ទីប្រឹក្សាសន្តិសុខជាតិរបស់លោកដូណាល់ ត្រាំទៅទស្សនកិច្ចនៅប្រទេសអ៊ីស្រាអែល
លោកចន បុលតុន ទីប្រឹក្សាសន្តិសុខជាតិរបស់លោកប្រធានាធិបតីអាមេរិកដូណាល់ ត្រាំបានទៅទស្សនកិច្ចក្នុងទឹកដីអ៊ីស្រាអែលនាថ្ងៃអាទិត្យ ទី១៩ សីហា។ បញ្ហាអ៊ីរ៉ង់ វិបត្តិស៊ីរី និងបញ្ហានៅតំបន់ហ្កាហ្សាដែនដីប៉ាឡេស្ទីន គឺជាប្រធានបទសំខាន់ដែលលោកចន បុលតុនជជែកជាមួយលោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូ និងថ្នាក់ដឹកនាំអ៊ីស្រាអែលផ្សេងទៀត។ អ្វីជាការកត់សម្គាល់ វត្តមានទីប្រឹក្សាសន្តិសុខជាតិអាមេរិកក្នុងទឹកដីអ៊ីស្រាអែលរូបនេះបានធ្វើឡើង បន្ទាប់ពីលោកនេតាន់យ៉ាហ៊ូបានបិទស្ពាន Erez ដែលឆ្លងចូលតំបន់ហ្កាហ្សា។
ចុះផ្សាយនៅថ្ងៃ៖
ស្តាប់ - ០២:១៦
សេចក្តីសម្រេចបិទស្ពាន Erez ត្រូវបានធ្វើឡើងដោយលោករដ្ឋមន្រ្តីក្រសួងការពារជាតិអ៊ីស្រាអែល Avigdor Lieberman ដោយសំអាងលើហេតុផលនៃសន្ទុះអំពើហិង្សារបស់ក្រុមបាតុករប៉ាឡេស្ទីននៅតាមព្រំដែនរវាងតំបន់ហ្កាហ្សា និងទឹកដីអ៊ីស្រាអែលកាលពីថ្ងៃសុក្រ ទី១៧ សីហា។ លោក Lieberman បានបន្ថែមថា បើអំពើហិង្សានៅបន្តមាន នោះរដ្ឋអំណាចអ៊ីស្រាអែលនឹងបន្តចាត់វិធានការផ្សេងទៀត។ តែទោះជាយ៉ាងនេះក្តី ការធ្វើចរាចរណ៍លើស្ពានមួយនេះនឹងអនុញ្ញាតចំពោះអ្នកជម្ងឺ និងសម្រាប់ករណីមនុស្សធម៌។
ជារៀងរាល់ថ្ងៃគិតជាមធ្យម មានមនុស្សឆ្លងកាត់លើស្ពាន Erez ប្រមាណជា ៣៦០នាក់ និងដែលភាគច្រើនមិនមែនពលរដ្ឋប៉ាឡេស្ទីនរស់ក្នុងតំបន់ហ្កាហ្សាទេ តែជាអ្នកកាសែត បុគ្គលិករបស់អង្គការសហប្រជាជាតិ ឬអង្គការក្រៅរដ្ឋាភិបាលនានា។ ម្យ៉ាងទៀត ស្ពាន Erez ក៏មិនសូវត្រូវបានគេប្រើសម្រាប់ដឹកទំនិញទៅកាន់តំបន់ហ្កាហ្សាដែរ។ ស្ពានដែលគេប្រើដើម្បីដឹកទំនិញទៅដែនដីប៉ាឡេស្ទីនមួយនេះ គឺស្ពាន Kerem Shalom ដែលអ៊ីស្រាអែលទើបបើកឲ្យប្រើវិញកាលពីថ្ងៃពុធ ទី១៥ សីហា។ ចំណែកច្រកចេញចូលរវាងតំបន់ហ្កាហ្សា និងទឹកដីប្រទេសអេហ្ស៊ីបដែលតែងបិទជាប្រចាំក្នុងរយៈពេលប៉ុន្មានឆ្នាំចុងក្រោយនេះក៏ត្រូវបានគេបើកឲ្យប្រើប្រាស់តាំងពីពាក់កណ្តាលខែឧសភាកន្លងទៅដែរ។
សូមជម្រាបជូនថា ចំណាត់ការរបស់រដ្ឋអំណាចអ៊ីស្រាអែលលើតំបន់ហ្កាហ្សារបស់ប៉ាឡេស្ទីនបានកើតមានតាំងពីថ្ងៃទី៣០ មីនា ពោលចំពេលដែលមានបាតុកម្មរបស់ពលរដ្ឋប៉ាឡេស្ទីនទាមទារឲ្យលើកការបិទខ្ទប់ និងទាមទារសិទ្ធិនៃការវិលត្រឡប់របស់ជនភៀសខ្លួនប៉ាឡេស្ទីន។ អំពើហិង្សានៅតំបន់ហ្កាហ្សាជាប់ព្រំដែនអ៊ីស្រាអែលក៏ជាសំណុំរឿងនៃជំនួបរវាងលោកនេតាន់យ៉ាហ៊ូ និងលោកចន បុលតុន ទីប្រឹក្សាសន្តិសុខជាតិរបស់លោកប្រធានាធិបតីអាមេរិកដូណាល់ ត្រាំ។ ក្រៅពីនោះ នៅមានបញ្ហាតំបន់ទាក់ទងនឹងប្រទេសអ៊ីរ៉ង់ និងវិបត្តិនៅក្នុងប្រទេសស៊ីរី។
អាមេរិក និងអ៊ីស្រាអែលបានសម្តែងក្តីបារម្ភដូចគ្នាទាក់ទងនឹងឥទ្ធិពលរបស់អ៊ីរ៉ង់នៅក្នុងតំបន់។ លោកនេតាន់យ៉ាហ៊ូធ្លាប់បានព្រមានពីវត្តមានទ័ពអ៊ីរ៉ង់នៅក្នុងតំបន់ និងការគាំទ្ររបស់ទីក្រុងតេហេរ៉ង់ចំពោះប្រធានាធិបតីស៊ីរីលោកអាសាដ។ បន្ទាប់ពីប្រទេសអ៊ីស្រាអែល លោកបុលតុនក៏ធ្វើដំណើរទៅកាន់ប្រទេសអ៊ុយក្រែន និងប្រទេសស្វ៊ីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ