ការបាញ់ប្រហារនៅអាមេរិក បំផុសសំនួរជាថ្មីជុំវិញច្បាប់គ្រប់គ្រងអាវុធ
សហរដ្ឋអាមេរិកបានកាន់ទុក្ខជាថ្មី នៅថ្ងៃសុក្រទី ៦មករាម្សិលមិញ ដោយខ្មាន់កាំភ្លើងម្នាក់បានបើកការបាញ់រះសម្លាប់មនុស្សអស់៥នាក់ និងរបួស៨នាក់។ គេនៅពុំទាន់ដឹងអំពីមូលហេតុដែលជំរុញឱ្យខ្មាន់កាំភ្លើងបង្កសកម្មភាពសោកនាដកម្មទេ ប៉ុន្តែគ្រប់គ្នាចាប់ផ្តើមចោទសួរជាថ្មីអំពីច្បាប់គ្រប់គ្រងអាវុធ ព្រោះថាជនសង្ស័យ បានប្រើកាំភ្លើងដែលថ្លឹងផ្ញើជាអីវ៉ាន់តាមយន្តហោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ការបាញ់ប្រហារបានកើតឡើងនៅក្នុងអាកាសយានដ្ឋានអន្តរជាតិរដ្ឋFlorida នៅត្រង់កន្លែងរង់ចាំទទួលអីវ៉ាន់ សម្លាប់មនុស្សអស់៥នាក់ និងរបួស៨នាក់។ ក្រោយពីបាញ់អស់គ្រាប់ ខ្មាន់កាំភ្លើង ដែលមានឈ្មោះថា Esterban Santiago អាយុ ២៦ឆ្នាំ បានប្រគល់ខ្លួនឱ្យប៉ូលិសតាមសម្រួល។
ជាអតីតនាយទាហាន នៃកងការពារជាតិ Porto Rico និង Alaska Esterban Santiago ធ្លាប់បានចុះទៅសមរភូមិអ៊ីរ៉ាក់ ពីខែមេសា២០១០ ដល់ខែកុម្ភៈ២០១១។ ក្រុមអ្នកអង្កេតកំពុងតែសាកល្បងស្វែងរកមូលហេតុនៃទង្វើបាញ់ប្រហារនេះ។ ដានភេរវកម្មក៏មិនត្រូវបានច្រានចោលទាំងស្រុងដែរ។
ប៉ុន្តែហេតុការណ៍ហិង្សា ក្នុងប្រទេសជួបប្រទះករណីបាញ់ប្រហារញយៗ ដោយពលរដ្ឋមានសិទ្ធិកាន់អាវុធគ្រប់គ្នា កំពុងបំផុសចំណោទជុំវិញការគ្រប់គ្រងអាវុធជាថ្មីទៀត។ ព្រោះថា ម្សិលមិញ Esterban Santiago បានធ្វើដំណើរតាមយន្តហោះមកពីរដ្ឋអាឡាស្កា ជាមួយនឹងអាវុធនិង និងគ្រាប់កាំភ្លើងរបស់គេ ដែលដាក់ផ្ញើក្នុងវ៉ាលីបញ្ញើថតថ្លឹងនៅបាតយន្តហោះ។ នៅពេលមកដល់ និងបានទទួលវ៉ាលីវិញ Esterban Santiago បានទៅបន្ទប់ទឹកដើម្បីបញ្ចូលគ្រាប់ រួចចេញមកវិញបាញ់រះលើមនុស្សម្នាតែម្តង។
តាមច្បាប់សុវត្ថិភាពដឹកជញ្ជូនផ្លូវអាកាស គេហាមហាត់មិនឱ្យអ្នកដំណើរយកអាវុធដាក់តាមខ្លូនជិះយន្តហោះទេ តែអាចដឹកជញ្ជូនតាមវ៉ាលីថ្លឹងបាន និងដោយត្រូវដោះកៃ ព្រមទាំងត្រូវរាយការណ៍ប្រាប់សមត្ថកិច្ច។ ជាតិផ្ទុះត្រូវហាមឃាត់ តែយន្តហោះអាចទទួលដឹកគ្រាប់បែកបាននៅបាតយន្តហោះ ប្រសិនបើមានការប្រកាសអនុញ្ញាតត្រឹមត្រូវ។
នេះមិនមែនជាលើកទីមួយទេ ដែលមានការវាយប្រហារដោយប្រើអាវុធដឹកតាមយន្តហោះ។ កាលពីឆ្នាំ១៩៧២ ទាហានក្រហមជប៉ុនបីនាក់ បានដឹកជញ្ជូនអាវុធ និងគ្រាប់បែកដៃ ជាច្រើនក្នុងយន្តហោះ ដើម្បីមកធ្វើភេរវកម្មនៅអាកាសយានដ្ឋានក្រុងទែលអាវីល ប្រទេសអ៊ីស្រាអែល ដែលកាលណោះបានសម្លាប់មនុស្សអស់២៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ