សហរដ្ឋអាមេរិក ៖ កំណែទម្រង់ច្បាប់គ្រប់គ្រងអាវុធរបស់លោកអូបាម៉ា ចូលវគ្គផ្តាច់ព្រ័ត្រ
ដូចដែលលោកអូបាម៉ា បានប្រកាសក្នុងសារជូនពរឆ្នាំថ្មី ទៅកាន់ពលរដ្ឋអាមេរិក នៅថ្ងៃចន្ទទី ៤ មករា២០១៦នេះ លោកប្រធានាធិបតីបានជួបពិភាក្សាជាមួយរដ្ឋមន្ត្រីក្រសួងយុត្តិធម៌ ដើម្បីបង្ហើយគម្រោងច្បាប់គ្រប់គ្រងអាវុធ។ ច្បាប់ដែលប្រសិនបើមិនអាចទទួលបានការគាំទ្រពីសភាអាមេរិកទេ នឹងត្រូវប្រធានាធិបតីប្រើអំណាចចេញក្រិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ក្រុមអ្នកការពារសិទ្ធិប្រើប្រាស់អាវុធ បានបញ្ចេញប្រតិកម្មយ៉ាងរស់រវើករួចទៅហើយ ប្រឆាំងនឹងគម្រោងច្បាប់គ្រប់គ្រងអាវុធនេះ។ នៅលើវិបសៃត៍ សមាគម National Rifle Association បានបង្អើលពលរដ្ឋអាមេរិករួចជាស្រេចហើយថា “សិទ្ធិកាន់អាវុធដែលមានចែងក្នុងរដ្ឋធម្មនុញ្ញ កំពុងរងការគំរាមកំហែងជាងពេលណាៗទាំងអស់ ! ...”។ ច្បាប់គ្រប់គ្រងអាវុធ នឹងត្រូវបង្ហាញជាសាធារណៈនៅសប្តាហ៍នេះ ប៉ុន្តែ ក្រុមអ្នកប្រឆាំងបាន ប្រកាសសន្យាមិនបោះឆ្នោតគាំទ្របេក្ខភាពលោកស្រី ហ៊ីឡារី គ្លីនតុន បេក្ខនារីប្រធានាធិបតីនៃបក្សប្រជាធិបតេយ្យទេ ព្រោះលោកស្រីក៏បានសន្យានិងស្វាគមន៍ការបង្កើតច្បាប់គ្រប់គ្រងអាវុធនេះដែរ។
តាមការពិត សេតវិមាន បានលើកគម្រោងច្បាប់ដែលគ្មានលក្ខណៈតឹងតែងប្រឆាំងនឹងប្រពៃណីប្រើអាវុធរបស់ពលរដ្ឋអាមេរិកទេ។ គម្រោងច្បាប់ គ្រាន់តែចង់ដាក់ឱ្យមានការត្រួតពិនិត្យអតីតភាពរបស់អតិថិជន មុននឹងអាចទិញអាវុធមកកាន់ប្រើបាន ហើយបើចង់លក់ដូរបន្ត ច្បាប់តម្រូវឱ្យមានការសុំអាជ្ញាបណ្ណ។ បើយោងតាមការស្ទង់មតិ របស់វិទ្យាស្ថាន Quinnipiac វិធានាការនេះ បានទទួលការគាំទ្រពីមតិសាធារណៈប្រមាណ៩០%។ ប៉ុន្តែឆន្ទៈចង់ទប់ស្កាត់ការលក់ដូរអាវុធខុសច្បាប់ នៅមានកំរិត អាវុធប្រើប្រាស់សម្រាប់សម្លាប់មនុស្ស នៅអូរីហ្គិន និងនៅកាលីហ្វ័នីញ៉ា កាលពីពេលថ្មីៗនេះ បានទិញដូរដោយស្របច្បាប់សោះ។
គ្រប់អង្គការដែលប្រឆាំងនឹងចរាចរណ៍អាវុធនៅអាមេរិកសុទ្ធតែយល់ថា គម្រោងច្បាប់គ្រប់គ្រងអាវុធនេះ ជាការចាប់ផ្តើមល្អ ប៉ុន្តែសម្រាប់បេក្ខជនប្រធានាធិបតីនៃបក្សសាធារណរដ្ឋវិញ ខ្លះបានស្រែករួចទៅហើយ ថានឹងត្រលប់ទៅលុបក្រិត្យច្បាប់ដែលជាការសម្លាប់សេរីភាព នៅពេលជាប់ឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ