លោកដូណាល់ ត្រាំសន្យាទំនាក់ទំនងល្អ ទៅលោកប្រធានាធិបតីចិន ស៊ី ជីនពីង
ប្រមុខដឹកនាំ ប្រទេសមហាអំណាចសេដ្ឋកិច្ចពិភពលោក អាមេរិក និងចិន ត្រូវជួបពិភាក្សា គ្នា ជាលើកទី១ នៅថ្ងៃសុក្រនេះ នៅរដ្ឋហ្វ្លរីដា។ នៅក្នុងពិធីលាងសាយភោជន៍ នៅយប់ថ្ងៃព្រហស្បតិ៍ម្សិលមិញ លោកប្រធានាធិបតីអាមេរិក ដូណាល់ ត្រាំបានសន្យាទៅលោកស៊ី ជីនពីងពីទំនាក់ទំនងល្អ និងយូរអង្វែងជាមួយប្រទេសចិន។
ចុះផ្សាយនៅថ្ងៃ៖
នៅភូមិគ្រឹះឯកជននៅរដ្ឋហ្វ្លរីដា នៅថ្ងៃព្រហស្បតិ៍ម្សិលមិញ ប្រធានាធិបតីអាមេរិក លោកដូណាល់ ត្រាំ ទទួលគារវកិច្ច ប្រធានាធិបតីចិន ក្នុងបរិយាកាសដ៏ធូរស្រាល។ នៅតុអាហារជាមួយប្រធានាធិបតីចិន ប្រមុខដឹកនាំអាមេរិក នៅបាននិយាយលេង លាយមែនថា លោកបានពិភាក្សាគ្នាយ៉ាងយូរ ជាមួយលោកស៊ី ជីនពីង ប៉ុន្តែ លោកនៅតែមិនទាន់បានទទួលអ្វីទាំងអស់ គឺគ្មានបានអ្វីសោះ ក្រៅតែពីបានកសាងមិត្តភាពជាមួយចិន។
បរិយាកាសដ៏ធូរស្រាលហាក់បញ្រ្ចាសនឹងជំហររបស់លោកដូណាល់ត្រាំ ដែលធ្លាប់តែរិះគន់យ៉ាងចាស់ដៃថា ចិនបានដើរខ្សែលើអាមេរិក ក្នុងការដោះដូរពាណិជ្ជកម្មជាមួយអាមេរិក។ ការដោះដូរពាណិជ្ជកម្ម ហើយនិងការបាញ់សាកល្បងមីស៊ីល និងនុយក្លេអ៊ែររបស់កូរ៉េខាងជើង ជាសំណុំរឿងសំខាន់ធំៗពីរ នៅក្នុងជំនួបជាលើកទី១ នៅថ្ងៃសុក្រនេះ។
លោកដូណាល់ ត្រាំគ្រោងនឹងទាមទារឲ្យចិនប្រើឥទ្ធិពល ដាក់សម្ពាធ លើសម្ព័ន្ធមិត្ត កូរ៉េខាងជើង ឲ្យលះបង់ចោល មហិច្ឆតាផលិតអាវុធនុយក្លេអ៊ែរ។ នៅមុនទទួលជួបលោកប្រធានាធិបតីចិនទៅទៀត លោកប្រធានាធិបតីអាមេរិកធ្លាប់បានពន្លយពាក្យព្រមានរួចហើយថា អាមេរិក នឹងដោះស្រាយបញ្ហាកូរ៉េខាងជើងតែម្នាក់ ដែលនៅក្នុងនោះ ប្រតិបត្តិការយោធាអាចជាជំរើសមួយរបស់អាមេរិក។
អាមេរិកដែលជាគោលដៅផ្ទាំងស៊ីបវាយប្រហាររបស់កូរ៉េខាងជើង បានថ្កោលទោស ការបាញ់សាកល្បងមីស៊ីលជាច្រើនលើក របស់កូរ៉េខាងជើង និងបានដាក់គំនាបទៅលើរដ្ឋាភិបាលចិន ដែលជាសម្ព័ន្ធមិត្តរបស់កូរ៉េខាងជើង។ តាមប្រភពមន្រ្តីទូត នៅទីក្រុងប៉េកាំង ដែលបាននិយាយប្រាប់ទីភ្នាក់ងារព័ត៌មានបារាំង AFP រដ្ឋាភិបាលចិនដែលទើបបានសម្រេចផ្អាក ឈប់ទិញ នាំចូលធ្យូងថ្មពីកូរ៉េខាងជើង រហូតដល់ចុងឆ្នាំ២០១៧ ទៅតាមទណ្ឌកម្មរបស់ក្រុមប្រឹក្សាសន្តិសុខ អង្គការសហប្រជាជាតិ អាចនឹងបំពេញចិត្ត លោកប្រធានាធិបតីអាមេរិក ដោយយល់ព្រមត្រួតពិនិត្យបន្ថែមលើធនាគារដែលធ្វើការជាមួយរបបព្យុងយ៉ាង។
ជាថ្នូរមកវិញ ប្រមុខដឹកនាំចិនចង់ឲ្យប្រធានាធិបតីអាមេរិក បោះបង់ចោល កិច្ចសន្យាលក់អាវុធទៅឲ្យតៃវ៉ាន់ ដែលចិន ចាត់ទុកជាចំណែកដីកោះរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ