ក្រឹត្យអន្តោប្រវេសន៍ថ្មីរបស់លោកដូណាល់ ត្រាំត្រូវជាប់គាំងជាថ្មី
ក្រឹត្យអន្តោប្រវេសន៍ថ្មីរបស់លោកដូណាល់ ត្រាំ បានចូលជាធរមាន ចាប់ពីថ្ងៃព្រហស្បតិ៍នេះ។ ប៉ុន្តែ នៅប៉ុន្មានម៉ោង មុនចាប់មានសុពលភាព ក្រឹត្យថ្មីរបស់រដ្ឋបាលលោកដូណាល់ ត្រាំត្រូវពើបប្រទះនឹងការប្រឆាំងទាត់ចោលរបស់តុលាការរដ្ឋហាវ៉ៃ។ ហាវ៉ៃ ជារដ្ឋដំបូងគេដែលបានចេញមុខប្រឆាំង ក្រឹត្យថ្មីរបស់លោកដូណាល់ ត្រាំ។ លោកដូណាល់ ត្រាំបានសុខចិត្ត កែសម្រួលក្រឹត្យអន្តោប្រវេសន៍ចាស់ ដែលត្រូវគេរិះគន់ និងវាយតម្លៃថា មានលក្ខណៈប្រកាន់ រើសអើងពូជសាសន៍ និងសាសនា។
ចុះផ្សាយនៅថ្ងៃ៖ កែប្រែថ្ងៃទី៖
ចៅក្រមរបស់តុលាការសហព័ន្ធ នៅហាវ៉ៃ នៅថ្ងៃពុធម្សិលមិញ បានចេញសម្រេច ហាមមិនឲ្យគេអនុវត្តក្រឹត្យអន្តោប្រវេសន៍ថ្មីរបស់លោកដូណាល់ ត្រាំ។ សេចក្តីសម្រេចរបស់ចៅក្រមដែលនឹងត្រូវគេអនុវត្ត គោរពតាម នៅទូទាំងប្រទេសអាមេរិក ប្រៀបបាននឹងការសំពងមួយព្រនង់ លើរដ្ឋបាលលោកដូណាល់ ត្រាំ ដែលបានចាត់ទុក ក្រឹត្យប្រឆាំងអន្តោប្រវេសន៍ ជាវិធានការចំបង លេចធ្លោជាងគេ នៅក្នុងដើមអាណត្តិរបស់លោកដូណាល់។
នៅក្នុងសេចក្តីសម្រេចរបស់ខ្លួន ចៅក្រមសហព័ន្ធក្នុងរដ្ឋហាវ៉ៃ លោកDerrick Watsonបានពន្យល់ថា គេត្រូវផ្អាកព្យួរ ក្រឹត្យប្រឆាំងអន្តោប្រវេសន៍របស់រដ្ឋាភិបាល ជាបណ្តោះអាសន្នសិន ដើម្បីជៀសវាងកុំឲ្យមានកំហុស ការបែកបាក់ ដែលគេមិនអាចផ្សះផ្សារឡើងវិញបាន។ តាមអាជ្ញាធររដ្ឋហាវ៉ៃ ដែលជាម្ចាស់ដើមបណ្តឹង ក្រឹត្យថ្មីរបស់លោកដូណាល់ ត្រាំ នឹងបន្ទុចបង្អាក់ ធ្វើឲ្យរដ្ឋហាវ៉ៃ ខាតបង់ចំណូលដែលបានមកពីទេសចរណ៍ ហើយនិងការសិក្សារបស់និស្សិតបរទេស។
ដើម្បីពន្យល់ការសម្រេចចិត្តរបស់ខ្លួន លោកចៅក្រមសហព័ន្ធ បានផ្អែកលើការប្រកាសជាច្រើនដងរបស់លោកដូណាល់ ត្រាំ ជាពិសេស នៅក្នុងយុទ្ធនាការឃោសនាបោះឆ្នោត ជាទីដែលលោកបានសន្យាហាមមិនឲ្យអ្នកកាន់សាសនាអ៊ីស្លាមចូលទឹកដីអាមេរិក នៅពេលលោកឈ្នះឆ្នោតប្រធានាធិបតី។ ជាការសន្និដ្ឋានរបស់ចៅក្រម ក្រឹត្យអន្តោប្រវេសន៍របស់លោកដូណាល់ ត្រាំនៅតែមានបង្កប់ច្រើនដោយការស្អប់ ចងគំនុំខាងផ្នែកសាសនា។
ក្រឹត្យប្រឆាំងអន្តោប្រវេសន៍ថ្មី របស់លោកដូណាល់ ត្រាំ ដែលពេលនេះ ត្រូវគេផ្អាកព្យួរជាថ្មី តាមពិតជាលទ្ធផលនៃការកែសម្រួលក្រឹត្យចាស់ ដែលធ្លាប់ត្រូវបានចៅក្រមរដ្ឋSettlesហាមមិនឲ្យអនុវត្តនៅដើមខែកុម្ភៈ។ ទៅតាមក្រឹត្យថ្មី រដ្ឋបាលអាមេរិក បានដកអ៊ីរ៉ាក់ ចេញពីបញ្ជីប្រទេសដែលគេហាមមិនឲ្យមានប្រជាជនចូលទឹកដីអាមេរិក។ យ៉ាងណាក៏ដោយក្រឹត្យថ្មីនេះ នៅតែបិទ ជា បណ្តោះអាសន្នព្រំដែនអាមេរិក មិនស្វាគមន៍ជនភៀសខ្លួន ហើយផ្អាកព្យួរ មិនផ្តល់ទិដ្ឋាការដល់ប្រជាជនមកពីប្រទេសចំនួន ដូចជាអ៊ីរ៉ង់ ស៊ីរី លីប៊ី សូម៉ាលី ស៊ូដង់ ហើយនិងយេម៉ែន។
តាំងពីកន្លែងប្រជុំនៅទីក្រុងNashville របស់រដ្ឋ Tennessee លោកដូណាល់ ត្រាំបានបរិហារ ការសម្រេចចិត្តខុសរឿងរបស់ចៅក្រមរដ្ឋហាវ៉ៃ និងការរំលោភអំណាចរបស់ចៅក្រម ដែលមិនធ្លាប់មានពីមុនមក។ លោកដូណាល់ ត្រាំបានលើកឡើងពីច្បាប់ នៅក្នុងរដ្ឋធម្មនុញ្ញ ដែលផ្តល់អំណាចដល់ប្រធានាធិបតី ក្នុងការផ្អាកព្យួរលំហូរអន្តោប្រវេសន៍ បើសិនប្រធានាធិបតីវាយតម្លៃថា វាចាំបាច់សម្រាប់ផលប្រយោជន៍ជាតិ។ នៅក្រោយការសម្រេចរបស់ចៅក្រមរដ្ឋហាវ៉ៃ លោកដូណាល់ ត្រាំបានសន្យា បន្តប្តឹងសេចក្តីសម្រេចរបស់ចៅក្រមរដ្ឋហាវ៉ៃ ទៅតុលាការកំពូលអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ