ បានដោយរលូន គ្មានការបង្ហូរឈាមបានយ៉ាងឆាប់រហ័ស។
នៅខែធ្នូឆ្នាំ២០១៤ កន្លងទៅថ្មីៗនេះ ទុយនីស៊ី មានប្រធានាធិបតីថ្មីប្រសូតចេញពីការបោះឆ្នោតដោយសេរី តាមបែបប្រជាធិបតេយ្យ ប៉ុន្តែប្រទេសដ៏តូចមានពលរដ្ឋរស់នៅជាង១១លាននេះ នៅតែប្រឈមមុនជានិច្ចនឹងការគំរាមកំហែងភេរវនិយមជីហាត ដែលហៀមកពីប្រទេសជិតខាងលីប៊ី។ ជាក់ស្តែង ភេរវកម្មដ៏គួរឱ្យតក់ស្លុតកាលពីថ្ងៃទី ២៦មិថុនា បង្កឡើងដោយជនជីហាតប្រដាប់អាវុធប្រភេទអាកា នៅទីឆ្នេរដែលមានទេចរបរទេសចូលចិត្តខ្លាំង សម្លាប់មនុស្ស៣៨នាក់ ក្នុងនោះ៣០នាក់ជាទេសចរជាតិអង់គ្លេស។
ប៉ុន្តែទុយនីស៊ីមិនចាញ់សំឡុតទេ ! ទុយនីស៊ី មានអាមេរិកនៅពីក្រោយ ! ជាមួយនឹងលក្ខន្តិកៈជាសម្ព័ន្ធមិត្តចម្បង ទុយនីស៊ីមានអភ័យឯកសិទ្ធិខ្ពស់ក្នុងការពង្រឹងពង្រីកឱ្យបានខ្លាំងកិច្ចសហប្រតិបត្តិការយោធាជាមួយអាមេរិក មិនថាដើម្បីអភិវឌ្ឍន៍ និងបំពាក់សព្វាវុធឡើយ។ គិតមកទល់នឹងថ្ងៃនេះ អាមេរិកផ្តល់កិត្តិយសជាសម្ព័ន្ធមិត្តចម្បង មិនមែនអូតង់ចំនួនតែ១៥ ប្រទេសប៉ុណ្ណោះ មានជាអាទិ៍ ជប៉ុន អូស្ត្រាលី អាហ្វហ្កានីស្ថាន អេហ្ស៊ីប បារ៉ែន និងម៉ារ៉ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ