នីហ្សេរីយ៉ាសុំជំនួយពីអាមេរិកដើម្បីកម្ចាត់ក្រុមភេរវជនបូកូហារ៉ាម
កាលពីថ្ងៃចន្ទម្សិលមិញ លោកប្រធានាធិបតីអាមេរិក បារ៉ាក់ អូបាម៉ា បានទទួលស្វាគមន៍ប្រធានាធិបតី នីហ្សេរីយ៉ា លោក ម៉ាម៉ាឌ៊ូ ប៊ូហារី នៅឯសេតវិមាន ដើម្បីជជែកពិភាក្សាលើប្រធានបទសំខាន់ៗមួយចំនួន ពិសេសលើកិច្ចសហប្រតិបត្តិការប្រយុទ្ធប្រឆាំងនឹងពួកជុ្រលនិយម បូកូហារ៉ាម។
ចុះផ្សាយនៅថ្ងៃ៖
ស្តាប់ - ០២:១៣
នេះគឺជាទស្សនៈកិច្ចផ្លូវការលើកដំបូងបង្អស់នៅសហរដ្ឋអាមេរិករបស់លោក ប៊ូហារី បន្ទាប់ពីជាប់ឆ្នោតប្រធានាធិបតីកាលពីខែមីនាកន្លងទៅថ្មីៗនេះ។ ជាការបោះឆ្នោតដែលត្រូវបានគេចាត់ទុក ថា ជាការផ្លាស់ប្តូរអំណាចតាមបែបប្រជាធិបតេយ្យលើកដំបូង របស់ប្រទេសនីហ្សេរីយ៉ា ចាប់តាំងពីបានឯករាជ្យពីប្រទេសអង់គ្លេសនាទសវត្សឆ្នាំ៦០។
ជំនួបផ្លួវរដ្ឋនេះពិតជាបានបង្ហាញពីការខិតខំប្រឹងប្រែងដើម្បីបង្កើនទំនាក់ទំនងរវាងសហរដ្ឋអាមេរិកនិងប្រទេសនីហ្សេរីយ៉ាដែលជាសេដ្ឋកិច្ចធំបំផុតរបស់អាហ្វ្រិកមានប្រជាជនប្រមាណជាជាង១៧០លាននាក់ និងក៏ដើម្បីស្វែងរកជំនួយបន្ថែមនៅក្នុងការប្រយុទ្ធប្រឆាំងនឹងក្រុមអ៊ីស្លាមនិយមជ្រុល បូកូហារ៉ាម។ ក្រុម បូកូហារ៉ាមដែលបានសម្លាប់មនុស្សជាង១៣០០០ពាន់នាក់នៅទូទាំងភាគខាងជើងនីហ្សេរីយ៉ាក្នុងការប្រទូសរ៉ាយអស់រយៈពេលជាង៦ឆ្នាំ និងមនុស្សប្រមាណជាង១លាន៥សែននាក់ ត្រូវបានបង្ខំឱ្យចាកចេញពីលំនៅដ្ឋានរបស់ពួកគេ។
ជំនួបនៅឯការិយាល័យប្រធានាធិតបតីអាមេរិកនេះ ក៏ជាឱកាសសម្រាប់ឲ្យប្រមុខរដ្ឋទាំងពីរពិភាក្សាពី បញ្ហាសេដ្ឋកិច្ចនិងអំពើពុករលួយក្នុងប្រទេសនីហ្សេរីយ៉ាផងដែរ។ ថ្លែងទៅកាន់ ក្រុមអ្នកយកព័ត៌មាន លោក អូបាម៉ាបានឱ្យដឹងថាលោក ប៊ូហារី មានរបៀបវារៈច្បាស់លាស់ ដើម្បីកម្ចាត់ក្រុមបូកូហារាម និង ដើម្បីលុបបំបាត់អំពើពុករលួយនៅក្នុងប្រទេសរបស់លោក នេះបើតាមសារពត៌មាន The Gardian។
បន្ទាប់ពីជំនួបកំពូលដ៏មានសារៈសំខាន់នេះ លោកប្រធានាធិបតីប៊ូហារីក៏គ្រោងនឹងជួប និងចូលរួមក្នុងកម្មវិធីសំខាន់ៗមួយចំនួនទៀត ទាំងក្នុងក្របខ័ណ្ឌនយោបាយ និងយុទ្ធសាស្រ្តជំនួញសេដ្ឋកិច្ច មានដូចជា ជំនួបជាមួយរដ្ឋមន្ត្រីពាណិជ្ជកម្មអាមេរិក អគ្គរដ្ឋអាជ្ញាអាមេរិក លេខាធិការនៃរតនាគារជាតិ ក្រុមវិនិយោគិនសក្តានុពល ការបរិភោគអាហារពេលល្ងាចរៀបចំដោយ សភាពាណិជ្ជកម្ម និងក្រុមប្រឹក្សាសាជីវកម្មអាមេរិក។ ហើយនៅថ្ងៃអង្គារនេះលោកនឹងជួបជាមួយបុគ្គលសំខាន់ៗដូចជា ប្រធានធនាគារពិភពលោក អ្នកតំណាងនៃ Bill Gates Foundation និងរដ្ឋមន្ត្រីការបរទេស លោក ចនឃែរី ផងដែរ មុននឹងបិទបញ្ចប់ទស្សនៈកិច្ចដោយកិច្ចប្រជុំអន្តរកម្ម ជាមួយប្រព័ន្ធផ្សព្វផ្សាយនីហ្សេរីយ៉ា និងវិទ្យាស្ថានជាតិប្រជាធិបតេយ្យ នៅថ្ងៃពុធស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ