លោកបានគីមូនសាទរផែនការកាត់បន្ថយការបំពុលបរិស្ថានរបស់លោកអូបាម៉ា
កាលពីព្រឹកថ្ងៃអង្គារម្សិលមិញលោកប្រធានាធិបតីអាមេរិក បារ៉ាក់អូបាម៉ា បានស្វាគមន៍លោក អគ្គលេខាធិការអង្គការសហប្រជាជាតិ បានគីមូន នៅឯការិយាល័យប្រធានាធិបតី «Oval Office» ជាមួយនឹងរបៀបវារៈសម្រាប់កិច្ចពិភាក្សាទ្វេភាគី រួមមានចាប់ពីបញ្ហាបម្រែបម្រួលអាកាសធាតុ រហូតដល់បញ្ហាវិបត្តិនៅស៊ូដង់ខាងត្បូង។
ចុះផ្សាយនៅថ្ងៃ៖
មួយថ្ងៃបន្ទាប់ពីការបង្ហាញផែនការថ្មីនៃការកាត់បន្ថយការបំពុលបរិស្ថានរបស់សហរដ្ឋអាមេរិក នៅព្រឹកថ្ងៃអង្គារលោក អូបាម៉ា បានទទួលស្វាគមន៍លោក បាន គីមូន នៅឯការិយាល័យប្រធានាធិបតី «Oval Office»។ កិច្ចប្រជុំរវាងមេដឹកនាំថ្នាក់ពិភពលោកទាំងពីរនេះ បានធ្វើឡើងនៅខណៈពេលដែល បុរសរដ្ឋទាំងពីរបាននិងកំពុងចាប់ផ្តើមលើកកម្ពស់ការផ្តួចផ្តើមសង្គមដ៏ធំពីរនៅក្នុងរបៀបវារៈរៀងៗខ្លួន។ ចំពោះលោក អូបាម៉ាកាលពីថ្ងៃចន្ទទើបនឹងបានបង្ហាញផែនការថ្មីសំដៅកាត់បន្ថយការបំពុលបរិស្ថាន ដោយឧស្ម័នកាបូនិកបញ្ចេញដោយរោងចក្រថាមពលរបស់សហរដ្ឋអាមេរិក ឲ្យបានចំនួន៣២% ចាប់ពី ពេលនេះដល់ឆ្នាំ២០៣០។ ចំណែកលោកបានគីមូនវិញ បាននិងកំពុងលើកកម្ពស់កិច្ចព្រមព្រៀងថ្មីមួយ ស្តីពីការអភិវឌ្ឍន៍ជាសកល ដែលទើបនឹងទទួលការគាំទ្រពីប្រទេសជាសមាជិកចំនួន១៩៣របស់អង្គការសហប្រជាជាតិកាលពីថ្ងៃអាទិត្យ ដែលកិច្ចព្រមព្រៀងនោះអំពាវនាវឱ្យបញ្ចប់ភាពក្រីក្រ ការសម្រេចឲ្យបាននូវសមភាពយេនឌ័រ និងការប្រយុទ្ធប្រឆាំងនឹងការផ្លាស់ប្តូរអាកាសធាតុនៅឆ្នាំ២០៣០។
បន្ទាប់ពីជំនួបទល់មុខគ្នាក្នុងការិយាល័យប្រធានាធិបតី លោកអូបាម៉ាបានមានប្រសាសន៍ទៅកាន់អ្នកយកសារពត៌មានថា ពិភពលោកត្រូវតែមានការបង្កើនល្បឿនដើម្បីជួយប្រយុទ្ធប្រឆាំងនឹងការប្រែប្រួលអាកាសធាតុ។ ហើយលោកបន្ថែមថាអង្គការសហប្រជាជាតិនឹងបន្តជំរុញបណ្តាប្រទេសផ្សេងទៀត ដើម្បីចាត់វិធានការលើបញ្ហាអាកាសធាតុនេះ។
ចំណែកលោកអគ្គលេខាធិការអង្គការសហប្រជាជាតិ បានគីមូនបានសាទរចំពោះផែនការ កាត់បន្ថយការបំពុលបរិស្ថានរបស់រដ្ឋបាលលោកអូបាម៉ា និងបានមានប្រសាសន៍ថា បទបញ្ញត្តិនៃផែនការនេះបង្ហាញថាសហរដ្ឋអាមេរិកអាចផ្លាស់ប្តូរពិភពលោកដោយដើរតួនាទីជាមេដឹកនាំគំរូ ទៅបណ្តាប្រទេសផ្សេងៗទៀតនៅលើបញ្ហាផ្លាស់ប្តូរអាកាសធាតុនេះ។
យ៉ាណាមិញលោកអូបាម៉ាត្រូវបានគេរំពឹងថានឹងទៅចូលរួមកិច្ចប្រជុំប្រចាំឆ្នាំរបស់មហាសន្និបាតអង្គការសហប្រជាជាតិនៅខែកញ្ញាខាងមុខនេះផងដែរ។
លោកអូបាម៉ាក៏បានមានប្រសាសន៍ថា លោក បានគីមូន និងរូបលោកក៏បានពិភាក្សាគ្នាលើវិបត្តិនៅស៊ីរី យេមែន លីប៊ី និងស៊ូដង់ខាងត្បូងផងដែរ ដោយគូសបានបញ្ជាក់ឡើងវិញជាថ្មីម្តងទៀតនូវជំហររបស់លោកថា ភាគីទាំងសង្ខាងនៅក្នុងសង្គ្រាមស៊ីវិលនៅស៊ូដង់ខាងត្បូង ត្រូវតែបញ្ឈប់តាមការកំណត់នៅថ្ងៃទី១៧ ខែសីហានេះ ដើម្បីបញ្ចប់ការបង្ហូរឈាម ឬបើមិនដូច្នេះទេនឹងត្រូវប្រឈមនឹងផលវិបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ