អាជ្ញាធរចិន ចុះបញ្ជីយីហោពាណិជ្ជកម្មទាំង៣៨ របស់ក្រុមហ៊ុនTrump
យោងតាមទីភ្នាក់ងារ ព័ត៌មាន Reuters អាជ្ញាធរចុះបញ្ជីរពាណិជ្ជកម្មចិន ទើបបានសម្រេច កាលពីថ្ងៃចន្ទកន្លងទៅ ក្នុងការផ្តល់ភ្លើងខៀវ ព្រមចុះបញ្ជីម៉ាកយីហោពាណិជ្ជកម្មរបស់ក្រុមហ៊ុន លោកដូណាល់ ត្រាំ ប្រធានាធិបតីសហរដ្ឋអាមេរិក។ ការព្រមចុះបញ្ជីការពារម៉ាកយីហោពាណិជ្ជកម្មរបស់ក្រុមហ៊ុន Trump នេះ ត្រូវបានគេមើលឃើញថា គឺជាយុទ្ធសាស្ត្រទាក់ទាញវិនិយោគ ដែលចិនបានរៀបចំ តាមរយៈការយកចិត្តលោកដូណាល់ ត្រាំ ប្រធានាធិបតីអាមេរិក នឹងជាស្ថាបនិកក្រុមហ៊ុនពាណិជ្ជកម្មនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
មុននឹងក្លាយជាប្រធានាធិបតីអាមេរិក លោកដូណាល់ ត្រាំ គឺជាមហាសេដ្ឋី និងអ្នកជំនួញដ៏ល្បី។ Trump Organization គឺជាអាណាចក្រក្រុមហ៊ុនពាណិជ្ជកម្មដ៏ធំ ដែលមានម៉ាកយីហោពាណិជ្ជកម្មចំណុះរបស់ខ្លួនជាច្រើន។ បច្ចុប្បន្នក្រុមហ៊ុន Trump ត្រូវបានប្រគល់ទៅឲ្យក្រុមប្រឹក្សាភិបាល ដែលមានកូនប្រុសរបស់លោកដូណាល់ ត្រាំ ជាអ្នកគ្រប់គ្រង។
ម៉ាកយីហោពាណិជ្ជកម្មរបស់ក្រុមហ៊ុនTrump ចំនួន ៣៨ ត្រូវបានអាជ្ញាធរចុះបញ្ជីពាណិជ្ជកម្មចិន យល់ព្រមទទួលចុះបញ្ជីការពារ។ ការសម្រេចចុះបញ្ជីរ មានលក្ខណៈបណ្តោះអាសន្នរយៈពេល៩០ថ្ងៃ ដោយត្រូវរងចាំក្រែងមានការជំទាស់ ពីភាគីផ្សេង។ ផុតរយៈពេលនេះ បញ្ជីឈ្មោះនេះ នឹងត្រូវចុះជាផ្លូវការ។
លោកមេធាវីការពារក្រុមហ៊ុន Trump បានអះអាងថា ពាក្យសុំចុះបញ្ជី ត្រូវបានដាក់ជូនទៅអាជ្ញាធរចិន តាំងតែពីខែមេសា ឆ្នាំ២០១៦ម្លេះ។ លោកមេធាវីរូបនេះបន្តថា ក្រុមហ៊ុន បានព្យាយាម ដើម្បីការពារកម្មសិទ្ធិបញ្ញារបស់ម៉ាកយីហោក្រុមហ៊ុន ជាច្រើនឆ្នាំមកហើយនៅចិន ដែលនេះការយល់ព្រមចុះបញ្ជី ត្រូវបានធ្វើឡើងដោយត្រឹមត្រូវ ពុំមានអ្វីពាក់ព័ន្ធនឹងវិស័យនយោបាយទេ។
តែយ៉ាងណា សម្រាប់លោក Ben Cardin សមាជិកព្រឹទ្ធសភាមកពីគណបក្សប្រជាធិបតេយ្យ មួយរូបបានយល់ឃើញថា ការព្រមព្រៀងចុះបញ្ជីការពារយីហោពាណិជ្ជកម្មរបស់ក្រុមហ៊ុនTrump ដោយអាជ្ញាធរចិននេះ គឺវាសបង្ហាញឲ្យឃើញច្បាស់ អំពីយុទ្ធសាស្ត្ររកស៊ីរបស់ចិន និងរបស់ក្រុមហ៊ុនTrump ដែលមានលោកប្រធានាធិបតីដូណាល់ ត្រាំ ជាបង្អែក។ បើពិនិត្យលើបញ្ជីឈ្មោះ យីហោពាណិជ្ជកម្មទាំងនោះ គឺត្រូវចុះបញ្ជីរ ជាកម្មសិទ្ធិរបស់ឈ្មោះ Donald J. Trump តែម្តង។
សម្រាប់លោកសមាជិកព្រឹទ្ធសភារូបនេះ អាជ្ញាធរចិនបានឆក់ឱកាសនេះ ប្រើប្រាស់នយោបាយការទូតទន់ភ្លន់ជាមួយលោកដូណាល់ ត្រាំ ដើម្បីទាក់ទាញហ៊ុនវិនិយោគទាំងអស់របស់ក្រុមហ៊ុន Trump មកក្នុងទីផ្សារចិន។ យ៉ាងណាមិញ កាលពីខែកុម្ភៈកន្លងទៅនេះ ក្រុមហ៊ុនសំណង់Trump ទើបតែបានទទួលភ្លើងខៀវ ពីអាជ្ញាធរចិន ដើម្បីសាងសង់អាគារអចនលទ្រព្យជាច្រើនកន្លែង។ ដូចគ្នានឹងការចុះបញ្ជីពាណិជ្ជកម្ម គំរោងសំណង់ទាំងអស់នោះ បានជាប់គាំងជាច្រើនឆ្នាំមកហើយ ដោយមានបញ្ហាផ្លូវច្បាប់។ តែគ្រាន់តែលោកត្រាំ បានក្លាយជាប្រធនាធិបតី អ្វីៗហាក់ដើរទៅមុខយ៉ាងលឿន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ