រដ្ឋមន្ត្រីការពារជាតិអាមេរិកជួបមេដឹកនាំកាតា
នៅថ្ងៃសៅរ៍២២មេសានេះ រដ្ឋមន្ត្រីការពារជាតិអាមេរិក លោក Jim Matthis បានធ្វើដំណើរទៅដល់កាតា ជួបមេដឹកនាំសំខាន់ៗកាតា ដើម្បីជជែកពីស្ថានភាពតំបន់បូព៌ា។ កាតាជាប្រទេសសំបូរប្រេង និងមានមូលដ្ឋានទ័ពអាកាស សម្រាប់ប្រតិបត្តិការយោធាអាមេរិក នៅតំបន់ដើមបូព៌ា។
ចុះផ្សាយនៅថ្ងៃ៖
ក្នុងដំណើរទស្សនកិច្ចនៅតំបន់ដើមបូព៌ា រដ្ឋមន្ត្រីការពារជាតិអាមេរិក លោក Jim Matthis បានបន្តដំណើរទៅដល់កាតា និងជួបមេដឺកនាំសំខាន់ៗ នៅក្រុងដូហា។ ថ្ងៃសៅរ៍នេះ លោកម៉ាទីសបានជួបអេមៀ ឆេក តាមីម បិន ហាម៉ាត អាល់ ថានី។
ដូចជានៅតាមបណ្តាប្រទេសតំបន់បូព៌ាផ្សេងទៀតនៃដំណើរទស្សនកិច្ច រដ្ឋមន្ត្រីការពារជាតិអាមេរិក ផ្តោតការពិភាក្សាជាមួយមេដឹកនាំប្រទេសទាំងនេះ ពីយុទ្ធនាការប្រយុទ្ធប្រឆាំងក្រុមភេរវជនជីហាតរដ្ឋអ៊ីស្លាម ពីជម្លោះសង្គ្រាមស៊ីរី រឺក៏ការព្រួយបារម្ភចំពោះសកម្មភាពអ៊ីរ៉ង់ក្នុងតំបន់ជាដើម។ នៅកាតា អាមេរិកមានទាហានជិត១ម៉ឺននាក់ ដាក់ពង្រាយនៅមូលដ្ឋានទ័ពអាកាស អាល់ យូដេដ។
ជាទូទៅ គឺនៅប្រទេសកាតានេះឯង ដែលគេរៀបចំប្រតិបត្តិការវាយប្រហារផ្លូវអាកាស កំចាត់ក្រុមភេរវជនរដ្ឋអ៊ីស្លាម នៅអ៊ីរ៉ាក់ និងស៊ីរី។ កន្លងមក កិច្ចព្រមព្រៀងរវាងកាតានិងអ៊ីរ៉ង់ បានជួយជម្លៀសមនុសុ្សជាង១ម៉ឺន១ពាន់នាក់ ពីតំបន់រងការឡោមព័ទ្ធនៅស៊ីរី។ ប៉ុន្តែ ដោយសារកាតាគាំទ្រក្រុមឧទ្ទាមស៊ីរី មេដឹកនាំប្រទេសលោកខាងលិចមួយចំនួនបានចោទកាតា ថាមិនបានចូលរួមពេញដៃពេញជើង ដើម្បីទប់ស្កាត់ចំណូលថវិការបស់ក្រុម ជ្រុលនិយមអ៊ីស្លាមទេ។
ដោយឡែក ក្នុងទំនាក់ទំនងពាណិជ្ជកមុ្មអាមេរិក-កាតា ក្រុមហ៊ុនQatar Airways ទើបនឹងបានទិញយន្តហោះបូអ៊ីងជាង១០០គ្រឿង ក្នុងតម្លៃ១៨ ៦០០ដុល្លារ។
វិលមករកស្ថានភាពនយោបាយវិញ ដើមខែមេសានេះ អាមេរិកបានបាញ់មីស៊ីល៥៩ដើម ទៅលើមូលដ្ឋានយោធាស៊ីរី បន្ទាប់ពីមានការវាយប្រហារដោយអាវុធគីមីសម្លាប់មនុស្ស៩០នាក់ នៅតំបន់ខាន់ ឆេកឃូន។ ថ្ងៃសុក្រម្សិលមិញ ក្នុងទស្សនកិច្ចនៅអ៊ីស្រាអែល ឆ្លើយសំណួរថា តើទាហានស៊ិរីបានបញ្ជូនយន្តហោះទៅមូលដ្ឋានយោធារុស្ស៊ីនៅឡាតាខ្ចេ ភាគខាងលិចស៊ីរិដែរទេ? លោក ម៉ាទីស បានឆ្លើយថា ទាហានស៊ីរីពិតជាបានរាយប៉ាយយន្តហោះខ្លួនមែនហើយ។ ម្សិលមិញនេះដែរ នាយករដ្ឋមន្ត្រីអ៊ីស្រាអែលបានទទួលជួបលោកម៉ាទីស និងបានលើកសរសើរពីនយោបាយរបស់ប្រធានាធិបតីដូណាល់ ត្រាំ។
ក្នុងទស្សនកិច្ចនៅដើមបូព៌ា ប្រមុខការពារជាតិអាមេរិក ជីម ម៉ាទីស បានទៅអារ៉ាប៊ីសាអូឌីត អេហ្ស៊ីប និងអ៊ីស្រាអែលរួចហើយ។ បន្ទាប់ពីកាតា ថ្ងៃសៅរ៍នេះ ថ្ងៃអាទិត្យស្អែក លោកនឹងបន្តដំណើរទៅដល់ប្រទេសជីប៊ូទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ