ប្រទេសអាហ្សង់ទីនធ្វើម្ចាស់ផ្ទះរៀបចំជំនួបកំពូល G២០ ក្នុងពេលដែលប្រទេសកំពុងជួបវិបត្តិសេដ្ឋកិច្ច
ក្នុងរយៈពេល ២ថ្ងៃពីថ្ងៃសុក្រ ទី៣០ វិច្ឆិកាដល់ថ្ងៃសៅរ៍ ទី១ ធ្នូ ប្រទេសអាហ្សង់ទីនធ្វើជាម្ចាស់ផ្ទះរៀបចំជំនួបកំពូល G២០។ ជាលើកទី១ នៅក្នុងប្រវត្តិរបស់ខ្លួនដែលប្រទេសនៅអាមេរិកខាងត្បូងមួយនេះទទួលប្រមុខរដ្ឋ និងប្រមុខរដ្ឋាភិបាលគ្រាក់ៗមកពីក្រុមប្រទេសមហាអំណាចសេដ្ឋកិច្ចទាំង ២០ក្នុងលោក។ តែអ្វីជាការកត់សម្គាល់ អាហ្សង់ទីនខ្លួនឯងកំពុងរស់ក្នុងស្ថានភាពសេដ្ឋកិច្ចត្រដាបត្រដួសតាំងពីវិបត្តិសេដ្ឋកិច្ចឆ្នាំ ២០០១។ នៅក្នុងន័យនេះ និងដើម្បីរក្សាស្ថិរភាពសេដ្ឋកិច្ច លោកប្រធានាធិបតីម៉ូរីស្យូ ម៉ាគ្រីបានសុំខ្ចីលុយពីមូលនិធិរូបិយវត្ថុអន្តរជាតិ IMF។ IMF ដែលបានយល់ព្រមផ្តល់ប្រាក់កម្ចីឲ្យលោកម៉ាគ្រីចំនួន ៥៦ ០០០លានដុល្លារ។
ចុះផ្សាយនៅថ្ងៃ៖
ស្តាប់ - ០២:៤៦
ក្នុងនាមជាប្រទេសមហាអំណាចសេដ្ឋកិច្ចទី៣ នៅអាមេរិកឡាទីន អាហ្សង់ទីនបានជួបប្រទះនឹងវិបត្តិរូបិយវត្ថុចំនួនពីរលើកក្នុងឆ្នាំ ២០១៨ ដោយបានធ្វើឲ្យប្រាក់ប៉ឺសូបាត់បង់តម្លៃ ៥០% ធៀបនឹងប្រាក់ដុល្លារ។ សម្រាប់លោកប្រធានាធិបតីម៉ូរីស្យូ ម៉ាគ្រីដែលបានឡើងកាន់តំណែងតាំងពីដំណាច់ឆ្នាំ ២០១៥ សម្រាប់អាណត្តិ ៤ឆ្នាំ ២០១៨ ជាឆ្នាំដ៏អាក្រក់ជាងគេសម្រាប់ជីវិតរបស់លោក។ តាមការប្រមើលមើលរបស់មូលនិធិរូបិយវត្ថុអន្តរជាតិ អត្រាអតិផរណានៅអាហ្សង់ទីននឹងកើនលើសពី ៤៥% ហើយអត្រាកំណើនសេដ្ឋកិច្ចនឹងធ្លាក់ពី ២,៦% ក្នុងឆ្នាំ ២០១៨ ទៅ ១,៦% នៅឆ្នាំ ២០១៩ ខាងមុខ។
ដើម្បីជួយរក្សាស្ថិរភាពសេដ្ឋកិច្ចដែលកំពុងផុយស្រួចស្រាប់ លោកម៉ូរីស្យូ ម៉ាគ្រីបានរត់រកជំនួយពីស្ថាប័នហិរញ្ញវត្ថុអន្តរជាតិ ពិសេសមូលនិធិរូបិយវត្ថុអន្តរជាតិដែលបានយល់ព្រមផ្តល់ប្រាក់កម្ចីឲ្យអាហ្សង់ទីនចំនួន ៥៦ ០០០លានដុល្លារ។ តែជាប្រាក់កម្ចីដែលមានលក្ខខណ្ឌដោយស្ថាប័នហិរញ្ញវត្ថុអន្តរជាតិមួយនេះទាមទារឲ្យលោកម៉ាគ្រីធ្វើកំណែទម្រង់ស៊ីជម្រៅមួយ ពិសេសកាត់បន្ថយការចំណាយរបស់រដ្ឋ។ នៅពេលឡើងកាន់អំណាចភ្លាម លោកម៉ូរីស្យូ ម៉ាគ្រីដែលជាអ្នកកំណែទម្រង់បានលុបចោលការលូកដៃរបស់រដ្ឋលើអត្រាប្តូរប្រាក់ប៉ឺសូ កាត់បន្ថយប្រាក់ឧបត្ថម្ភធនលើការប្រើប្រាស់ភ្លើងអគ្គិសនី ឧស្ម័នហ្គាស និងការធ្វើដំណើររបស់ពលរដ្ឋ។
នយោបាយមួយនេះបានធ្វើឲ្យការចាយវាយរបស់ពលរដ្ឋធ្លាក់ចុះយ៉ាងខ្លាំង។ ការបាត់បង់ជំនឿទុកចិត្តពីក្រុមអ្នកវិនិយោគ និងពលរដ្ឋអាហ្សង់ទីនបានធ្វើឲ្យប្រាក់ប៉ឺសូបាត់បង់តម្លៃ ៥០% ក្នុងខែមេសា និងសីហា។ ឆ្នាំ ២០១៨ ជាឆ្នាំដែលអាហ្សង់ទីនបានស្គាល់បាតុកម្ម និងកូដកម្មជាច្រើន ពិសេសក្នុងវិស័យដឹកជញ្ជូនសាធារណៈ។ នៅថ្ងៃសុក្រ ទី៣០ វិចិ្ឆកាដែលជាថ្ងៃទី១ នៃជំនួបកំពូល G២០ ក៏មានគម្រោងរៀបចំក្បួនបាតុកម្មដ៏សម្បើមមួយ។ តែលោកប្រធានាធិបតីអាហ្សង់ទីនម៉ូរីស្យូ ម៉ាគ្រីដែលកំពុងមានប្រជាប្រិយភាពធ្លាក់ចុះខ្លាំង និងបានឈរឈ្មោះប្រធានាធិបតីជាថ្មីសម្រាប់ការបោះឆ្នោតឆ្នាំ ២០១៩ បានត្រៀមឆក់ឱកាសនៃជំនួបកំពូល G២០ ពេលនេះដើម្បីស្រោចស្រង់ប្រជាប្រិយភាពរបស់ខ្លួនឡើងវិញ។
នៅក្នុងន័យនេះ លោកម៉ាគ្រីបានត្រៀមខ្លួនដើម្បីមានជំនួបទ្វេភាគីជាមួយថ្នាក់ដឹកនាំគ្រាក់ៗដូចយ៉ាងលោកប្រធានាធិបតីអាមេរិកដូណាល់ ត្រាំ សមភាគីបារាំងលោកម៉ាក្រុង លោកប្រមុខរដ្ឋាភិបាលជប៉ុនអាបេ នាយករដ្ឋមន្រ្តីអាល្លឺម៉ង់លោកស្រីមែរកិល ឬនាយករដ្ឋមន្រ្តីកាណាដាលោកទ្រូដូជាដើម។ អ្វីដែលលោកម៉ាគ្រីចង់បាន គឺការគាំទ្រពីថ្នាក់ដឹកនាំបរទេសគ្រាក់ៗទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ